អ្នកនយោបាយនៅកម្ពុជាមិនអើពើស្ថានការណ៍នយោបាយថៃក្បែរខាង
ខណៈដែលការបោះឆ្នោតរបស់ប្រទេសថៃបានក្លាយជាចំណងជើងធំៗលើទំព័រសារព័ត៌មានអន្តរជាតិ អ្នកនយោបាយនៅកម្ពុជាទាំងគណបក្សកាន់អំណាច និងបក្សប្រឆាំង រួមទាំងរដ្ឋាភិបាលមិនបានចាប់អារម្មណ៍ការវិវឌ្ឍន៍ស្ថានការណ៍នយោបាយដ៏ស្រួចស្រាវនៅក្នុងប្រទេសថៃនោះទេ។ អ្នកវិភាគនយោបាយ បានរិះគន់ថា អ្នកនយោបាយនៅកម្ពុជាគួរតែត្រូវតាមដានស្ថានការណ៍នៅថៃ ព្រោះថាកម្ពុជានិងថៃជាព្រំដែនជាមួយគ្នានិងមានទំនាក់ទំនងផលប្រយោជន៍ពាណិជ្ជកម្មជាមួយគ្នា។
ចុះផ្សាយនៅថ្ងៃ៖
ស្តាប់ - ០២:២៧
អ្នកនយោបាយនៅកម្ពុជាទាំងបក្សកាន់អំណាច និងបក្សប្រឆាំងមិនបានចាប់អារម្មណ៍ការបោះឆ្នោតដ៏ចម្រូងចម្រាស់នៅប្រទេសថៃនោះទេ។ ខណៈដែលប្រទេសថៃក្បែខាងនៅថ្ងៃទី២កុម្ភៈនេះ បានរៀបចំបោះឆ្នោតមុនអាណត្តិដើម្បីបិទបញ្ចប់វិបត្តិនយោបាយរ៉ាំរ៉ៃ។
ថ្លែងប្រាប់វិទ្យុបារាំងអន្តរជាតិនៅថ្ងៃអាទិត្យនេះ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានមានប្រសាសន៍ថា លោកមិនចាប់អារម្មណ៍ចំពោះការបោះឆ្នោតនៅប្រទេសថៃនោះទេ។ លោកលើកឡើងថា កិច្ចការផ្ទៃក្នុងកម្ពុជាដែលមិនទាន់បានដោះស្រាយចេញនោះ មានសារសំខាន់ជាង។
មិនខុសពីលោកយឹម សុវណ្ណនោះទេ មន្ត្រីជាន់ខ្ពស់ការិយាល័យនយោបាយគណបក្សប្រជាជនកម្ពុជាលោក ជាម យៀបវិញ ការបោះឆ្នោតនៅប្រទេសក្រោយការប្រែប្រួលរវាងក្រុមអាវលឿង និងក្រុមអាវក្រហមដែលឈានដល់ការបោះឆ្នោតនោះ គឺមិនមានអ្វីមានអ្វីជាការចាប់អារម្មណ៍ជាងស្ថានការណ៍នៅកម្ពុជាផ្ទាល់ខ្លួននោះទេ។ ប៉ុន្តែលោកមិនបដិសេធក្នុងការតាមដានព័ត៌មានពីលទ្ធផលនៃការបោះឆ្នោតនោះ។
ដោយឡែកអ្នកនាំពាក្យក្រសួងការបរទេសកម្ពុជា លោក កុយ គួងវិញ ការបោះឆ្នោតនៅប្រទេសថៃដែលប្រព្រឹត្តនៅថ្ងៃទី២កុម្ភៈនេះ គឺជាការដោះស្រាយបញ្ហានយោបាយផ្ទៃក្នុងរវាងថៃ និងថៃ។ លោកសង្កត់ធ្ងន់ថា “ទុកឱ្យថៃ និងថៃដោះស្រាយគ្នាឯងទៅ”។
សូមរំលឹកថា នៅថ្ងៃទី២កុម្ភៈនេះ ប្រទេសថៃបានរៀបចំបោះឆ្នោតមុនអាណត្តិដើម្បីបិទបញ្ចប់វិបត្តិនយោបាយរវាងក្រុមប្រឆាំងអ៊ាវលឿង និងក្រុមគាំទ្ររដ្ឋាភិបាលអ៊ាវក្រហម ដែលដឹកនាំដោយលោកស្រីយ៉ិងឡាក់ប្អូនលោកថាក់ស៊ីនអតីតនាយករដ្ឋមន្ត្រីថៃដែលត្រូវបានទំលាក់ដោយរដ្ឋប្រហារយោធា។ នៅក្នុងថ្ងៃបោះឆ្នោតដ៏ចម្រូងចម្រាសនៅថ្ងៃ២កុម្ភៈនេះ មានការិយាល័យក្នុងខេត្តចំនួន៩ត្រូវបានបិទទ្វា។
អ្នកវិភាគនយោបាយ លោកបណ្ឌិតសុខ ទូច បានថ្លែងសោកស្តាយខណៈដែលអ្នកនយោបាយគ្រប់និន្នាការនៅកម្ពុជាមិនបានចាប់អារម្មណ៍លើការវិវឌ្ឍន៍សង្គមនយោបាយថៃព្រោះថា ប្រទេសថៃនិងកម្ពុជាមានព្រុំដែនគោក និងទឹកជាមួយគ្នា។ ក្រៅពីព្រុំដែនរួមគ្នារាប់គីឡូនោះ កម្ពុជានិងថៃទំនាក់ទំនងពាណិជ្ជកម្ម និងលំហូរសេដ្ឋកិច្ចក្នុងទឹកប្រាក់សន្ធឹកសន្ធាប់ រួមទាំងលំហូរមនុស្សពីកម្ពុជាទៅថៃជាច្រើននាក់ផងដែរ។
លោក បានរិះគន់ទៅលើអ្នកនយោបាយកម្ពុជាថា ការមិនចាប់អារម្មណ៍ពីភូមិសាស្ត្រនយោបាយនៅជិតខាងនេះ គឺនឹងមានភ័យន្តរាយនៅពេលថៃមានវិបត្តនយោបាយ ឬស្ថានការវឹកវរធ្ងន់ធ្ថរណាមួយកើតឡើងនោះ។ ស្ថានការណ៍អាក្រក់នោះនឹងរុញច្រានទាំងប្រទេសនៅកម្ពុជា និងអាស៊ានទាំងមូលជួបវិបត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ