សភានឹងបោះឆ្នោតជ្រើសតាំងសមាជិកឧត្តមក្រុមប្រឹក្សានៃអង្គចៅក្រម១រូបនៅថ្ងៃចន្ទស្អែក
រដ្ឋសភាជាតិកម្ពុជា បានអនុម័តទទួលយកពាក្យសុំឈរឈ្មោះបេក្ខជនចំនួន៥ រូបជាសមាជិកឧត្តមក្រុមប្រឹក្សានៃអង្គចៅក្រមកាលពីថ្ងៃទី ៣០ តុលា កន្លងទៅ។ ហើយនៅថ្ងៃចន្ទស្អែកនេះរដ្ឋសភានឹងបន្តសម័យប្រជុំលើកទី៣ នីតិកាលទី៥ ដើម្បីធ្វើការបោះឆ្នោតជ្រើសតាំងសមាជិកឧត្តមក្រុមប្រឹក្សានៃអង្គចៅក្រមចំនួន១ រូបក្នុងចំណោមបេក្ខជនទាំង៥ រូបនោះ។
ចុះផ្សាយនៅថ្ងៃ៖ កែប្រែថ្ងៃទី៖
តាមការគ្រោងទុកនៅថ្ងៃចន្ទ ទី ០៣ វិច្ឆិកា រដ្ឋសភាជាតិនឹងបន្តបើកសម័យប្រជុំលើកទី៣ នីតិកាលទី៥ ដើម្បីធ្វើការបោះឆ្នោតជ្រើសតាំងសមាជិកឧត្តមក្រុមប្រឹក្សានៃអង្គចៅក្រមចំនួន១ រូបលើកទី១។ ការបោះឆ្នោតនោះ នឹងត្រូវធ្វើឡើងចាប់ពីម៉ោង ៨ ព្រឹក ក្រោមការដឹកនាំដោយ លោកហេង សំរិន ប្រធានរដ្ឋសភាកម្ពុជា។
សូមជំរាបជូនថា កាលពីថ្ងៃទី៣០ តុលាកន្លងទៅ គណៈកម្មការអចិន្ត្រៃយ៍ទាំង១០នៃរដ្ឋសភាបានបើកកិច្ចប្រជុំមួយ ដោយបានអនុម័តទទួលយកពាក្យសុំឈរឈ្មោះបេក្ខជនចំនួន៥ រូប ជាសមាជិកឧត្តមក្រុមប្រឹក្សានៃអង្គចៅក្រមសម្រាប់អាណត្តិ៥ឆ្នាំ លើកទី១។
យ៉ាងណាក៏ដោយ រដ្ឋសភាមិនបានបង្ហាញឲ្យដឹងពីសមាសភាពបេក្ខជនទាំង៥នាក់នោះទេ។ ចំណែកលោកឈាង វុន អ្នកនាំពាក្យរដ្ឋសភាក៏មិនបានបញ្ជាក់ពីសមាសភាពបេក្ខជនទាំងនោះដែរ ដោយលោកលើកហេតុផលថា លោកចាំឈ្មោះមិនអស់។ ទោះបីមិនចង់អត្ថាប្បាយអ្វីច្រើន ប៉ុន្តែលោកឈាង វុន បានបញ្ជាក់ថា បេក្ខជនដែលឈឈ្មោះទាំងនោះ សុទ្ធតែមានបទពិសោធន៍យូរឆ្នាំក្នុងអាជីពជាចៅក្រម និង មេធាវី ។
សូមបញ្ជាក់ថា សមាជិកឧត្តមក្រុមប្រឹក្សានៃអង្គចៅក្រមមានចំនួន១១ រូប ដែលជ្រើសតាំងដោយស្ថាប័នផ្សេងៗគ្នា។ ហើយរដ្ឋសភាក៏ជាស្ថាប័នមួយដែលតម្រូវឲ្យជ្រើសរើសសមាជិកមួយក្នុងចំណោមទាំង១១ រូបនោះផងដែរ។ លោកអេង ឆៃអ៊ាង ប្រធានគណៈកម្មការសិទ្ធមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភាព្រឹទ្ធសភា បានបញ្ជាក់ខ្លីប្រាប់វិទ្យុបារាំងអន្តរជាតិថា ការជ្រើសតាំងសមាជិកឧត្តមក្រុមប្រឹក្សានៃអង្គចៅក្រមចំនួន១ រូបនៅថ្ងៃចន្ទ នឹងធ្វើឡើងដោយការបោះឆ្នោតសំងាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ