ថៃនៅតែមិនទាន់ប្រាប់ពីពេលវេលានៃការប្រជុំក្រុមការងារចម្រុះ
រហូតដល់ពេលនេះ ភាគីថៃនៅតែមិនទាន់កំណត់ពេលវេលានៃកិច្ចប្រជុំក្រុមការងារចម្រុះនៅឡើយទេ បើទោះជារដ្ឋមន្ត្រីក្រសួងការពារជាតិកម្ពុជាបានសរសេរលិខិតរំលឹកភាគីហើយក៏ដោយ។ ក្រោយពីមានកិច្ចប្រជុំគណៈកម្មាធិការព្រំដែនទូទៅនៅក្នុងរាជធានីភ្នំពេញកាលពីខែធ្នូកន្លងទៅ ភាគីទាំងពីរកម្ពុជាបានសម្រេចបង្កើតអោយមានក្រុមការងារចម្រុះដើម្បីជជែកអំពីការអនុវត្តដីកាបញ្ជារបស់តុលាការឡាអេថៃទី១៨កក្កដា២០១១។
ចុះផ្សាយនៅថ្ងៃ៖
ស្តាប់ - ០១:៤៤
ពីរសប្តាហ៍ហើយដែលលោកឧបនាយករដ្ឋមន្ត្រីទៀ បាញ់ រដ្ឋមន្ត្រីក្រសួងការពារជាតិកម្ពុជាបានសរសេរលិខិតទៅសមភាគីថៃដើម្បីរម្លឹកអោយសមភាគីថៃរបស់លោកកំណត់ពេលនៃកិច្ចប្រជុំក្រុមការងារចម្រុះដូចដែលភាគីទាំងពីរបានសម្រេចកាលពីថ្ងៃទី២១ខែធ្នូកន្លងទៅ។ រហូតដល់ពេលនេះ បើតាមការបញ្ជាក់របស់លោកឧត្តមសេនីយឯក ឈុំ សុជាតិ រដ្ឋមន្ត្រីក្រសួងការពារជាតិថៃនៅមិនទាន់ឆ្លើយតបមកលោកទៀ បាញ់នៅឡើយទេ។
គណៈកម្មាធិការព្រំដែនទូទៅ បានបើកកិច្ចប្រជុំកាលពីថ្ងៃទី២១ខែធ្នូនៅក្នុងរាជធានីភ្នំពេញដើម្បីជជែកអំពីការដកកងទ័ពចេញពីតំបន់ដែលត្រុវគ្មានកងទ័ពបណ្តោះអាសន្ន។ នៅពេលនោះ គណៈកម្មាធិការព្រំដែនទូទៅនេះ បានសម្រេចថាភាគីទាំងសងខាងត្រូវបានបង្កើតក្រុមការងាររៀងៗខ្លួន ហើយភាគីថៃនឹងធ្វើជាម្ចាស់ផ្ទះរៀបចំកិច្ចប្រជុំក្រុមការងារនេះ ដើម្បីជជែកនីតិវិធីនៃការអនុវត្តិដីការបស់តុលាការយុត្តិធម៌អន្តរជាតិថ្ងៃទី១៨កក្កដាឆ្នាំ២០១១ដែលបញ្ជាអោយមានការដកកងទ័ពចេញតំបន់ទំហំ១៧គមការេក្បែរប្រាសាទព្រះវិហារ។
រដ្ឋមន្ត្រីការពារជាតិកម្ពុជាធ្លាប់បានអះអាងហើយថា កម្ពុជាបានរៀបចំក្រុមការងាររបស់ខ្លួនរួចហើយដែលសមាជិកប្រមាណ២០នាក់ ដឹកនាំដោយលោកនាយឧត្តមសេនីយ នាង ផាត រដ្ឋលេខាធិការក្រសួងការពារជាតិ។ នៅឡើយតែភាគីថៃដែលកម្ពុជាមិនដែលមានព័ត៌មានអំពីក្រុមការងារ និងការកំណត់កិច្ចប្រជុំក្រុមការងារចម្រុះនេះ។
ផ្ទុយទៅវិញ ក្នុងពេលកន្លងមក បែរជាមានការអះអាងពីភាគីឥណ្ឌូនេស៊ីវិញ ភាគីឥណ្ឌូនេស៊ីដែលត្រូវចូលរួមសង្កេតការណ៍រួមគ្នាជាមួយភាគីកម្ពុជា និងថៃនោះ ថាឥណ្ឌូនេស៊ីនឹងបញ្ជូនក្រុមអ្នកសង្កេតការណ៍របស់ខ្លួនមកតំបន់ព្រំដែនកម្ពុជាយ៉ាងយូរដើមខែឧសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ