កម្ពុជា-ថៃ ព្រមព្រៀងចុះពិនិត្យបើកច្រកព្រំដែនថ្មី និងរុករកបង្គោលព្រំដែន
កិច្ចប្រជុំគណៈកម្មការចម្រុះខ័ណ្ឌសីមាព្រំដែនគោកកម្ពុជា-ថៃ ហៅកាត់ថា JBC រយៈពេលពីរថ្ងៃ នៅប្រទេសថៃ បានបិទបញ្ចប់ កាលពីថ្ងៃទី១៤កុម្ភៈម្សិលមិញ។ ភាគីកម្ពុជា តំណាងដោយលោកទេសរដ្ឋមន្ត្រី វ៉ា គីមហុង បានប្រកាសភ្លាមពីលទ្ធផលកិច្ចប្រជុំ ដោយជោគជ័យជាមួយភាគីថៃ។ នោះគឺប្រទេសទាំងពីរ បានឯកភាព និងអនុញ្ញាតឲ្យគណៈកម្មការព្រំដែន ចុះអនុវត្តលើទីតាំងជាក់ស្តែង និងធ្វើកិច្ចការមួយចំនួន ដើម្បីរុករកបង្គោលព្រំដែន។ មួយវិញទៀត រាល់ការព្រមព្រៀងលើបញ្ហាព្រំដែន ភាគីថៃ លែងយកទៅឆ្លងរដ្ឋសភា ដូចមុនទៀតហើយ។
ចុះផ្សាយនៅថ្ងៃ៖
ស្តាប់ - ០២:២៥
នៅពេលវិលត្រឡប់មកពីតុប្រជុំចរចារឿងព្រំដែន កាលពីយប់ថ្ងៃ១៤កុម្ភៈម្សិលមិញ នៅព្រលានយន្តហោះភ្នំពេញ លោកទេសរដ្ឋមន្ត្រី វ៉ា គីមហុង ប្រធានគណៈកម្មការចម្រុះខ័ណ្ឌសីមាព្រំដែនគោកកម្ពុជា-ថៃ JBC បានប្រកាសពីចំណុចវិជ្ជមាននៃកិច្ចប្រជុំរយៈពេលពីរថ្ងៃ នៅទីក្រុងបាងកក។ នោះគឺកំណត់ហេតុទាំងបី ដែលភាគីថៃ និងកម្ពុជា ព្រមព្រៀងជាមួយគ្នាកន្លងមកនោះ លែងមានបញ្ហាទៀតហើយ។ ភាគីថៃ ហ៊ានចុះហត្ថលេខា ដោយមិនចាំបាច់ឆ្លងកាត់រដ្ឋសភាថៃ ដូចកាលមុនទៀតទេ។
លោក វ៉ា គីមហុង បានបញ្ជាក់ថា ភាគីថៃមានសិទ្ធិសម្រេចលើរាល់កិច្ចព្រមព្រៀង និងចុះហត្ថលេខាលើកិច្ចព្រមព្រៀងគ្នា នៅក្នុងកិច្ចប្រជុំ ដោយមិនចាំបាច់ឆ្លងកាត់សភាថៃទេ។ ការព្រមព្រៀងជាមួយគ្នានោះ អាចយកមកអនុវត្ត ដើម្បីធ្វើកិច្ចការព្រំដែនគោកឲ្យបានឆាប់រហ័ស។
តាមលោក វ៉ា គីមហុង ភាគីទាំងពីរ បានចរចា និងទទួលលទ្ធផលធំៗ លើ ៣ ចំណុច។ ទី១-ការរុករកបង្គោលព្រំដែន នៅច្រកជាំស្រងាំ ស្រុកអន្លង់វែង ខេត្តឧត្តរមានជ័យ ពីបង្គោលលេខ១ ដល់បង្គោលលេខ ២៣ ជិតប្រាសាទតាមាន់។ ភាគីទាំងពីរបានឯកភាពគ្នា ហើយក្រុមកិច្ចការជំនាញចម្រុះ ចុះទៅធ្វើកិច្ចការនេះ បន្ទាប់ពីភាគីទាំងពីរ ធ្វើកិច្ចការនៅច្រកស្ទឹងបត់។ ការបើកច្រកព្រំដែនស្ទឹងបត់ ក្នុងខេត្តបន្ទាយមានជ័យ ត្រូវបានភាគីទាំងពីរ យល់ព្រមបញ្ជូនអ្នកបច្ចេកទេសចម្រុះ ដើម្បីពិនិត្យទីតាំងជាក់ស្តែង នៅថ្ងៃទី៥ ខែមីនា ឆ្នាំ២០១២។
ចំណុច២ កម្ពុជា-ថៃ បានឯកភាពគ្នារកប្រទេសទី៣ ថតរូបភាពពីលើអាកាស សម្រាប់ធ្វើផែនទីខ្នាតធំ លើតំបន់ព្រំដែន។ រីឯចំណុច៣ កម្ពុជា-ថៃ បានឯកភាពពិនិត្យលើឯកសារទាំងឡាយ ដែលភាគីទាំងពីរ បានរកឃើញបង្គោលចំនួន ៤៨ បង្គោល ក្នុងចំណោម ៧៣ បង្គោល។
ជាការកត់សម្គាល់ ក្រុមការងារព្រំដែនកម្ពុជា-ថៃ ប្រជុំព្រមព្រៀងលើបញ្ហាព្រំដែនពេលនេះ មិនបានពាក់ព័ន្ធនឹងព្រំដែនតំបន់ប្រាសាទព្រះវិហារ និងមិនបាននិយាយដល់ការដកកងទ័ពឡើយ។ បញ្ហាដកទ័ព និងបញ្ហាព្រំដែនប្រាសាទព្រះវិហារ ភាគីទាំងពីរបានឯកភាពគ្នា ទុកឲ្យតុលាការយុត្តិធម៌អន្តរជាតិ ដោះស្រាយ តាមការស្នើសុំឲ្យភាគីកម្ពុជា ចំពោះការបកស្រាយសាលដីកាឆ្នាំ១៩៦២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ