កម្ពុជាផ្ញើឯកសារជនភៀសសឹកទៅតុលាការឡាអេ
ក្រោយពីបានស្តាប់ទឡ្ហីករណ៍របស់ភាគីជម្លោះទាំងពីរ តុលាការយុត្តិធម៌អន្តរជាតិបានស្នើអោយភាគីទាំងពីរផ្ញើឯកសារបន្ថែមទៅអោយក្រុមចៅក្រម។ កម្ពុជាបានផ្ញើឯកសារបន្ថែមស្តីអំពីស្ថានភាពជនភៀសសឹកនៅពេលដែលទ័ពទាំងពីរកំពុងប្រយុទ្ធគ្នា កាលពីចុងខែមេសា។មន្ត្រីរដ្ឋាភិបាលកម្ពុជាមិនធ្វើអត្ថាធិប្បាយអ្វី នៅអំឡុងពេលដែលត្រូវរង់ចាំសេចក្តីសម្រេចរបស់តុលាការនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
អ្នកនាំពាក្យក្រសួងការបរទេសកម្ពុជាលោកកុយ គួងបានអះអាងអោយដឹងថា កម្ពុជាបានផ្ញើឯកសារបន្ថែមទៅតុលាការយុត្តិធម៌អន្តរជាតិឡាអេរួចហើយកាលពីថ្ងៃទី៧មិថុនាម្សិលមិញ។ នេះជាការអនុវត្តន៍តាមសំណើរបស់តុលាការអន្តរជាតិមួយនេះ ដែលបានស្នើអោយកម្ពុជាផ្ញើឯកសារដែលបង្ហាញអំពីស្ថានភាពនៃជនភៀសសឹក ក្នុងខណៈពេលដែលកងទ័ពទាំងពីរកំពុងផ្ទុះអាវុធដាក់គ្នាលើកចុងក្រោយកាលពីចុងខែមេសានោះ។
អ្នកនាំពាក្យក្រសួងការបរទេសកម្ពុជាបានបញ្ជាក់ថា តុលាការអន្តរជាតិក្រុងឡាអេចង់ដឹងថាជនភៀសសឹកកម្ពុជាទាំងនោះបានផ្លាស់ទី ពីទីណាដល់ទីណា ហើយថាប្រជាជនភៀសសឹកទាំងនោះដែលរស់នៅទីតាំងដើមនោះ ពួកគេបានរស់នៅតាំងពីពេលណា?
ទោះយ៉ាងណាក្តី លោកកុយ គួងមិនបានធ្វើអត្ថាធិប្បាយអ្វីផ្សេងពីនេះ ក្នុងខណៈពេលដែលភាគីទាំងពីរ កម្ពុជាថៃ កំពុងរង់ចាំសេចក្តីសម្រេចរបស់តុលាការឡាអេនោះឡើយ។ គួរបញ្ជាក់ថា តុលាការយុត្តិធម៌អន្តរជាតិកំពុងពិចារណាលើបណ្តឹងមួយរបស់កម្ពុជាដែលទាមទារអោយថៃដកកងទ័ពខ្លួនចេញពីតំបន់ប្រាសាទព្រះវិហារ។ តុលាការនេះបានបើកសវនាការជាសាធារណៈដើម្បីស្តាប់ទឡ្ហីករណ៍ផ្ទាល់មាត់របស់ភាគីកម្ពុជាជាដើមបណ្តឹង និងរបស់រដ្ឋាភិបាលថៃ។
លោកនាយករដ្ឋមន្ត្រីខ្មែរហ៊ុន សែនទើបតែបានប្រកាសមិនអោយមន្ត្រីរបស់លោកធ្វើអត្ថាធិប្បាយទាក់ទងនឹងសំណុំរឿងដែលនៅក្នុងយុត្តាធិការតុលាការឡាអេនេះទេ។ ប៉ុន្តែប្រមុខយោធាថៃវិញ បានសម្តែងមតិប្រឆាំងតុលាការឡាអេរួចហើយ។ រដ្ឋមន្ត្រីការពារជាតិថៃ លោកប្រាវីត វុងស៊ូវុនបាននិយាយថា តុលាការយុត្តិធម៌អន្តរជាតិ គ្មានអំណាចដើម្បីចេញបញ្ជាអោយថៃដកកងទ័ពចេញពីតំបន់ព្រំដែន ក្បែរប្រាសាទព្រះវិហារនោះទេ។ ហើយថា ប្រទេសថៃក៏នឹងមិនធ្វើតាមនោះដែរ ប្រសិនបើមានសេចក្តីសម្រេចបែបនោះមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ