កម្ពជា

អភិបាលខេត្តកំពត៖បុណ្យសមុទ្រឆ្នាំនេះអាជ្ញាធរគ្រប់គ្រងបានការមិនឡើងថ្លៃអាហារនិងផ្ទះសំណាក់

ពិធីបុណ្យសមុទ្រនៅឆ្នាំនេះអភិបាលខេត្តកំពតលោក ខូយ ឃុនហួរ អះអាងថា ថ្លៃអាហារនិងការស្នាក់នៅស្ថិតក្នុងតម្លៃមួយសមរម្យដែលលោកជឿថាពលរដ្ឋទូទៅអាចទទួលយកបាន។ ទន្ទឹមគ្នានេះតាមការរំពឹងទុកសម្រាប់ថ្ងៃទី២នៃពិធីបុណ្យសមុទ្រលោកអភិបាលខេត្តថា នឹងទទួលបានភ្ញៀវទេសចរយ៉ាងតិចមិនក្រោម១០ម៉ឺននាក់។

ចុះផ្សាយនៅថ្ងៃ៖ 12/12/2015 - 07:19

ដោយ៖ អេង គីមហុង

ផ្សាយពាណិជ្ជកម្ម

ការអះអាងរបស់ លោក ខូយ ឃុនហួរ អភិបាលខេត្តកំពតបន្ទាប់ពីលោកបានចុះទៅដល់កន្លែងលក់ម្ហូបអាហារ ដោយផ្ទាល់និងសួរនាំបន្តទៅកាន់ភ្ញៀវទេសចរអំពីតម្លៃអាហារគឺពួកគេពេញចិត្តតម្លៃនេះគឺអាហារមួយពេលសម្រាប់មនុស្សម្នាក់១ដុល្លារ។ លោកអភិបាលខេត្តចាត់ទុកតម្លៃអាហារមួយពេល១ដុល្លារជាតម្លៃមួយសមររម្យដូចថ្ងៃធម្មតា ដែលពលរដ្ឋទូទៅអាចទទួលយកបាននៅក្នុងឱកាសបុណ្យសមុទ្ររយៈពេលបីថ្ងៃនេះ។

ចំពោះតម្លៃនៃកន្លែងស្នាក់នៅវិញដូចជាផ្ទះសំណាក់និងសណ្ឋាគារជាដើមនោះលោក ខូយ ឃុនហួរ ថាមានការដំឡើងថ្លៃតិចតួចប៉ុណ្ណោះចន្លោះពី១០ទៅ២០ភាគរយ។
បើតាមលោក ខូយ ឃុនហួរ អាជ្ញាធរគ្រប់គ្រងបានការមិនដំឡើងថ្លៃហួសហេតុចំពោះម្ហូបអាហារនិងកន្លែងស្នាក់នៅ។ ម្យ៉ាងទៀតទាំងអាហារនិងកន្លែងនៅក៏បានផ្គត់ផ្គង់គ្រប់គ្រាន់ជូនភ្ញៀវដែលមកទស្សនាក្នុងឱកាសបុណ្យសមុទ្រនេះ។

សម្រាប់ចំនួនភ្ញៀវទេសចរជាតិ និង អន្តរជាតិដែលមកកំសាន្តក្នុងឱកាសនេះមានចំនួនជិត១០ម៉ឺននាក់បើគិតត្រឹមថ្ងៃទី១០ដល់១១ធ្នូ។ ហើយនៅថ្ងៃទី២នៃពិធីបុណ្យសមុទ្រយ៉ាងហោចណាស់ក៏មានភ្ញៀវទេសចរចូលរួមមិនក្រោម១០ម៉ឺននាក់ដែរ។ ព្រោះនៅល្ងាចថ្ងៃសៅរិ៍ទី១២ធ្នូមានការបើកកម្មវិធីស្ដីពីបុណ្យសមុទ្រលើកទី០៤ក្រោមអធិបតីភាពលោក សុខ អាន រដ្ឋមន្ត្រីទទួលបន្ទុកទីស្ដីការគណៈរដ្ឋមន្រ្តីនិងជាតំណាងរបស់ លោកនាយករដ្ឋមន្ត្រី ហ៊ុន សែន ។ នេះជាការបន្ថែមរបស់លោកអភិបាលខេត្ត។

ជាមួយគ្នានេះលោក វ៉ាត់ ចំរើន អគ្គលេខាជាតិអូឡាំពិកកម្ពុជាដែលកំពុងមានវត្តមាននៅទីនោះស្រាប់ឲ្យដឹងថា ថ្ងៃទី០២នៃពិធីបុណ្យសមុទ្រនេះមានកម្មវិធីកំសាន្តជាលក្ខណៈប្រកួតប្រជែងជាច្រើនដូចជា៖ការប្រណាំងទូក កីឡារត់ប្រណាំង ការបោកចំបាប់ ការប្រកួតក្បាច់គុណបុរាណខ្មែរនិងការប្រកួតស្វែងរកស្ដេចអុកប្រចាំខេត្តកំពតជាដើម។
សូមបញ្ជាក់ថា នេះជាឆ្នាំទី៤ហើយដែលរដ្ឋាភិបាលរៀបចំពិធីបុណ្យសមុទ្រនេះឡើងក្នុងគោលបំណងផ្សព្វផ្សាយពីសក្ដានុពលទេសចរណ៍របស់កម្ពុជាទៅកាន់ពិភពលោក៕