រដ្ឋសភា ផ្តល់សច្ចាប័នលើអនុសញ្ញាព្រំដែនរួមកម្ពុជា ឡាវ និងវៀតណាម
នៅព្រឹកថ្ងៃ១៦មិថុនានេះ អ្នកតំណាងរាស្ត្រ ៨៣ រូប ក្នុងចំណោមអ្នកតំណាងរាស្ត្រ ១០០ រូប ដែលមានវត្តមានក្នុងកិច្ចប្រជុំរដ្ឋសភា បានលើកដៃអនុម័តលើសេចក្តីព្រាងច្បាប់ ស្តីពី ការអនុម័តយល់ព្រមលើអនុសញ្ញារវាងប្រទេសកម្ពុជា ឡាវ និងវៀតណាម ស្តីពី ការកំណត់ចំណុចប្រសព្វនៃខ្សែព្រំដែនប្រទេសទាំងបី។
ចុះផ្សាយនៅថ្ងៃ៖
អនុសញ្ញា ដែលរដ្ឋាភិបាលកម្ពុជា វៀតណាម និងរដ្ឋាភិបាលឡាវ បានព្រមព្រៀងគ្នា កាលពីឆ្នាំ២០០៨ ដើម្បីបោះបង្គោលព្រំដែន នៅតំបន់កន្ទុយនាគ ក្នុងខេត្តរតនៈគិរី ដើម្បីពង្រឹងបន្ថែមនូវទំនាក់ទំនងមិត្តភាពរវាងប្រទេសទាំងបី និងដើម្បីរៀបចំបង្កើតតំបន់ត្រីកោណមួយ ជាតំបន់សន្តិភាព មិត្តភាព និងសហប្រតិបត្តិការយូរអង្វែង។
យ៉ាងណាក៏ដោយ សមាជិករដ្ឋសភាមកពីគណបក្សសមរង្ស៊ី ដែលមានវត្តមានក្នុងកិច្ចប្រជុំរដ្ឋសភានៅព្រឹកមិញ មិនបានលើកដៃគាំទ្រច្បាប់នេះទេ។ រីឯតំណាងរាស្ត្រ ៣ រូប របស់គណបក្សសិទ្ធិមនុស្ស បានធ្វើពហិការ មិនចូលរួមប្រជុំ។
ក្នុងកិច្ចប្រជុំនៅព្រឹកមិញ រដ្ឋសភាក៏បានអនុម័តលើច្បាប់ស្តីពីការធានាទូទាត់របស់រដ្ឋាភិបាលកម្ពុជា ឲ្យក្រុមហ៊ុន Cambodia International Investment Development Group ដើម្បីសាងសង់រោងចក្រផលិតអគ្គិសនី ដោយប្រើប្រាស់ធ្យូងថ្ម នៅខេត្តព្រះសីហនុ។
គម្រោង ដែលប្រើប្រាស់ទឹកប្រាក់ ៣៦២លានដុល្លារនោះ មិនត្រូវបានគាំទ្រដោយគណបក្សសមរង្ស៊ីទេ។ អ្នកតំណាងរាស្ត្រគណបក្សប្រឆាំងនេះ បានដើរចេញពីកិច្ចប្រជុំរដ្ឋសភា ដោយសារថា ក្រុមហ៊ុនផលិតអគ្គិសនីដោយប្រើធ្យូងថ្មនេះ ជារបស់លោកឧកញ៉ា ឡៅ ម៉េងឃិន សមាជិកព្រឹទ្ធសភាគណបក្សប្រជាជនកម្ពុជា ដែលជាប់ពាក់ព័ន្ធនឹងការអភិវឌ្ឍន៍នៅតំបន់បឹងកក់ដ៏ចម្រូងចម្រាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ