វិបត្តិនយោបាយថៃ ៖ ក្រុមទីបី អ្នកគាំទ្រការបោះឆ្នោត ផ្តើមបញ្ចេញសំឡេង
ក្រុមសកម្មជនបក្សប្រឆាំងនិងក្រុមអាវលឿងនៅបន្តដង្ហែក្បួនធ្វើបាតុកម្មនៅទីក្រុងបាងកកទៀតថ្ងៃសៅរ៍ទី ១៨មករា នេះ បើទោះបីជាម្សិលមិញមានការបំផ្ទុះគ្រាប់បែកកណ្តាលហ្វូងបាតុករ បណ្តាលឱ្យស្លាប់ម្នាក់និងរបួសជាច្រើននាក់ក៏ដោយ។ មជ្ឈមណ្ឌលពាណិជ្ជកម្មត្រូវរំខាន ផ្លូវថ្នល់ត្រូវបិទខ្ទប់ ក្រុងបាងកកត្រូវជាប់គាំង ជាច្រើនខែ បណ្តាជនក្រុងបាងកកចាប់ផ្តើមធុនទ្រាន់ សកម្មជនអ្នកគាំទ្រការបោះឆ្នោត បានរួបរួមគ្នាបង្កើតជាចលនាមួយថ្មី និងបានផ្តើមបញ្ចេញសំឡេង ទាមទារឱ្យមានការគោរពឆន្ទៈរបស់ពលរដ្ឋ។
ចុះផ្សាយនៅថ្ងៃ៖
ស្តាប់ - ០២:០៧
ជាក្រុមថ្មី ពាក់អាវស ដែលចង់សាកល្បងបង្ហាញជំហរកណ្តាលនិយម ក្នុងរាជាណាចក្រដែលបែងចែកជាពីររវាងក្រុមប្រឆាំង អ្នកក្រុង អភិជន ស្និទ្ធនឹងរាជវង្ស ក្រុមអាវលឿង និងក្រុមអាវក្រហមអ្នកជនបទ គាំទ្រស្មោះស្ម័គ្រនឹងត្រកូលថាក់ស៊ីន។
រស់នៅក្នុងក្រុងបាងកក ជាសាស្ត្រាចារ្យ ឬជាអ្នកមានមុខមានមាត់ល្បីក្នុងសង្គម ក្រុមសកម្មជនអ្នកគាំទ្រការបោះឆ្នោតរាប់ពាន់នាក់ បាននាំគ្នាដើរចេញពីស្ងប់ស្ងាត់ ពីភាពអំណត់កន្លងមក ដោយបានរៀបចំជាការជួបជុំពេលរាត្រី បង្ហោះប៉េងប៉ោង និងធ្វើយុទ្ធនាការតាមប្រព័ន្ធសង្គម Facebook ទាមទារឱ្យមានការគោរពសំឡេង និងឆន្ទៈរបស់ពួកគេផង ព្រមទាំងចង់បង្ហាញពីភាពមិនសប្បាយចិត្តផង ចំពោះសកម្មភាពបាតុកម្មរបស់ក្រុមបក្សប្រឆាំង ដែលមិនទទួលយកការបោះឆ្នោតសភាមុនអាណត្តិ។
“យើងចង់បោះឆ្នោត នៅថ្ងៃទី ២កុម្ភៈ” ! សូមគោរពសំឡេងឆ្នោតខ្ញុំ ! ទាំងនេះសុទ្ធជាពាក្យស្លោក ដែលមានសរសេរបង្ហោះតាមសួនច្បារ តាមប្រព័ន្ធសង្គម។ អ្នករៀបចំកម្មវិធី សូមមិនបញ្ចេញឈ្មោះ ព្រោះហេតុផលសុវត្ថិភាព បានរិះគន់បាតុកម្មដែលអូសបន្លាយតាំងពីជាងពីរខែមក និងបានអំពាវនាវឱ្យបញ្ឈប់សកម្មភាពនេះ ព្រោះមានតែការបោះឆ្នោតមួយប៉ុណ្ណោះដែលជាដំណោះស្រាយសន្តិវិធី។ ពេលនេះមានបណ្តាជនថៃ កាន់តែច្រើនឡើងៗ ទាំងនៅបាងកក នៅតាមខេត្ត បានបញ្ចេញសំឡេងមិនគាំទ្របាតុកម្មរបស់បក្សប្រឆាំង។
ចលនាបាតុកម្មប្រឆាំងនឹងរដ្ឋាភិបាល បានផ្ទុះឡើងតាំងពីខែវិច្ឆកា និងបានប្រកាន់ជំហរកាន់តែដាច់ខាតឡើងៗ ចង់បានតែម្យ៉ាងគត់គឺការចុះចេញពីតំណែងរបស់លោកស្រីនាយករដ្ឋមន្ត្រី យីងឡាក់ បិទបញ្ចប់ប្រព័ន្ធកាន់អំណាចត្រកូលថាក់ស៊ីន ដោយដាក់ជំនួសមកវិញនូវក្រុមប្រឹក្សាប្រជាជនសម្រាប់ដឹកនាំប្រទេស ប៉ុន្តែដោយមិនឆ្លងកាត់ការបោះឆ្នោតឡើយ។
បាតុកម្មដែលបានរុញច្រានប្រទេសឱ្យធ្លាក់ក្នុងវិបត្តិដ៏ធ្ងន់ធ្ងរ ហេតុដូច្នេះហើយបានជាលោកស្រីនាយករដ្ឋមន្ត្រីបង្ខំចិត្ត រៀបចំការបោះឆ្នោតមុនអាណត្តិ ដើម្បីពន្លត់កំហឹងអ្នកប្រឆាំង ប៉ុន្តែក្រុមនេះឬហៅថាក្រុមអាវលឿង មិនចង់បានទេការបោះឆ្នោត ព្រោះដឹងថាគណបក្សកាន់អំណាច នឹងឈ្នះជាថ្មីទៀត ទើបបក្សប្រឆាំងប្រកាសធ្វើពហិការយ៉ាងដូច្នេះ។
ប្រឈមនឹងភាពជ្រុលនិយមនេះ ក្រុមទីបីអាចនឹងរីកធំធាត់ខ្លាំង និងគ្មានអ្វីទប់បានទេ ព្រោះពួកគេស្ថិតក្រោមសម្ពាធ ទ្រាំតាំងពីដើមមក ដល់ថ្ងៃមួយគឺត្រូវធ្លាយ ហ៊ាននិយាយថាឈប់គាំទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ