ខេត្តកំពតត្រៀមខ្លួនរួចជាស្រេចសម្រាប់បុណ្យសមុទ្រឆ្នាំនេះ
នៅសល់តែ៣ថ្ងៃទៀតតែប៉ុណ្ណោះ ពិធីបុណ្យសមុទ្រលើកទី៤របស់កម្ពុជា នឹងត្រូវប្រារព្ធធ្វើឡើងនៅខេត្តកំពត។ រហូតមកទល់ពេលនេះ ខេត្តកំពតបានរៀបចំ និងត្រៀមខ្លួនរួចជាស្រេចហើយ ដើម្បីប្រារព្ធពិធីបុណ្យប្រចាំឆ្នាំមួយនេះ។អត្តបទដោយ៖ ឃុត សុខឿន
ចុះផ្សាយនៅថ្ងៃ៖
ស្តាប់ - ០១:២៨
ពិធីនេះ នឹងត្រូវប្រារព្ធធ្វើឡើង តាមបណ្តោយមាត់ព្រែកកំពង់បាយ ក្នុងទីរួមខេត្តកំពត ចាប់ពីថ្ងៃទី ១១ ដល់ថ្ងៃទី ១៣ ធ្នូ។ នេះបើតាមប្រសាសន៍របស់លោក ខូយ ឃុនហួរ អភិបាល នៃគណៈអភិបាលខេត្តកំពត និងជាអនុប្រធានគណកម្មការរៀបចំបុណ្យសមុទ្រលើកទី៤នេះ។
ដោយធ្វើអោយប្លែកពីបុណ្យសមុទ្រមុនៗ គណកម្មការរៀបចំបុណ្យសមុទ្រលើកទី៤នេះ នឹងរៀបចំធ្វើពិធីមួយចំនួននិងការប្រគុំតន្ត្រីនៅលើទឹក ហើយក៏មានការតុបតែងលំអរជារូបភាពផ្សេងៗ ដោយភ្លើងចម្រុះពណ៌នៅលើទឹកផងដែរ។
ជាមួយគ្នានេះ កីឡាលើទឹក និងលើគោក ចំនួន១២ ប្រភេទ ត្រូវបានគេយកទៅប្រកួត និង សម្តែង ក្នុងពិធីបុណ្យសមុទ្រឆ្នាំនេះ។ ក្រៅពីតែពីការលេងល្បែង និងការកម្សាន្តសម្រាប់មនុស្សវ័យក្មេង ក៏នឹងមានការសម្តែងសិល្បៈយីកេ សម្រាប់ទស្សនិកជនវ័យចាស់ផងដែរ។
ស្រះទឹកបុរាណក្នុងទីរួមខេត្ត នឹងត្រូវសម្ពោធដាក់ ជាតំបន់រមណីយដ្ឋានសម្រាប់ភ្ញៀវទេសចរណ៍ ក្នុងឱកាសបុណ្យសមុទ្រនេះដែរ។
លោកអនុប្រធានគណកម្មការរៀបចំបុណ្យសមុទ្រលើកទី៤នេះ បានអោយដឹងថា ខេត្តកំពតបានត្រៀមកងកម្លាំងមានសមត្ថកិច្ចប្រមាណ៣ពាន់នាក់ ដើម្បីថែរក្សាសណ្តាប់ធ្នាប់និងសុវត្ថិភាព ជូនភ្ញៀវទេសចរណ៍។
លោកខូយ ឃុនហួរ សង្ឃឹមថា ភ្ញៀវទេសចរណ៍ចំនួនជាង ១០ម៉ឺននាក់ និងមកចូលរួមបុណ្យសមុទ្រ។ លោកបន្តថា ខេត្តកំពត បានត្រៀមសណ្ឋាគារ និងផ្ទះសំណាក់ ជាង២ពាន់បន្ទប់ និង ម្ហូបអាហារដែលមានតម្លៃសមរម្យជូនភ្ញៀវទេសចរណ៍ជាតិ និងអន្តរជាតិ រួចរាល់ហើយផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ