សហភាពសហជីពកម្ពុជានឹងបញ្ចាំងវីដេអូឯកសារស្តីពីឃាតកម្មលើជា វិជ្ជា
បើទោះជាអាជ្ញាធររាជធានីភ្នំពេញមិនអនុញ្ញាតអោយ សហភាពសហជីពកម្ពុជាបញ្ចាំងវីដេអូឯកសារ រឿង"តើអ្នកណាសម្លាប់លោក ជា វិជ្ជា” ក៏ដោយ លោករ៉ុង ឈុនប្រធានសហភាពសហជីពកម្ពុជាបានថ្លែង នៅថ្ងៃ នេះថា លោកនឹងនៅតែរៀបចំដាក់បញ្ចាំងវីដេអូឯកសារនេះដដែល។ក្នុងឱកាសទិវាពលកម្មអន្តរជាតិលើកទី១២៤ នៅ ថ្ងៃទី១ឧសភាស្អែក សហភាពសហជីពកម្ពុជាគ្រោងនឹងដង្ហែរក្បួនដាក់កម្រងផ្កាអោយលោក ជា វិជ្ជានៅពេលព្រឹក ហើយពេលល្ងាចពួកគេនឹងរៀបចំដាក់បញ្ចាំងវីដេអូឯកសារស្តីពីឃាតកម្ម លើលោកជា វិជ្ជានោះ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់លាង ដឺលុចពីទីក្រុងភ្នំពេញ
យោងតាមការអះអាងរបស់លោករ៉ុង ឈុន ប្រធានសហភាពសហជីពកម្ពុជា លោក និងសហការីរបស់លោកត្រូវតែដាក់បញ្ចាំងវីដេអូឯកសារនេះ ដើម្បីទី១ អោយសាធារណជនបានដឹងពីទិដ្ឋភាពនៃឃាតកម្មលើលោក ជា វិជ្ជា អតីតមិត្តរួមអាជីពរបស់លោក។ ទី២គឺ ដើម្បីជម្រុញអោយអាជ្ញាធរមានសមត្ថកិច្ច បង្កើនការស៊ើបអង្កេតវែកមុខរកឃាតករពិតប្រាកដដែលសម្លាប់លោក ជា វិជ្ជានោះអោយឃើញ ក៏ដូចជាបង្កើនការស៊ើបអង្កេតទៅលើករណីឃាតកម្មមុនៗផ្សេងទៀតផងដែរ។
លោករ៉ុង ឈុនបានថ្លែងយ៉ាងច្បាស់ថា លោកនឹងមិនផ្លាស់ប្តូរជំហរទេ។ បានន័យថា ពេលព្រឹកលោកនឹងដឹកនាំដង្ហែរក្បួនបាតុកម្មជាមួយមនុស្សយ៉ាងតិច២០០នាក់ ដើម្បីអបអរទិវាពលកម្មអន្តរជាតិ ដោយការដង្ហែរក្បួននេះនឹងនាំយកញត្តិទៅដាក់នៅរដ្ឋសភា។ ក្នុងញត្តិនោះ ពួកគេទាមទារអោយដំឡើងប្រាក់ខែកម្មករ លក្ខខណ្ឌការងារប្រសើរ និងផ្តល់ងារជាវីរៈកម្មករដល់លោក ជា វិជ្ជា។ បន្ទាប់មកគឺដង្ហែរក្បួនទៅដាក់កម្រងផ្ការំលឹកវិញ្ញាណក្ខន្ធលោក ជា វិជ្ជា នៅកន្លែងដែលលោកជា វិជ្ជាត្រូវឃាតករបាញ់សម្លាប់។ គឺនៅតូបលក់កាសែតមួយក្រោយវត្តលង្កា។ សូមបញ្ជាក់ថា ការដើរក្បួននៅពេលព្រឹក គឺខាងអាជ្ញាធរបានយល់ព្រមអនុញ្ញាតហើយ។
ចំនែកឯការរៀបចំបញ្ចាំងខ្សែវីដេអូឯកសារស្តីពីការសម្លាប់លោក ជា វិជ្ជាដែលអាជ្ញាធរមិនអនុញ្ញាតនោះ លោករ៉ុង ឈុនត្រូវរៀបចំធ្វើនៅម៉ោងប្រហែល៥កន្លះល្ងាចថ្ងៃ សៅរ៍ ទី ១ឧសភា នៅក្រោយវត្តលង្កា គឺកន្លែងគេសម្លាប់លោក ជា វិជ្ជាតែម្តង។ លោក រ៉ុង ឈុនថ្លែងថា លោកនឹងនៅតែរៀបចំបញ្ចាំងឯកសារនេះមិនផ្លាស់ប្តូរទេ។ ហើយបើប៉ូលីសបង្ក្រាបយ៉ាងណានោះ ចាំមើលពេលនោះជាក់ស្តែងតែម្តង។
រីឯ ប៉ូលីសក៏ឆ្លើយតបបែបឌឺដងទៅវិញថា បើលោក រ៉ុង ឈុនរឹង លោករ៉ុង ឈុនសាកមើលទៅ។ ស្នងការនគរបាលរាជធានី លោកឧត្តមសេនីយ ទូច ណារុថបានបញ្ជាក់ច្បាស់ហើយថា បើលោក រ៉ុង ឈុននៅតែបញ្ចាំងនោះ គឺបានន័យថា លោករ៉ុង ឈុនល្មើសច្បាប់។ លោកស្នងការរាជធានីបានលើកយកហេតុផលមកបញ្ជាក់ម្តងទៀតដែលថា វីដេអូឯកសារនោះមិនមានទិដ្ឋាការអនុញ្ញាតត្រឹមត្រូវទេ។ ដូច្នេះលោកនឹងមិនអនុញ្ញាតឡើយ។
បើម្ខាងៗនៅតែច្បាស់លាស់លើជំហររៀងៗខ្លួននោះ វាក៏ច្បាស់លាស់ដែរដែលថា ការប៉ះទង្គិចគ្នានឹងកើតមានឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ