លោកហ៊ុន សែន៖ តំបន់ប្រាសាទព្រះវិហារស្ថិតនៅក្នុងស្ថានភាពប្រុងប្រយ័ត្ន
នៅពេលដែលកម្ពុជានិងថៃត្រូវអនុវត្តដីកាតុលាការឡាអេដោយត្រូវដកកងទ័ពចេញពីតំបន់ប្រាសាទព្រះវិហារនោះ កម្ពុជាក៏នៅតែប្រុងប្រយ័ត្នជានិច្ច ជាពិសេស នៅទិសយោធភូមិភាគ៤ ដែលមានតំបន់ព្រំដែនប្រាសាទព្រះវិហារ។ នេះបើតាមការអះអាងរបស់លោកនាយករដ្ឋមន្ត្រីហ៊ុន សែននៅព្រឹកថ្ងៃពុធ ២០ កក្កដា ២០១១។ ចំពោះការដកកងទ័ពវិញ លោកឧបនាយករដ្ឋមន្ត្រីហោ ណាំហុងបញ្ជាក់ថា កម្ពុជាមិនអាចដកកងទ័ពមុនការមកដល់នៃអ្នកសង្កេតការណ៍ឥណ្ឌូណេស៊ីនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
លោកនាយករដ្ឋមន្ត្រីហ៊ុន សែនបានថ្លែងជាលើកដំបូង អំពីស្ថានភាពនៅតំបន់ប្រាសាទព្រះវិហារ ពីរថ្ងៃក្រោយពីតុលាការអន្តរជាតិទីក្រុងឡាអេចេញដីកាបញ្ជាអោយកម្ពុជានិងថៃដកកងទ័ព។ នៅពីមុខសមាជិកគណបក្សប្រជាជនកម្ពុជាគ្រប់ជាន់ថ្នាក់ ក្នុងសន្និបាតគណៈកម្មាធិការកណ្តាលលើកទី៣៦ ក្នុងទីក្រុងភ្នំពេញ កាលពីព្រឹកថ្ងៃទី២០កក្កដានេះ អនុប្រធានគណបក្សប្រជាជនកម្ពុជា លោកហ៊ុន សែន បានបញ្ជាក់អោយដឹងយ៉ាងខ្លីថា សភាពការណ៍ទិសភូមិភាគ៤ ដែលមានតំបន់ព្រំដែនប្រាសាទព្រះវិហារនោះ កំពុងស្ថិតនៅក្នុងស្ថានភាពប្រុងប្រយ័ត្ន។ ប្រមុខដឹកនាំរដ្ឋាភិបាលរូបនេះមិនបាននិយាយលម្អិត អំពីស្ថានភាពព្រំដែននោះឡើយ។ ប៉ុន្តែ លោកបានបង្ហើបអោយដឹងអំពីបញ្ហាព្រំដែននេះ គឺដោយសារតែសមាជិកគណបក្សប្រជាជនកម្ពុជាដែលស្ថិតនៅក្នុងជួរកងទ័ព នៅតាមអង្គភាពមួយចំនួនដែលប្រចាំការនៅទិសប្រាសាទព្រះវិហារនោះ មិនអាចមកចូលរួមក្នុងសន្និបាតបើកទូលាយនៃគណៈកម្មាធិការកណ្តាលគណបក្សនៅពេលនេះ។
នៅក្នុងសុន្ទរកថាបើកសន្និបាតគណបក្សប្រជាជនកម្ពុជាកាន់អំណាច កាលពីព្រឹកមិញនេះ លោកជា ស៊ីម ប្រធានគណបក្ស ក៏មិនបានភ្លេចរំឭកលើកវិញ អំពីវិបត្តិព្រំដែននោះដែរ។ លោកជា ស៊ីម បញ្ជាក់ថា ប្រជាជនកម្ពុជាគ្រប់មជ្ឈដ្ឋានបានថ្កោលទោសថៃឈ្លានពាន ហើយបានគាំទ្រនិងលើកទឹកចិត្តកម្លាំងសមរភូមិមុខរបស់កម្ពុជាជានិច្ច។
ទាក់ទងនឹងការដកកងទ័ព លោកហោ ណាំហុង រដ្ឋមន្ត្រីការបរទេសកម្ពុជា ដែលទើបត្រឡប់មកពីស្តាប់ការប្រកាសដីកាតុលាការឡាអេនោះ បានថ្លែងបញ្ជាក់នៅក្នុងសន្និសីទកាសែត នៅអាកាសយានដ្ឋានអន្តរជាតិភ្នំពេញ កាលពីព្រឹកមិញថា កម្ពុជានឹងមិនអាចដកកងទ័ព មុនការមកដល់នៃអ្នកសង្កេតការណ៍ឥណ្ឌូណេស៊ីនោះឡើយ។ លោកបន្តថា លោកបានជួបជាមួយរដ្ឋមន្ត្រីការបរទេសឥណ្ឌូណេស៊ីរួចហើយ ដោយលោកបានស្នើទៅសមភាគីឥណ្ឌូណេស៊ីប្រញាប់រៀបចំបញ្ជូនអ្នកសង្កេតការណ៍អោយបានឆាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ