អាជ្ញាធរក្រុងជួបតំណាងសហគមន៍បុរីកីឡាដើម្បីឈានទៅបញ្ចប់ជម្លោះរ៉ាំរ៉ៃ
នៅព្រឹកថ្ងៃពុធទី១១វិច្ឆិកានេះអាជ្ញាធរក្រុងភ្នំពេញបានជួបប្រជុំជាមួយតំណាងសហគមន៍បុរីកីឡាដើម្បីឈានទៅបញ្ចប់ជម្លោះរ៉ាំរ៉ៃដែលបន្តអូសបន្លាយរយៈពេលបួនឆ្នាំមកហើយ ជាមួយក្រុមហ៊ុន ផាន អ៊ី ម៉ិច។ រហូតមកដល់ពេលនេះពលរដ្ឋដែលមិនទាន់ទទួលបានដំណោះស្រាយពីក្រុមហ៊ុននិងអាជ្ញាធរនៅសល់តែ១៥៤គ្រួសារទៀតប៉ុណ្ណោះ។ទាំងអាជ្ញាធរនិងតំណាងសហគមន៍អះអាងរួមគ្នាថាជម្លោះនឹងបញ្ចប់បើភាគីទាំងពីរឯកភាពគ្នាព្រមទទួលយកសំណងនិងសំណូមពរ។
ចុះផ្សាយនៅថ្ងៃ៖
ស្តាប់ - ០១:៥៤
លទ្ធផលនៃការជួបគ្នារវាងអាជ្ញាធរក្រុងភ្នំពេញតំណាងឲ្យក្រុមហ៊ុនផាន អ៊ី ម៉ិច និង តំណាងប្រជាពលរដ្ឋរងគ្រោះនៅសហគមន៍បុរីកីឡានឹងបង្ហាញនៅថ្ងៃសុក្រចុងសប្ដាហ៍នេះតាមរយៈការបិទផ្សាយជាសាធារណៈនៅសាលាខណ្ឌ៧មករាវេលាម៉ោង៧ព្រឹក។
លទ្ធផលនឹងតម្រូវឲ្យពលរដ្ឋដែលនៅសស់១៥៤គ្រួសារទៅរស់នៅលើទីតាំងកំណត់ដោយគណៈកម្មការរួមដែលសមាសភាពមកពីខាងអង្គការសង្គមស៊ីវិល សហគមន៍និងសាលារាជធានីភ្នំពេញតំណាងឲ្យក្រុមហ៊ុន។ នេះបើតាមការបញ្ជាក់របស់ លោក ស្រី ឆាយ គីមហ៊ន តំណាងសហគមន៍បុរីកីឡា។
លោកស្រី ឆាយ គីមហ៊ន បន្តថា ពលរដ្ឋ១៥៤គ្រួសារដែលទទួលបានសំណងពីអាជ្ញាធរចែកចេញជាបីក្រុមទី១-គឺអ្នកត្រូវទទួលផ្ទះពីក្រុមហ៊ុនមានចំនួន៣៥គ្រួសារ ២-អ្នកត្រូវទៅរស់នៅភូមិអណ្ដូងមានចំនួន៨៥គ្រួសារនិងគ្រួសារសេសសល់មួយចំនួនទៀតសម្រេចចិត្តទទួលសំណងបីពាន់ដុល្លារពីសាលារាជធានីភ្នំពេញជាថ្នូរនិងការចាកចេញទៅរស់នៅកន្លែងផ្សេង។
តែយ៉ាងណាក៏ដោយលោកស្រី ឆាយ គីមហ៊ន មិនប្រាដកថាពលរដ្ឋ១៥៤គ្រួសារព្រមទទួលសំណងតាមការកំណត់នេះទេ ព្រោះថាកន្លងមកការបិទប្រកាសបានធ្វើពលរដ្ឋតវ៉ាប្រឆាំងលទ្ធផលម្ដងរួចមកហើយ។ ជាពិសេសពលរដ្ឋដែលតម្រូវឲ្យទៅរស់នៅភូមិអណ្ដូង។ ភូមិអណ្ដូងគឺជាទីតាំងមួយដែលពលរដ្ឋសហគមន៍បុរីកីឡាមិនចង់ទៅរស់នៅដោយសារតែទំហំផ្ទះនិងកន្លែងរស់នៅដែលក្រុមហ៊ុនបានរៀបចំមានលក្ខណៈតូចចង្អៀត។
ចំណែកភាគី អាជ្ញាធរក្រុងតំណាងក្រុមហ៊ុន លោក មាន យ៉ាដា ឲ្យដឹងថាអាជ្ញាធរចង់បញ្ចប់បញ្ហានៅបុរីកីឡាឲ្យបានឆាប់ តាមរយៈការបិទប្រកាសជាសាធារណៈនៅថ្ងៃសុក្រខាងមុននេះ។ លោកបន្តថា ពលរដ្ឋ១៥៤គ្រួសារនឹងទទួលបានសំណងគ្រប់គ្នាហើយអាជ្ញាធរនឹងទុកពេល៣០ថ្ងៃដើម្បីឲ្យពលរដ្ឋមានសិទ្ធតវ៉ានិងរកភ័ស្ដុតាងបន្ថែម។សូមបញ្ជាក់ថា បញ្ហាសហគមន៍បុរីកីឡាកើតមានទំនាស់ជាមួយក្រុមហ៊ុនផាន អ៊ីម៉ិចតាំងពីឆ្នាំ២០១២និងបន្តអូសបន្លាយមកដល់ឆ្នាំ២០១៥នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ