លោក សម រង្ស៊ី សង្ឃឹមឈ្នះ៦២កៅអីតែបក្សកាន់អំណាចចំអកថា កំពុងយល់សប្តិ
ពីក្រៅប្រទេស និង តាមរយៈបណ្តាញសង្គមហ្វេសប៊ុកកាលពីល្ងាចម្សិលមិញ លោកសម រង្ស៊ី ប្រធានគណបក្សគណបក្សសង្គ្រោះជាតិ បានបង្ហាញពីក្តីរំពឹងរបស់ខ្លួនច្បាស់ជាងរាល់ដងថា គណបក្សប្រឆាំងរបស់លោកនឹងឈ្នះការបោះឆ្នោតយ៉ាងតិច៦២កៅអីនៅក្នុងរដ្ឋសភា។ ក៏ប៉ុន្តែអ្នកនាំពាក្យគណបក្សកាន់អំណាច បានចាត់ទុកថា វាគ្រាន់តែការយល់សុប្តិរបស់ប្រមុខគណបក្សប្រឆាំងមុនការបោះឆ្នោតតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៣១
“បើ គ.ជ.ប. ត្រឹមត្រូវជាងមុន យ៉ាងតិច ៦២ នាក់ ជាសមាជិកគណបក្សសង្គ្រោះជាតិ ដើម្បីនាំមកនូវការផ្លាស់ប្តូរដែលប្រជារាស្ត្រខ្មែរចង់បាន។ នេះគឺជាការរំពឹងទុករបស់លោកសម រង្ស៊ី សម្រាប់ការបោះឆ្នោតនៅក្នុងអាណត្តិទី៦ ដែលលោកបានបញ្ចេញឲ្យដឹងនៅលើទំព័រហ្វេសប៊ុកផ្លូវការរបស់ខ្លួនកាលពីថ្ងៃទី១៨ ធ្នូ។
លោកសម រង្ស៊ី ក៏បានបង្ហាញពីការកើនឡើងជាលំដាប់នៃចំនួនតំណាងរាស្ត្រប្រឆាំងរបបផ្តាច់ការនៅក្នុងរដ្ឋសភាខ្មែរតាំងពីអាណត្តិទី១ ដល់អាណត្តិទី៥នេះផងដែរ។ កំណើនតំណាង រាស្ត្រប្រឆាំងនៅក្នុងរដ្ឋសភាជាបន្តបន្ទាប់នេះ បានជំរុញឲ្យលោកសម រង្ស៊ី មានជំនឿថា គណបក្សលោកនឹងកើនចំនួនតំណាងរាស្ត្របន្ថែមទៀតនៅអាណត្តិក្រោយនេះ។
ជាមួយគ្នានេះ ប្រមុខគណបក្សប្រឆាំងកម្ពុជា ក៏មិនភ្លេចលើកឡើងនូវការបណ្តេញលោកចេញពីរដ្ឋសភាខ្មែរចំនួន៤លើកគឺនៅក្នុងឆ្នាំ១៩៩៥ នៅឆ្នាំ២០០៥ ឆ្នាំ២០១១ និង នៅក្នុងឆ្នាំ២០១៥នេះតែម្តង។
អ្នកនាំពាក្យគណបក្សប្រជាជនកម្ពុជា លោកសុខ ឥសាន បានប្រៀបធៀបក្តីរំពឹងរបស់លោកសម រង្ស៊ី ទៅនឹងការយល់សប្តិ និង ជាការទស្សទាយមុនការបោះឆ្នោតតែប៉ុណ្ណោះ។ សម្រាប់អ្នកនាំពាក្យរូបនេះ វាមិនមែនជារឿងថ្មីនោះទេ ដែលលោកសម រង្ស៊ី បានប្រកាសពីជ័យជម្នះមុនការបោះឆ្នោតមកដល់នោះ ព្រោះថា កន្លងមកលោក សម រង្ស៊ី តែងតែប្រកាសបែបនេះ មិនដែលខាន។
បើទោះបីគណបក្សប្រឆាំងតែងតែធ្វើបែបនេះក្តី ប៉ុន្តែសម្រាប់គណបក្សកាន់អំណាចវិញ លោកសុខ ឥសាន បានគូសបញ្ជាក់ថា គណបក្សប្រជាជនកម្ពុជាផ្តោតសំខាន់តែលើការកសាងគុណសម្បតិ្ត ស្នាដៃ និង អំពើល្អដល់ប្រជាពលរដ្ឋ ដើម្បីប្តូរនឹងសន្លឹកឆ្នោតសម្រាប់ការបោះឆ្នោតនាពេលខាងមុខ។
យ៉ាងណាក៏ដោយ លោកមាស នី អ្នកសិក្សាស្រាវជ្រាវ ដើម្បីការអភិវឌ្ឍសង្គម និងជាអ្នក តាមដានស្ថានការនយោបាយកម្ពុជា យល់ថា ដើម្បីសម្រេចបានដូចអ្វីដែលខ្លួនបានរំពឹងទុកនោះ លោកសម រង្ស៊ី ក៏ដូចគណបក្សសង្គ្រោះជាតិ ត្រូវធ្វើកិច្ចការជាច្រើនបន្ថែមទៀត ដូចជាការពង្រឹងប្រព័ន្ធគ្រប់គ្រងគណបក្ស និង ការពារការបំបែកបំបាក់ពីគូរប្រកួតជាដើម។ បន្ថែមលើនេះ លោកក៏មើលឃើញថា វត្តមានរបស់លោកសម រង្ស៊ី មកដឹកនាំគណបក្សវិញ នឹងជាកត្តាល្អបន្ថែមទៀតសម្រាប់ឈានរកការសម្រេចក្តីរំពឹងនោះ។
លោកសម រង្ស៊ី ដែលកំពុងស្ថិតនៅឯប្រទេសបារាំង បន្ទាប់ពីរងដីកាចាប់ខ្លួន និង ឲ្យចូលខ្លួនមកបំភ្លឺជាបន្តបន្ទាប់ពីតុលាការក្រុងភ្នំពេញនោះ បានប្រាប់បណ្តេញសារព័ត៌មានមួយថា លោកនឹងមានវត្តមាននៅក្នុងប្រទេសកម្ពុជាវិញនៅក្នុងអំឡុងពេលនៃ ការឃោសនា បោះឆ្នោត។ លោកសម រង្ស៊ី បានសង្កត់ធ្ងន់ពីសារសំខាន់នៃវត្តមានរបស់លោកនៅក្នុងការបោះឆ្នោត ដោយបានបញ្ជាក់ថា បើការបោះឆ្នោតដែលគ្មានប្រធានគណបក្សប្រឆាំងចូលរួម នោះការបោះឆ្នោតនឹងគ្មានតម្លៃ អត់ន័យ និង គ្មានអ្នកណាទទួលស្គាល់នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ