កម្ពុជាផ្ញើសេចក្តីព្រាងស្តីពីភារកិច្ចអ្នកសង្កេតការណ៍ទៅប្រធានអាស៊ាន
កម្ពុជាបានតាក់តែងនិងផ្ញើសេចក្តីព្រាងកិច្ចព្រមព្រៀងទី២ទៅ ប្រធានអាស៊ាន គឺរដ្ឋមន្ត្រីការបរទេសឥណ្ឌូនេស៊ីកាលពីថ្ងៃទី២៧កក្កដាម្សិលមិញ។ កិច្ចព្រមព្រៀងទី២នេះ គឺជាការងារបន្តពីសេចក្តីព្រាងកិច្ចព្រមព្រៀងទី១ ដែលប្រមុខរដ្ឋាភិបាលកម្ពុជាបានបង្ហាញកាលពីសប្តាហ៍មុន មាន៧ចំនុច ស្តីពីការអនុវត្តន៍វិធានការដកទ័ពចេញពីតំបន់ប្រាសាទព្រះវិហារ ស្របតាមបញ្ជារបស់តុលាការយុត្តិធម៌អន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
កិច្ចព្រមព្រៀងទី២នេះ គឺជាការងារដែលត្រូវធ្វើបន្តពីកិច្ចព្រមព្រៀងទី១។ កិច្ចព្រមព្រៀងទី១ស្តីពីការអនុវត្តន៍សាលក្រមតុលាការឡាអេដែលលោកនាយករដ្ឋមន្ត្រីខ្មែរហ៊ុន សែនបង្ហាញនៅក្នុងសន្និសីទកាសែតកាលពីសប្តាហ៍កន្លងទៅនោះ មាន៧ចំនុច។ ហើយចំនុចទី៧នោះបានសរសេរថា "ការកំណត់ភារកិច្ច ការទទួលខុសត្រូវ និងលក្ខខណ្ឌប្រតិបត្តិរបស់ក្រុមអ្នកសង្កេតការណ៍ឥណ្ឌូនេស៊ីក្នុងនាមជាប្រធានអាស៊ាន និងការទទួលខុសត្រូវរបស់កម្ពុជា និងថៃ ក្នុងការរៀបចំបង្កលក្ខណៈងាយស្រួលដល់បេសកម្មរបស់ក្រុមអ្នកសង្កេតការណ៍ឥណ្ឌូនេស៊ី ត្រូវធ្វើឡើងក្នុងរូបភាពជាកិច្ចព្រមព្រៀងដោយឡែកមួយរវាង កម្ពុជា ថៃ និងឥណ្ឌូនេស៊ី"។
អ្នកនាំពាក្យក្រសួងការបរទេសកម្ពុជាលោកកុយ គួងបានបញ្ជាក់ថា កិច្ចព្រមព្រៀងទី២ដែលកម្ពុជាទើបតែបានផ្ញើទៅប្រធានអាស៊ាន គឺជាអ្វីដែលមានចែងនៅក្នុងចំនុចទី៧ក្នុងកិច្ចព្រមព្រៀងទី១នោះហើយ។ សេចក្តីព្រាងកិច្ចព្រមព្រៀងទី២នេះ ក៏ត្រូវបានកម្ពុជាផ្ញើទៅរដ្ឋាភិបាលថៃដូចគ្នា។
នៅក្នុងលិខិតផ្ញើទៅរដ្ឋមន្ត្រីការបរទេសឥណ្ឌូនេស៊ី ដែលជាប្រធានអាស៊ាន លោកហោ ណាំហុងប្រមុខការទូតកម្ពុជាបានស្នើអោយរដ្ឋមន្ត្រីការបទេសឥណ្ឌូនេស៊ីពិចារណា ហើយឆ្លើយតបចំពោះកិច្ចព្រមព្រៀងនេះអោយបានឆាប់។ កម្ពុជាមិនបានបង្ហាញសេចក្តីព្រាងកិច្ចព្រមព្រៀងទី២នេះជាសាធារណៈនោះទេ ប៉ុន្តែបានបញ្ជាក់ថា គោលបំណងនៃកិច្ចព្រមព្រៀងថ្មីនេះសំដៅអនុវត្តន៍ការដាក់ពង្រាយក្រុមអ្នកសង្កេតការណ៍ឥណ្ឌូនេស៊ីដើម្បីកំណត់តំបន់គ្មានកងទ័ពបណ្តោះអាសន្ននៅលើដីជាក់ស្តែង និងមានបំណងតាមដានការដកកងទ័ពប្រកបដោយប្រសិទ្ធភាព។
នៅតែមិនទាន់មានប្រតិកម្ម ឬការឆ្លើយតបណាមួយពីភាគីថៃនៅឡើយទេ ចំពោះសេចក្តីព្រាងកិច្ចព្រមព្រៀងស្តីពីការអនុវត្តន៍សាលក្រមឡាអេដែលតាក់តែងឡើងដោយរដ្ឋាភិបាលកម្ពុជានោះ។ ប៉ុន្តែបើយោងតាមការអះអាងរបស់មន្ត្រីជាន់ខ្ពស់រដ្ឋាភិបាលកម្ពុជា រហូតដល់ពេលនេះហើយ វាមានលទ្ធភាពច្រើន ថាកម្ពុជានៅរង់ចាំរដ្ឋាភិបាលថ្មីរបស់ថៃតែម្តង ដែលជាមួយរដ្ឋាភិបាលថ្មីនេះ កម្ពុជាមានក្តីសង្ឃឹមច្រើនក្នុងការងារដោះស្រាយវិបត្តិព្រំដែនជាមួយថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ