ការដកកងទ័ពពីព្រំដែនប្រាសាទព្រះវិហារអាចប្រព្រឹត្តទៅក្រោយការមកដល់នៃអ្នកសង្កេតការណ៍
ក្រោយពីសេចក្តីសម្រេចរបស់តុលាការយុត្តិធម៌អន្តរជាតិ គឺការអនុវត្តន៍សាលក្រមមួយនេះ នោះគឺការដកកងទ័ព។ នៅពេលនេះ ប្រទេសទាំងពីរនៅមិនទាន់បង្ហាញអំពីនីតិវិធីនៃការដកកងទ័ពនោះយ៉ាងណានៅឡើយទេ។ ប៉ុន្តែអ្នកនាំពាក្យក្រសួងការពារជាតិអះអាងថា ការដកទ័ពទំនងជាមិនអាចធ្វើឡើងមុនការមកដល់នៃអ្នកសង្កេតការណ៍ ឥណ្ឌូនេស៊ីនោះឡើយ។ កម្ពុជាវិញបានធ្វើលិខិតជំរាបទៅប្រធានអាស៊ានអំពីខ្លឹមសាររបស់ សាលក្រមដែលជំរុញអោយកម្ពុជាថៃបន្តសហប្រតិបត្តិការដើម្បីទទួលយកអ្នក សង្កេតការណ៍ឥណ្ឌូនេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
អ្នកនាំពាក្យយោធា ឧត្តមសេនីយឯកឈុំ សុជាតិថ្លែងនៅថ្ងៃនេះថា កងទ័ពកម្ពុជាគឺជាកងទ័ពស៊ីវីល័យ ថ្លៃថ្នូរ និងគោរពច្បាប់។ ប៉ុន្តែការដកកងទ័ពចេញពីតំបន់ប្រាសាទព្រះវិហារនោះ ក៏មិនត្រូវចេះតែធ្វើភ្លាមៗដោយគ្មានការដឹងលឺពីអន្តរជាតិនោះដែរ។ អ្នកនាំពាក្យក្រសួងការពារជាតិបានប្រាប់វិទ្យុបារាំងអន្តរជាតិថា តាមយោបល់របស់លោក លុះត្រាតែអ្នកសង្កេតការណ៍ឥណ្ឌូនេស៊ីមកដល់តំបន់ព្រំដែនជាមុនសិន ទើបកម្ពុជាអាចដកកងទ័ពចេញពីតំបន់ប្រាសាទព្រះវិហារនោះ។ ហើយថា ប្រសិនបើកម្ពុជានិងថៃត្រូវជួបគ្នាដើម្បីនិយាយអំពីការដកកងទ័ពមែននោះ ការជួបគ្នានេះក៏ត្រូវតែធ្វើតាមយន្តការចាស់ នោះគឺការជួបគ្នាក្រោមវត្តមាន ឬការដឹងលឺពីភាគីទី៣គឺអាស៊ាន។
ក្រោយពីទទួលបានសេចក្តីសម្រេចរបស់តុលាការហើយនោះ កម្ពុជាមិនបាននៅស្ងៀមឡើយកាលពីថ្ងៃម្សិលមិញ។ រដ្ឋមន្ត្រីក្រសួងការបរទេសកម្ពុជាលោកហោ ណាំហុងបានធ្វើលិខិតទៅរដ្ឋមន្ត្រីការបរទេសឥណ្ឌូនេស៊ីដែលជាប្រធានអាស៊ានដើម្បីជូនដំណឹងអំពីបញ្ជាមួយរបស់តុលាការ អោយកម្ពុជានិងថៃបន្តសហការជាមួយអាស៊ានស្តីអំពីការទទួលយកអ្នកសង្កេតការណ៍ឥណ្ឌូនេស៊ី។ អ្នកនាំពាក្យក្រសួងការបរទេសបានបញ្ជាក់ថា កម្ពុជាចង់អោយឥណ្ឌូនេស៊ីរៀបចំការបញ្ជូនអ្នកសង្កេតការណ៍អោយបានកាន់តែឆាប់កាន់តែល្អ។
ការដកកងទ័ពចេញពីតំបន់ព្រំដែនប្រាសាទព្រះវិហារទំនងជាមិនមែនជាបញ្ហាសម្រាប់កម្ពុជានោះឡើយ។ ដើមឡើយកម្ពុជាក៏មិនដែលដាក់ពង្រាយកងទ័ពនៅតាមតំបន់ព្រំដែនប្រាសាទព្រះវិហារនោះ ក្រៅពីប៉ូលិសព្រំដែន និងឆ្មាំរក្សាប្រាសាទព្រះវិហារនោះ។ លោកឧត្តមសេនីយឯកឈុំ សុជាតិបានពន្យល់ថា ទី១ កម្ពុជាត្រូវដាក់កងទ័ពនៅតាមតំបន់មួយចំនួន បន្ទាប់ពីមានការឈ្លានពានពីកងទ័ពថៃចូលក្នុងទឹកដីកម្ពុជា។ ទី២ វត្តមានរបស់កងទ័ពកម្ពុជានៅទីនោះ គឺដើម្បីប្រឆាំងទាហានថៃដែលរារាំងមិនអោយកម្ពុជាឡើងទៅប្រាសាទព្រះវិហារ និងទី៣ វត្តមានកងទ័ពកម្ពុជាគឺដើម្បីធានាសន្តិសុខជូនដល់ព្រះសង្ឃ និងប្រជាពលរដ្ឋដែលរស់នៅក្បែរជើងប្រាសាទព្រះវិហារនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ