កម្ពុជាធ្វើយុទ្ធនាការប្រយុទ្ធនឹងជំងឺគ្រុនឈាម
រដ្ឋាភិបាល និងវិស័យឯកជនបានចាប់ផ្តើមបើកយុទ្ធនាការ នៅថ្ងៃសុក្រនេះ ប្រឆាំងនឹងជំងឺគ្រុនឈាម។ ក្នុងរយៈពេល៥ខែដើមឆ្នាំ២០១៣ ជំងឺគ្រុនឈាមបានសម្លាប់កុមារចំនួន១៥នាក់។ តួលេខនេះបង្ហាញពីការធ្លាក់ចុះនៃករណីគ្រុនឈាមនៅកម្ពុជា បើប្រៀបធៀបនឹងឆ្នាំមុន។
ចុះផ្សាយនៅថ្ងៃ៖
ស្តាប់ - ០១:៣៦
កម្ពុជាបានរៀបចំយុទ្ធនាការប្រឆាំងនឹងជំងឺគ្រុនឈាម នៅព្រឹកថ្ងៃសុក្រទី៣១ឧសភានេះ ដោយការដើរដង្ហែក្បួនរបស់សិស្សបឋមសិក្សា មន្ត្រីរាជការ អង្គការក្រៅរដ្ឋាភិបាល និងវិស័យឯកជន ជាង១០០០នាក់។ ពួកគេបានស្លៀកឯកសណ្ឋានដូចគ្នា ជាមួយអាវយឺតខៀវ ដោយសាមានសរសេរថា “ទិវាប្រយុទ្ធនឹងជំងឺគ្រុនឈាម” និងបានកាន់បដាដែលមានសរសេរសារអប់រំជាច្រើន។
ក្បួនដង្ហែបានចេញដំណើរពីសាលាបឋមសិក្សាចតុមុខ ហើយបានបញ្ចប់ការជួបជុំគ្នានៅមុខទីវាលវត្តបុទុម។ នៅទីនោះហើយដែលមានការប្រគុំតន្ត្រី និងការថ្លែងការណ៍ពីក្រុមគ្រូពេទ្យ តំណាងរដ្ឋាភិបាលផង ស្តីពីការប្រយុទ្ធនឹងជំងឺគ្រុនឈាម។
យោងតាមការបញ្ជាក់របស់លោកវេជ្ជបណ្ឌិត ង៉ាន់ ចាន់ថា ប្រធានផ្នែកជំងឺគ្រុនឈាមនៃក្រសួងសុខាភិបាល នៅក្នុងរយៈពេល៥ខែដើមឆ្នាំនេះ មានកុមារ ២ ៥៤១ នាក់បានកើតជំងឺគ្រុនឈាម ហើយថា ក្នុងចំណោមនោះ មានកុមារ១៥នាក់បានស្លាប់។ ប៉ុន្តែ ចំនួននេះ បានថយចុះ ៤៦ % ធៀបនឹងរយៈពេល៥ខែដូចគ្នា ក្នុងឆ្នាំ២០១២។ នៅពេលនោះ មានកុមារកើតជំងឺគ្រុនឈាមចំនួន ៣ ៦៦៨នាក់ ក្នុងនោះ មានស្លាប់ ១៧នាក់។ លោកវេជ្ជបណ្ឌិត ង៉ាន់ ចាន់ថា បានបន្តថា ក្រសួងសុខាភិបាលគ្រោងចែកចាយថ្នាំអាល់បេត ចំនួន១៤០ តោន ដល់ប្រជាពលរដ្ឋនៅទូទាំងប្រទេស ដើម្បីដាក់នៅក្នុងពាង និងអាងទឹក។
គួររម្លឹកថា កម្ពុជាបានទទួលរងគ្រោះដោយរលកផ្ទុះជំងឺគ្រុនឈាមខ្លាំងនៅឆ្នាំ២០០៧។ ពេលនោះករណីគ្រុនឈាមមានរហូតដល់៤ ៣៣៤នាក់ ក្នុងនោះ ស្លាប់៥៧ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ