កម្ពុជានឹងធ្វើសមយុទ្ធ២ទៀតជាមួយកងទ័ពអាមេរិក
យោធាកម្ពុជាកំពុងត្រៀមរៀបចំសមយុទ្ធចំនួន២ទៀតជាមួយកងទ័ព សហរដ្ឋអាមេរិក ដែលសមយុទ្ធទីមួយនេះនឹងចាប់ផ្តើមនៅចុងសប្តាហ៍នេះ ហើយសមយុទ្ធទី២ នឹងប្រព្រឹត្តទៅនៅក្នុងខែឧសភា។ អ្នកនាំពាក្យក្រសួងការពារជាតិ លោកឧត្តមសេនីយឯកឈុំ សុជាតិបានបញ្ជាក់ថា សមយុទ្ធទាំងពីរលើកនៅពេលខាងមុខ ដែលមួយលើកៗមានយោធាសរុប៥០០នាក់នោះ គឺជាសមយុទ្ធផ្នែកមនុស្សធម៌។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
ក្រុមយោធាកម្ពុជានិងធ្វើសមយុទ្ធជាមួយកងទ័ពអាមេរិកចំនួន២លើក នៅក្នុងពេលខាងមុខនេះ។ សមយុទ្ធមួយលើកៗនឹងមានយោធាសរុបនៃប្រទេសទាំង២ចូលរួមចំនួន៥០០នាក់ នេះបើតាមការអះអាងរបស់លោកឧត្តមសេនីយឯក ឈុំ សុជាតិ អ្នកនាំពាក្យរបស់ក្រសួងការពារជាតិកម្ពុជា។ លោក ឈុំ សុជាតិបញ្ជាក់ថា សមយុទ្ធទាំងពីរលើកនេះ គឺជាសមយុទ្ធហ្វឹកហាត់បែបជួយសង្គ្រោះ ឬសមយុទ្ធផ្នែកមនុស្សធម៌។
អ្នកនាំពាក្យយោធារូបនេះបានបន្តថា សមយុទ្ធទីមួយនឹងចាប់ផ្តើមនៅចុងសប្តាហ៍នេះហើយ ចាប់ពីថ្ងៃទី២៧កុម្ភៈ ដល់ថ្ងៃទី២មីនា។ សមយុទ្ធនេះនឹងមានការចូលរួមពីកំលាំងយោធាកម្ពុជា៤ក្រុមមកពីកងពលលេខ៣១ កងរាជអាវុធហត្ថ កងរក្សាសន្តិភាព និងកងទ័ពជើងទឹក។ សមយុទ្ធរយៈពេល៤ថ្ងៃនេះនឹងត្រូវរៀបចំធ្វើនៅទីបញ្ជាការកងទ័ពជើងទឹក រាម ខេត្តព្រះសីហនុ នៅតំបន់ពេជនិល នៅទីបញ្ជាការដ្ឋានទ័ពព្រៃ និងនៅទីបញ្ជាការដ្ឋាន A C O។ លោកឧត្តមសេនីយឈុំ សុជាតិថ្លែងថា ក្នុងសមយុទ្ធនេះ កងកំលាំងកម្ពុជានឹងហ្វឹកហាត់ជាមួយកងម៉ារីនរបស់អាមេរិក។
ចំណែកឯសមយុទ្ធលើកទី២នោះគឺជាសមយុទ្ធដែលមានឈ្មោះថា ឆ្មាំអង្គរ ដែលកម្ពុជានិងអាមេរិកបានរៀបចំធ្វើទ្រង់ទ្រាយធំកាលពីឆ្នាំកន្លងទៅរួចម្តងហើយ ហើយដែលកាលណោះមានប្រទេសចូលរួមមិនតិចជាង២០ប្រទេសនោះទេ។ សមយុទ្ធឆ្មាំអង្គរ២០១១នេះ គ្រោងនឹងប្រព្រឹត្តទៅពីថ្ងៃទី១៦ដល់ថ្ងៃទី២៧ខែឧសភា ដោយមានការចូលរួមពីយោធានៃប្រទេសម៉ុងហ្គោលី និងឥណ្ឌូនេស៊ី។ អ្នកនាំពាក្យយោធាកម្ពុជាបានប្រាប់អោយដឹងថា សមយុទ្ធមួយនេះ យោធាកម្ពុជានឹងហ្វឹកហាត់ជាមួយកងទ័ពជើងគោកអាមេរិកមកពីរដ្ឋហាវ៉ៃ ហើយដែលកម្មវិធីហ្វឹកហាត់មានផ្នែកវិស្វកម្ម ការជួយសង្គ្រោះ ការដឹកជញ្ជូនជាដើម។
លោកឧត្តមសេនីយឯកឈុំ សុជាតិបានបញ្ជាក់ថា បើទោះជាសមយុទ្ធនៅកម្ពុជាទាំងពីរលើកនេះ ប្រព្រឹត្តទៅក្រោយការធ្វើសមយុទ្ធគ្រាប់ពិតរវាងអាមេរិកនិងថៃក្នុងពេលថ្មីៗនេះក៏ដោយ សមយុទ្ធនៅកម្ពុជាគឺជាសមយុទ្ធហ្វឹកហាត់រក្សាសន្តិភាព ហើយថាវាមិនមានពាក់ព័ន្ធអ្វីនឹងសមយុទ្ធពស់វែកមាសរបស់ថៃ និងភាពតានតឹងនៅព្រំដែនកម្ពុជាថៃនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ