ពលករអាចរកការធ្វើនៅមជ្ឈមណ្ឌលការងារថៃ ស្របពេលអាជ្ញាធរខ្មែរកំពុងសម្រួល
"បណ្តេញចេញដើមខែ ហៅទៅវិញចុងខែ" នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មានកម្ពុជា AKP ដែលប្រាប់នៅថ្ងៃសុក្រថា ខេត្ត៤របស់ថៃបានបើកមជ្ឈមណ្ឌលការងារចំនួន៥ ដើម្បីឱ្យពលករកម្ពុជាអាចស្វែងរកមុខរបរលើទឹកដីថៃ បានស្រួល។ នៅខាងកម្ពុជាឯណេះវិញការជ្រោមជ្រែងពលករខ្មែរ ឱ្យអាចទៅធ្វើការនៅប្រទេសថៃ ដោយស្របច្បាប់ ក៏ប្រព្រឹត្តទៅស្របគ្នាដែរ។ ការណ៍នេះកើតឡើងក្រោយពីការបណ្តេញពលករខុសច្បាប់ចេញទាំងតក់ក្រហល់ក្នុងខែនេះ ធ្វើឱ្យសហគ្រាសថៃខ្វះកម្មករខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ខេត្តសុរិន្ទ ខេត្តចន្ទបុរី ខេត្តស្រះកែវ និងខេត្តត្រាតរបស់ថៃ ដែលស្ថិតនៅជាប់នឹងព្រំដែនកម្ពុជា បានបើកមជ្ឈមណ្ឌលការងារចំនួន៥កន្លែង ដើម្បីចុះឈ្មោះ និងចងក្រងចំណាប់រម្មណ៍របស់ពលករកម្ពុជា ទុកឱ្យថៅកែថៃជ្រើសរើសដោយផ្ទាល់។ នេះបើតាមរបាយការណ៍ម្សិលមិញរបស់ទីភ្នាក់ងារសារព័ត៌មានកម្ពុជា AKP ដែលបានស្រង់សម្ដីរបស់អភិបាលខេត្តស្រះកែវ ឈ្មោះ ប៉ាក់ការ៉ាថន ទៀនចៃ (Pakkarathorn Teanchai) មកបន្ថែមថា ការបើកមជ្ឈមណ្ឌលការងារទាំងនេះគឺដើម្បីសម្រួលឱ្យពលករខ្មែរអាចដាក់ពាក្យរកការងារធ្វើនៅក្នុងប្រទេសថៃ។
ការរៀបចំបែបនេះនៅខាងភាគីថៃត្រូវបានគេមើលឃើញថា គឺដោយសារសហគ្រាសថៃកំពុងកំពុងត្រូវការកម្លាំងពលកម្មយ៉ាងច្រើន បន្ទាប់ពីរដ្ឋាភិបាលយោធាថៃបច្ចុប្បន្ន បានចាប់ប្រមូលពលករខុសច្បាប់បរទេស បញ្ជូនទៅស្រុកកំណើតវិញ ហើយក្នុងចំណោមនោះ ពលករខ្មែរ២សែន៥ម៉ឺននាក់ បានចាកចេញពីប្រទេសថៃ តាំងពីដើមខែមិថុនានេះ។
នៅខាងកម្ពុជាឯណេះវិញ រដ្ឋាភិបាលបានបញ្ចុះតម្លៃធ្វើលិខិតឆ្លងដែនឱ្យនៅត្រឹមតែ១ម៉ឺន៦ពាន់រៀល ឬ៤ដុល្លារ និងបានកំណត់តម្លៃសរុបមិនដល់២០ម៉ឺនរៀលផង ពោលគឺត្រឹមតែ៤៩ដុល្លារប៉ុណ្ណោះ ដើម្បីសម្រួលឱ្យពលករខុសច្បាប់ទាំងនោះ អាចត្រឡប់ទៅធ្វើការនៅប្រទេសថៃវិញ ដោយស្របច្បាប់ តាមរយៈទីភ្នាក់ងារនាំពលករចេញ។ ក្រសួងការងារបានសម្រេចដូចនេះ ទន្ទឹមនឹងការប្រឹងប្រែងផ្សព្វផ្សាយឱកាសការងារក្នុងប្រទេស ចំនួនតែ១ម៉ឺន៦ពាន់កន្លែង សម្រាប់ពលករចំណាកស្រុកជ្រើសរើស។
នៅកម្ពុជា ពលករខ្វះការងារធ្វើ នៅថៃ សហគ្រាសខ្វះពលករធ្វើការ។ ស្ថានភាពនេះបានបង្ខិតរដ្ឋាភិបាលកម្ពុជា និងរដ្ឋាភិបាលយោធាថៃឱ្យជិតគ្នា ក្នុងការដោះស្រាយបញ្ហាពលករ។ ឥឡូវ ពលករខ្មែរ ដែលបានឆ្លងដែនមកកម្ពុជាវិញ មានជំរើសកាន់តែច្រើន៖ នៅធ្វើការក្នុងប្រទេស? ត្រឡប់ទៅថៃវិញដោយស្របច្បាប់ និងចំណាយតិច? បើទៅ តាមរយៈក្រុមហ៊ុននៅកម្ពុជា ឬតាមរយៈមជ្ឈមណ្ឌលការងារ ដែលថៃទើបបង្កើតនៅតាមព្រំដែន?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ