ក្រុមប្រឆាំងបន្តធ្វើបាតុកម្ម មិនខ្វល់នឹងក្រិត្យដាក់ក្រុងបាងកកក្នុងភាពអាសន្ន
ក្រុមអ្នកប្រឆាំង នៅតែបន្តចលនាបាតុកម្មរបស់ខ្លួន ទាមទារឱ្យលោកស្រី យីងឡាក់ ស៊ីណាវ៉ាត់ ចុះចេញពីតំណែងដដែល មិនរអែងនឹងអ្វីឡើយ បើទោះបីជាក្រុងបាងកក និងខេត្តជុំវិញ ត្រូវប្រកាសដាក់ក្នុងស្ថានភាពអាសន្ន តាំងពីល្ងាចម្សិលមិញ សម្រាប់រយៈពេល៦០ថ្ងៃក៏ដោយ។ ម្យ៉ាងវិញទៀត សម្ពាធអាចនឹងកាន់តែតឹងតែងបន្ថែមមួយកំរិតទៀតពីលើការដាក់រដ្ឋធានីក្នុងភាពអាសន្ន ដោយហេតុតែមានករណីបាញ់ប្រហារព្យាបាទគ្នាកើតមានឡើងទៅតាមខេត្ត ដោយទំនងមូលហេតុនយោបាយ។
ចុះផ្សាយនៅថ្ងៃ៖
ស្តាប់ - ០១:៥៧
មេដឹកនាំចលនាអាវក្រហមម្នាក់ ដែលគាំទ្ររដ្ឋាភិបាល ត្រូវបានជនមិនស្គាល់មុខ បាញ់រះ ពីលើឡាន បង្កឱ្យរងរបួសដៃ និងជើង ក្នុងខណៈដែលលោកក្វាឆៃ ប្រៃប៉ាណា អង្គុយលេងនៅមុខផ្ទះ ក្នុងខេត្តឧដុង ថានី ភាគឦសានប្រទេស។ ប៉ូលិសបានបើកអង្កេតភ្លាម ព្រោះ យល់ថាហេតុការណ៍នេះ មានពាក់ព័ន្ធខ្លាំងនឹងនយោបាយ។
ការវាយប្រហារនេះអាចនឹងធ្វើឱ្យភាពតានតឹង កាន់តែប៉ោងឡើងមួយកំរិតទៀត ខណៈដែលក្រុងបាងកកត្រូវបានដាក់ឱ្យស្ថិតក្នុងភាពអាសន្ន ចាប់ពីថ្ងៃពុធនេះ សម្រាប់រយៈពេល៦០ថ្ងៃ។ សេចក្តីសម្រេចរបស់រដ្ឋាភិបាលនេះ ធ្វើឡើងក្នុងបំណងទប់ស្កាត់ចលនាបាតុកម្ម ដើម្បីឱ្យដំណើរការបោះឆ្នោតមុនអាណត្តិថ្ងៃទី២កុម្ភៈអាចប្រព្រឹត្តទៅបាន។
ប៉ុន្តែក្រុមបាតុករ ជាអ្នករាជានិយម មិនខ្វល់នឹងវិធានការរបស់រដ្ឋាភិបាលឡើយ នៅថ្ងៃពុធនេះ ពួកគេនៅតែបន្តប្រមូលផ្តុំ ស្រែកទាមទារឱ្យលោកស្រីនាយករដ្ឋមន្ត្រីចុះចេញពីអំណាច និងចង់បិទបញ្ចប់ប្រព័ន្ធដឹកនាំ “ថាក់ស៊ីន” ព្រោះយល់ថាអតីតនាយករដ្ឋមន្ត្រីលោក ថាក់ស៊ីន ស៊ីណាវ៉ាត់ ដែលកំពុងនិរទេសខ្លួននៅបរទេសបន្តញាក់ខ្សែដឹកនាំប្រទេសពីក្រោយខ្នងប្អូនស្រី។
បើតាមប៉ូលិស មានបាតុករប្រមាណ៥ពាន់នាក់បានប្រមូលផ្តុំ តាមចំណុចផ្សេងៗគ្នា ប៉ុន្តែចំនួនមនុស្សអាចនឹងកើនឡើងនៅពេលល្ងាច។ រហូតមកទល់នឹងម៉ោងនេះ ពុំទាន់ឃើញមានការបង្ក្រាបអ្វីណាមួយទេ។
រដ្ឋាភិបាល លោកស្រី យីងឡាក់ ថ្វីបើបានប្រកាសដាក់ ក្រុងបាងកកត្រូវប្រកាសដាក់ក្នុងភាពអាសន្ន ផ្តល់សិទ្ធិឱ្យមានការហាមឃាត់បាតុកម្ម និងឃាត់ខ្លួនមែន ប៉ុន្តែ អាជ្ញាធរមិនបានបញ្ជាក់អំពីវិធានការដែលត្រូវអនុវត្តទេ គឺខុសពីវិបត្តិឆ្នាំ២០១០ ដែលកាលណោះរដ្ឋាភិបាលលោកអាភិស៊ីតបានអនុញ្ញាតឱ្យមានការបាញ់គ្រាប់ពិតទៅលើបាតុករ មុននឹងក្រុមយោធាបើកយុទ្ធនាការគាស់បំបែកបាតុករ រហូតមកស្លាប់៩០នាក់និងរបួសជិតពីរពាន់នាក់ រុញច្រានប្រទេសឱ្យស្គាល់វិបត្តិដ៏ធ្ងន់ធ្ងរ និងបែងចែកយ៉ាងច្បាស់រវាងអ្នកក្រុង អ្នកការពាររាជានិយមនិងអ្នកជនបទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ