រដ្ឋសភា មានគម្រោងជម្រុះបុគ្គលិក
ប្រធានគណៈកម្មការកិច្ចការបរទេស នៃរដ្ឋសភា នៅថ្ងៃទី១១វិច្ឆិកានេះ បានបើកវេទិកាប្រចាំខែក្នុងទំនាក់ទំនងរដ្ឋសភា និងអ្នកសារព័តមាន នៅឯវិមានរដ្ឋសភា។ លោក ឈាង វុន សមាជិកសភាគណបក្សប្រជាជនកម្ពុជា បានគូសបញ្ជាក់ថា សភា នឹងបន្តជំរឿនសមាសភាព ក្នុងសភា ដើម្បីស្វែងរកបុគ្គលិកមានសមត្ថភាព អសមត្ថភាព និងបុគ្គលិក ដល់អាយុចូលនិវត្តជាដើម។ ដែលនេះជាកិច្ចការជំហានទី២ របស់រដ្ឋសភា។
ចុះផ្សាយនៅថ្ងៃ៖
ស្តាប់ - ០២:២៨
រដ្ឋសភាជាតិ ដែលសំពីងសំពោងនាពេលបច្ចុប្បន្ននេះ នឹងត្រូវធ្វើជំរឿនជាជំហានលើកទី២ ដើម្បីរិះរកបុគ្គលិក ដែលមានសមត្ថភាព និងគ្មានសមត្ថភាពធ្វើការ រួមទាំងបុគ្គលិកដល់អាយុចូលនិវត្តន៍ជាដើម។ ហើយកិច្ចការនេះ ត្រូវតែធ្វើឱ្យជាក់ស្តែង។ នេះជាការបញ្ជាក់ពីលោក ឈាង វុន ប្រធានគណៈកម្មការកិច្ចការបរទេស និងព័ត៌មានរបស់រដ្ឋសភា នៅថ្ងៃអង្គារទី១១ វិច្ឆិកានេះ។
លោក ឈាង វុន បានទទួលស្គាល់ថាបុគ្គលិករបស់រដ្ឋសភា ដែលបច្ចុប្បន្នមានជាង ១ពាន់៣រយនាក់នោះ គឺជាចំនួនដ៏ច្រើន ហើយបុគ្គលិកមួយចំនួន ពិតជាមិនគោរពពេលវេលាការងារច្បាស់លាស់នោះទេ។ ដែលនេះជាកង្វល់ធំមួយរបស់រដ្ឋសភា។ តំណាងរាស្ត្រមណ្ឌលបាត់ដំបងមកពីគណបក្សកាន់អំណាចរូបនេះ បានបញ្ជាក់ថា ដើម្បីអាចជម្រុះមន្ត្រី ដែលអសកម្មមួយចំនួននោះបាន រដ្ឋសភាជាតិ ត្រូវតែមានគោលការណ៍ ជានយោបាយមួយ ដើម្បីផ្តល់ជាថវិកាសម្រាប់ផ្តល់ជូន ដល់អ្នកដែលស្ម័គ្រចិត្តចេញ និងអ្នកដែលចូលនិវត្តន៍ឱ្យបានច្បាស់លាស់។
ជាគោលនយោបាយ ដែលអាចប្រើរូបមន្តផ្តល់ប្រាក់បៀវត្សចំនួន៨០% ក្នុងរយៈពេល១០ខែជាដើម។ ប្រធានគណៈកម្មការកិច្ចការបរទេស និងជាអ្នកនាំពាក្យរដ្ឋសភានេះ បានឱ្យដឹងថា ក្នុងអាណត្តិទី៤កន្លងទៅសភា បានជម្រុះបុគ្គលិកប្រមាណជា២០០នាក់ហើយចេញពីសភា។
មូលហេតុ ដែលសភាកម្ពុជា មានសមាសភាពសំពីងសំពោងបែបនេះ គឺដោយសារតែនយោបាយបង្រួបបង្រួមជាតិ កាលពីឆ្នាំ១៩៩៣ របស់អ្នកនយោបាយកម្ពុជា ដែលបានច្របាច់បញ្ចូលគ្នាគ្រប់និន្នាការ និងមិនបានគិតពីគុណភាពនៃបុគ្គលិក ដែលបញ្ចូលមកនោះទេ។ នេះបើតាមលោកឈាង វុន ដដែល។
ក្នុងសន្និសីទសារព័ត៌មានរយៈពេលប្រមាណជិត ២ម៉ោង នៅព្រឹកក្រៅពីការលើកឡើងពីជំរឿនរបស់សភា ដើម្បីជម្រុះបុគ្គលិកនេះ លោកឈាង វុន ក៏បានឆ្លើយសំនួរអ្នកសារព័ត៌មានទាក់ទងនឹងអំពើបក្ខពួកនិយមនៃគ្រួសារអគ្គលេខាធិការរងរដ្ឋសភា លោក មិត្ត ការ៉េនផងដែរ។
យ៉ាងណាក៏ដោយ ការប្រកាសធ្វើជំរឿនជម្រុះបុគ្គលិកបែបនេះ គឺស្របពេលដែលតំណាងរាស្ត្រសភា គណបក្សប្រឆាំងលោក សុន ឆ័យ បានសរសេរលិខិតទៅកាន់ប្រធានរដ្ឋសភា កាលពីពេលថ្មីៗនេះ ឱ្យបើកការស៊ើបអង្កេតរឿងបុគ្គលិកដ៏ច្រើនលើសលុប និងបក្ខពួកនិយម រួមទាំងអំពើពុករលួយ ក្នុងសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ