ខ្មែរក្រហម៖ មន្ត្រីកម្ពុជាទៅញូវយ៉កដើម្បីស្វែងរកថវិកាឆ្នាំ ២០១៣ និង ២០១៤
នៅចុងសប្តាហ៍នេះ ឬដើមសប្តាហ៍ក្រោយ តំណាងរដ្ឋាភិបាលកម្ពុជា និងមន្ត្រីសាលាក្តីខ្មែរក្រហមនឹងធ្វើដំណើរទៅកាន់ទីក្រុងញូវយ៉កដើម្បីចូលរួមប្រជុំស្វែងរកថវិកា។ តំណាងអង្គការសហប្រជាជាតិ រដ្ឋាភិបាលកម្ពុជា និងបណ្តាប្រទេសជាមិត្តរបស់សាលាក្តីខ្មែរក្រហមនឹងជួបប្រជុំគ្នានៅថ្ងៃទី៧វិច្ឆិកានៅឯញូវយ៉កដើម្បីអនុម័តថវិកាសម្រាប់ដំណើរការសាលាក្តីនេះក្នុងឆ្នាំ២០១៤ និង ២០១៥ ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
បន្ទាប់ពីសវនាការសំណុំរឿង ០០២ វគ្គទី១ បានបិទបញ្ចប់ ឥឡូវនេះគឺជាពេលវេលាដែលសាលាក្តីខ្មែរក្រហមត្រូវស្វែងរកថវិកាសម្រាប់ដំណើរការបន្ត។ ភាគីកម្ពុជាដែលតំណាងដោយលោក កែវ រ៉េមី រដ្ឋលេខាធិការទីស្តីការគណៈរដ្ឋមន្ត្រី និងមន្ត្រីរដ្ឋបាលសាលាក្តីតំណាងដោយលោក ក្រាញ់ តូនី ប្រធានរដ្ឋបាលស្តីទីនៃសាលាក្តីខ្មែរក្រហមនឹងធ្វើដំណើរទៅកាន់ទីក្រុងញូវយ៉កនៅដើមសប្តាហ៍ក្រោយនេះដើម្បីចូលរួមកិច្ចប្រជុំអនុម័តថវិកា។ នេះបើយោងតាមលោក ឌឹម សុវណ្ណារុំ ប្រធានផ្នែកកិច្ចការសាធារណៈនៃសាលាក្តីខ្មែរក្រហមដែលបានប្រាប់វិទ្យុបារាំងអន្តរជាតិនៅថ្ងៃសៅរ៍នេះ។
បើយោងតាម លោក ឌឹម សុណ្ណារុំ កិច្ចប្រជុំរវាងតំណាងរដ្ឋាភិបាលកម្ពុជា អង្គការសហប្រជាជាតិ និងបណ្តាប្រទេសជាមិត្តរបស់សាលាក្តីគ្រោងបើកធ្វើនៅថ្ងៃទី៧វិច្ឆិកានៅឯទីក្រុងញូវយ៉ក។ នៅក្នុងកិច្ចប្រជុំនោះ ភាគីកម្ពុជា និងសហប្រជាជាតិនឹងដាក់សំណើស្តីពីគម្រោងថវិកាសម្រាប់ឆ្នាំ ២០១៤ និង ២០១៥ ដើម្បីសុំការគាំទ្រពីម្ចាស់ជំនួយ។
កញ្ចប់ថវិកាសម្រាប់ដំណើរការពីរឆ្នាំខាងមុខនេះនៅមិនទាន់ត្រូវបានគេបង្ហើបឲ្យដឹងនៅឡើយទេ ប៉ុន្តែ បើយោងតាមប្រធានកិច្ចការសាធារណៈនៃសាលាក្តី ការចំណាយនឹងថយចុះជាងកាលពីឆ្នាំ ២០១២ និង ២០១៣ ពីព្រោះតែការងាររបស់សាលាក្តីនេះត្រូវបានកាត់បន្ថយជាងមុន។ កាលពីឆ្នាំ ២០១២ និង ២០១៣ សាលាក្តីខ្មែរក្រហមបានចំណាយក្នុងរង្វង់ ៩០ លានដុល្លារអាមេរិក គិតទាំងភាគីជាតិ និងអន្តរជាតិ។
គួររម្លឹកថា សវនាការសំណុំរឿង ០០២ វគ្គទី១ បានដល់ទីបញ្ចប់ហើយកាលពីថ្ងៃព្រហស្បតិ៍ទី ៣១ តុលា។ ឥឡូវនេះគឺជាពេលវេលាដែលអង្គជំនុំជម្រះសាលាដំបូងត្រូវសរសេរសាលក្រមដែលគេគ្រោងនឹងប្រកាសនៅដើមឆ្នាំ ២០១៤ មុននឹងបន្តសវនាការសំណុំរឿង ០០២ វគ្គទី២ ។
បញ្ហាថវិកាសម្រាប់ឆ្នាំ ២០១៣ នេះត្រូវបានដោះស្រាយបន្ទាប់ពីរដ្ឋាភិបាលកម្ពុជាបានយល់ព្រមបង់ប្រាក់បដិភាគ ១,៨ លានដុល្លារសម្រាប់បើកប្រាក់ខែជូនបុគ្គលិកជាតិ។ ការយល់ព្រមបង់ប្រាក់បដិភាគនេះបានធ្វើឡើងបន្ទាប់ពីជំនួបរវាងលោកនាយករដ្ឋមន្ត្រី ហ៊ុន សែន ជាមួយលោក បាន គីមូន អគ្គលេខាធិការអង្គការសហប្រជាជាតិនៅឯប្រទេសប៊្រុយណេកាលពីខែតុលាកន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ