ប្រជាសហគមន៍ដែលមានជម្លោះគ្រោងដង្ហែញត្តិទៅរដ្ឋសភានៅថ្ងៃទី២៩ឧសភា
បើទោះបីជាគ្មានការអនុញ្ញាតពីសាលារាជធានីភ្នំពេញ ប្រជាសហគមន៍ដែលទទួលរងផលប៉ះពាល់ពីការរំលោភដីធ្លី ព្រៃឈើ លំនៅដ្ឋាន នេសាទ និង ការបំផ្លាញធនធានធម្មជាតិទំនងជានឹងរក្សាការដង្ហែក្បួនដាក់ញតិ្តដើម្បីសុំអន្តរាគមន៍ពី រដ្ឋសភា និង អង្គភាពប្រឆាំងអំពើពុករលួយ។ចំនែក មន្ត្រីសាលារាជធានីភ្នំពេញបានបញ្ជាក់ថា អាជ្ញាធរនឹងចាត់វិធានការទប់ស្កាត់។
ចុះផ្សាយនៅថ្ងៃ៖
ស្តាប់ - ០២:០៥
បន្ទាប់ពីការប្រជុំពិភាក្សាស្ទាបស្ទង់មតិជាមួយតំណាងមួយចំនួនដែលកំពុងនៅភ្នំពេញស្រាប់ ប្រជាសហគមន៍ដែលទទួលរងគ្រោះទាំងនោះ បានរក្សាជំហរដង្ហែញត្តិនៅថ្ងៃទី ២៩ ឧសភា ខាងមុខនេះ បើទោះជាសារាជធានីភ្នំពេញមិនអនុញ្ញាតក៏ដោយ។ លោក សេង សុខហេង តំណាងសហគមន៍ព្រៃឈើខេត្តឧត្តរមានជយ័ បានបញ្ជាក់នៅថ្ងៃអង្គារ ទី ២៧ ឧសភា ថា យ៉ាងណាក៏ដោយ ពួកលោក មិនទាន់សម្រេចជាផ្លូវការថានឹងហែក្បួននោះទេ ព្រោះពួកលោកត្រូវពិភាក្សាជាមួយតំណាងប្រជាសហគមន៍មួយចំនួនទៀតសិន ហើយនៅថ្ងៃពុធ ស្អែក ទើបគេសម្រេចពិតប្រាកដ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានអះអាងប្រាប់វិទ្យុបារាំងអន្តរជាតិថា ប្រសិនបើប្រជាសហគមន៍ មិនគោរពតាមការ ណែនាំរបស់សាលារាជធានីភ្នំពេញទេ នោះ ខាងអាជ្ញាធរនឹងចាត់វិធានការទប់ស្កាត់ ។ការហាមឃាត់មិនអោយមានការដង្ហែក្បួន ត្រូវសាលារាជធានីភ្នំពេញលើកហេតុផលថា ដើម្បីចៀសវាងការប៉ះពាល់ដល់ សន្តិសុខ សុវត្ថិភាព និង សណ្តាប់ធ្នាប់សង្គម ពិសេសគឺការកកស្ទះចរាចរណ៍តាមដងផ្លូវ។
យ៉ាងណាក៏ដោយ សាលារាជធានីភ្នំពេញ បាន សម្រេចអោយ ប្រជាសហគមន៍ ចាត់តំណាង៧នាក់ មកសហការជាមួយសាលារាជធានីភ្នំពេញ ដើម្បីយកញតិ្តរបស់ពួកគេទៅដាក់នៅវិមានរដ្ឋសភា និង អង្គភាពប្រឆាំងអំពើពុករលួយ ឬ អាចប្រគល់ញត្តិតាមរយៈសាលារាជធានីភ្នំពេញដើម្បីប្រគល់ជូនស្ថាបន័ទាំងពីរនោះ។ ការសម្រេចទាំងនេះ ត្រូវបានធ្វើឡើងនៅក្នុងកិច្ចប្រជុំរវាងតំណាងសហគមន៍និង សាលារាជធានីភ្នំពេញកាលពីរសៀលថ្ងៃទី២៦ឧសភាម្សិលម៉ិញនេះ។
សូមបញ្ជាក់ថា ប្រជាសហគមន៍មកពីគ្រប់ខេត្តទាំង២៤ ដែលរងគ្រោះដោយសាការរំលោភដីធ្លី ព្រៃឈើ លំនៅដ្ឋាន នេសាទ និង ការបំផ្លាញធម្មជាតិ ដែលមានអ្នកតំណាងប្រមាណជា២ពាន់នាក់ គ្រោងជួបជុំគ្នានៅទីលានប្រជាធិបតេយ្យ នៅថ្ងៃទី២៩ ឧសភា រួចដង្ហែញត្តិទៅរដ្ឋសភា និង អង្គភាពប្រឆាំងអំពើពុករលួយ ។ ការហែញត្តិនេះត្រូវតំណាងសហគមន៍បញ្ជាក់ថាមានគោលដៅសុំអោយស្ថាបន័ទាំងពីរ ចាត់វិធានការបញ្ឈប់អំពើពុករលួយរបស់អ្នកមានអំណាច និង អ្នកមានលុយមួយចំនួនដែលបង្ករបញ្ហាលើវិសយ័ ព្រៃឈើ នេសាទ ដីធ្លី និង លំនៅដ្ឋាន ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ