អាជ្ញាធរហាមឃាត់រថយន្តដឹកជញ្ជូនធុនធ្ងន់ឆ្លងកាត់ស្ពានជ្រោយចង្វារ
នៅក្នុងសេចក្ដីប្រកាសព័ត៌មានចុះថ្ងៃទី១ខែសីហា សាលារាជធានីភ្នំពេញ បានប្រកាសហាមឃាត់រថយន្តដឹកជញ្ជូនធុនធ្ងន់ មិនឲ្យឆ្លងកាត់ស្ពានជ្រោយចង្វារទេ។ មិនឲ្យឆ្លងកាត់ ដោយសារតែស្ពាននេះ មានស្ថានភាពទ្រុឌទ្រោមខ្លាំងផ្នែកកំណល់នៃទម្រស្ពាន។
ចុះផ្សាយនៅថ្ងៃ៖
ស្តាប់ - ០១:៤៥
នារយៈពេលប៉ុន្មានថ្ងៃចុងក្រោយនេះ ក្រុមបច្ចេកទេសក្រសួងសាធារណការ និងដឹកជញ្ជូន និងសាលារាជធានីភ្នំពេញ បានពិនិត្យឃើញពីស្ថានភាពទ្រុឌទ្រោមខ្លាំង ផ្នែកកំណល់នៃទម្រស្ពានមិត្តភាពកម្ពុជាជប៉ុន ឬស្ពានជ្រោយចង្វារ។ ស្ថានភាពទ្រុឌទ្រោមខ្លាំងនេះ ពុំអាចឲ្យរថយន្តធុនធ្ងន់ ធ្វើចរាចរឆ្លងកាត់បានទេ។ នេះបើតាមសេចក្ដីប្រកាសព័ត៌មានរបស់សាលារាជធានីភ្នំពេញចុះថ្ងៃទី១ខែសីហា។
ដូច្នេះ ដើម្បីថែរក្សាការពារ និងអាចប្រើប្រាស់ស្ពានបានជាបណ្ដោះអាសន្ន កុំឲ្យបង្កការគ្រោះថ្នាក់ជាយថាហេតុនោះ សាលារាជធានីភ្នំពេញសម្រេចធ្វើការហាមឃាត់ មិនអនុញ្ញាតឲ្យរថយន្តធុនធ្ងន់ ធ្វើចរាចរឆ្លងកាត់ស្ពានជ្រោយចង្វារ ចាប់ពីពេលនេះ រហូតដល់មានការជូនដំណឹងជាថ្មី។
ប្រជាពលរដ្ឋជាម្ចាស់រថយន្តដឹកជញ្ជូនធុនធ្ងន់ ត្រូវបានអាជ្ញាធរ ណែនាំឲ្យបង្វែរការដឹកជញ្ជូនរបស់ខ្លួន ទៅឆ្លងកាត់ស្ពានព្រែកព្នៅជាបណ្ដោះអាសន្នវិញ។ ស្ពានព្រែកព្នៅ ឬស្ពានលីយ៉ុងផាត់ ដែលតម្រូវឲ្យបង់ប្រាក់ សម្រាប់ការធ្វើដំណើរឆ្លងកាត់របស់រថយន្តគ្រប់ប្រភេទ។
គួររម្លឹកថា ស្ពានជ្រោយចង្វារចាស់ បានសាងសង់តាំងពីឆ្នាំ១៩៦៦ និងក្រោយមកត្រូវបានកាត់ផ្ដាច់នៅក្នុងរបបខ្មែរក្រហម។ នៅឆ្នាំ១៩៩៥ ស្ពានជ្រោយចង្វារ ឬស្ពានមិត្តភាពកម្ពុជាជប៉ុន ត្រូវបានជួសជុល និងភ្ជាប់ឡើងវិញ ដោយមានជំនួយពីប្រទេសជប៉ុន។
ស្ថានភាពទ្រុឌទ្រោមរបស់ស្ពានជ្រោយចង្វារចាស់នេះ បានស្ដែងឡើងស្របពេលដែលស្ពានជ្រោយចង្វារថ្មី ត្រូវបានស្ថាបនាជិតរួចរាល់ហើយ។ ស្ពានជ្រោយចង្វារថ្មី ត្រូវបានសាងសង់ឡើងស្របគ្នានឹងស្ពានជ្រោយចង្វារចាស់ ដោយប្រាក់កម្ចីរបស់រដ្ឋាភិបាលចិនចំនួន២៧លាន៥សែនដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ