កម្ពុជា ប្រឈមបញ្ហាកង្វះនិស្សិតជំនាញបច្ចេកទេសនិងវិទ្យាសាស្រ្តពិត ខណៈសមាហរណកម្មអាស៊ានជិតឈានមកដល់
នៅក្នុងសន្និបាតអប់រំរបស់សមាគមអតីតនិស្សិតអាហាររូបករណ៍សហរដ្ឋអាមេរិក(FUSAAC) មន្ត្រីជាន់ខ្ពស់ក្រសួងអប់រំ យុវជននិងកីឡាបានថ្លែងពីសារៈសំខាន់នៅក្នុងការសិក្សាជំនាញវិទ្យាសាស្ត្រ ស្របពេលដែលកម្ពុជានឹងឈានចូលសមាហរណកម្មអាស៊ានដ៏ខ្លីខាងមុខ។ទន្ទឹមគ្នានេះ ស្ថិតិចុងក្រោយបំផុតបង្ហាញថា ចំនួននិស្សិតដែលសិក្សាមុខជំនាញវិទ្យាសាស្ត្រ ដូចជាជំនាញបច្ចេកទេស វិស្វកម្មជាដើមនោះ មានចំនួនតែ៥ % ប៉ុណ្ណោះ។ (អត្ថបទដោយ សរ ពិសី)
ចុះផ្សាយនៅថ្ងៃ៖
ស្តាប់ - ០២:០១
រដ្ឋលេខាធិការ ក្រសួងអប់រំយុវជននិងកីឡា លោក យក់ ង៉ុយ នៅក្នុងសន្និបាតអប់រំនៃសមាគម FUSSAC លើកឡើងថា បញ្ហាប្រឈមចំបងរបស់កម្ពុជា សម្រាប់សមាហរណកម្មអាស៊ានខាងមុខនេះ មានចំនួនពីរ។ ទីមួយ គុណភាពនៃការអប់រំនៅមានកម្រិតបើទោះបីជាមានការប្រសើរឡើងច្រើនក៏ដោយ និង ទីពីរ បញ្ហាមិនស្របគ្នា រវាងការបណ្តុះបណ្តាលនឹងតម្រូវការទីផ្សារ។
លោក សង្កត់ធ្ងន់ថា នៅពេលសមាហរណកម្មអាស៊ានឈានមកដល់ បរិបទសង្គមនឹងផ្លាស់ប្តូរច្រើន ដែលតម្រូវឲ្យនិស្សិត ត្រូវចេះជំនាញបច្ចេកទេស ឬ វិទ្យាសាស្រ្តពិតច្រើន។ ផ្ទុយមកវិញ បច្ចុប្បន្ននិស្សិតកម្ពុជាភាគច្រើនសិក្សាតែមុខជំនាញវិទ្យាសាស្រ្តសង្គម ឬ ធុរកិច្ច ទៅវិញ។
ស្ថិតិចុងក្រោយនៅក្នុងឆ្នាំ ២០១៤ បង្ហាញថានិស្សិតកម្ពុជាបានសិក្សា រួមមាន និស្សិតដែលសិក្សាជំនាញ វិទ្យាសាស្រ្តមាន ៥% កសិកម្ម មាន៣% ព័ត៌មានវិទ្យា ៧% វិស្វកម្ម ៧% ទេសចរណ៍ ១% ច្បាប់ ១០% សុខាភិបាល ៤% ភាសា ១០% ដោយឡែក សេដ្ឋកិច្ច និង អាជីវកម្ម មានរហូតទៅដល់ ៤០% និង ជំនាញផ្សេងៗទៀត ចំនួន ២២%។
មិនខុសគ្នាប៉ុន្មានពី លោក យក់ ង៉ុយ លោកអគ្គរាជទូតសហរដ្ឋអាមេរិក លោកវីល្លីម ហៃដ្ត៍ បានបញ្ជាក់ថា ប្រទេសកម្ពុជា ពិតជាប្រឈមមុខនឹងបញ្ហាកង្វះនិស្សិតដែលមានជំនាញទាក់ទងនឹងវិទ្យាសាស្រ្តមែន ហើយ លោក ថា និស្សិតកម្ពុជា គួរតែងាកមកចាប់អារម្មណ៍លើការសិក្សាជំនាញបច្ចេកទេស ឬ វិទ្យាសាស្រ្តពិតវិញ ដើម្បីឆ្លើយតបនឹងតម្រូវការទីផ្សារនាពេលអនាគត។
គួរជម្រាបជូនថា កាលពីដំណាច់ឆ្នាំ ២០១៤ កន្លងទៅ ក្រសួងអប់រំ យុវជន និងកីឡា បានចេញសេចក្ដីជូនដំណឹងមួយ ស្ដីពីការផ្អាកផ្ដល់អាជ្ញាប័ណ្ណថ្មីដល់គ្រឹះស្ថានឧត្តមសិក្សាក្នុង ការបើកបង្រៀនជំនាញគ្រប់គ្រង គណនេយ្យ ធនាគារ និងហិរញ្ញវត្ថុ។
សេចក្ដីជូនដំណឹង បានបញ្ជាក់ថា ការផ្អាកជាបណ្ដោះអាសន្ននេះគឺធ្វើឡើង ដើម្បីជំរុញការអនុវត្តកំណែទម្រង់នៅថ្នាក់ឧត្តមសិក្សា ដើម្បីឆ្លើយតបនឹងតម្រូវការទីផ្សារការងារ និងការអភិវឌ្ឍសេដ្ឋកិច្ចនាពេលបច្ចុប្បន្ន។ និងដោយសារតែក្រសួងបានកត់សម្គាល់ឃើញថា «ការចុះឈ្មោះចូលរៀនរបស់និស្សិតនៅថ្នាក់ឧត្តមសិក្សាភាគច្រើនលើសលប់ តែងតែផ្ដោតលើវិស័យធុរកិច្ច»។
យ៉ាងណាក៏ដោយ លោក យក់ ង៉ុយ បានអះអាងថា បច្ចុប្បន្ននេះ ក្រសួងអប់រំ កំពុងបន្តផ្សព្វផ្សាយដល់សិស្សនិស្សិត ឱ្យងាកមកសិក្សាមុខជំនាញបច្ចេកទេសដែលទីផ្សារបច្ចុប្បន្នកំពុង ត្រូវការ ដោយរំពឹងថា នៅក្នុង ៤ ទៅ ៥ ឆ្នាំខាងមុខនេះ កម្ពុជានឹងអាចពង្រឹងគុណភាពអប់រំរបស់ខ្លួនពាក់ព័ន្ធនឹងជំនាញ បច្ចេកទេស និងវិទ្យាសាស្ត្រពិត និងអាចបណ្តុះបណ្តាលធនធានស្របតាមតម្រូវការទីផ្សារតាមរយៈការផ្តោត លើការបង្រៀនមុខវិជ្ជាវិទ្យាសាស្ត្រតាំងពីនៅមធ្យមសិក្សាបន្តពង្រឹង សមត្ថភាពគ្រូបង្រៀន និងកម្មវិធីសិក្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ