ការជួបជុំតវ៉ារបស់លោកស្រីឡាក់ សុភាព រងការរំខាន
ការជួបជុំរបស់លោកស្រីឡាក់ សុភាព និងអ្នកគាំទ្ររបស់លោកស្រីប្រមាណ២០នាក់នៅពីមុខទីស្នាក់ការកណ្តាលគណបក្សសង្គ្រោះជាតិនៅព្រឹកថ្ងៃព្រហស្បតិ៍នេះមិនទទួលបានជោគជ័យនោះទេ។ ប្រជាពលរដ្ឋ និងសកម្មជនគណបក្សសង្គ្រោះជាតិមួយចំនួន បានមករំខានការជួបជុំតវ៉ានោះ ។ ភ្លាមៗ លោកស្រីឡាក់ សុភាព បានប្រកាសផ្អាក និងបំបែកការជួបជុំ។ មន្ត្រីជាន់ខ្ពស់គណបក្សសង្គ្រោះជាតិ បានអះអាងថា ការរំខាននោះមិនមែនជាការរៀបចំរបស់គណបក្សនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០២
ក្រោយពីជួបជុំគ្នាមិនទាន់បានប្រមាណមួយម៉ោងស្រួលបួលផង លោកស្រីឡាក់ សុភាពនិងអ្នកគាំទ្ររបស់លោកស្រីត្រូវបានរំខានដោយក្រុមប្រជាពលរដ្ឋ និងសកម្មជនគណបក្សសង្គ្រោះជាតិ ស្របពេលដែលលោកស្រីកំពុងរៀបចំធ្វើការតវ៉ានៅពីមុខទីស្នាក់ការកណ្តាលគណបក្សសង្គ្រោះជាតិ។ ជាការតវ៉ាទៅនឹងសេចក្តីសម្រេចរបស់គណៈកម្មាធិការវិន័យដែលបានបណ្តេញលោកស្រីចេញពីគណបក្ស បន្ទាប់ពីលោកស្រីបានបរិហារពីបញ្ហាអំពើពុករលួយ និងការបែកបាក់ផ្ទៃក្នុងគណបក្សសង្គ្រោះជាតិកាលពីចុងសប្តាហ៍មុន។
ប្រជាពលរដ្ឋ និងសកម្មជនទាំងនោះ ហាក់មានកំហឹងយ៉ាងខ្លាំងលើលោកស្រីឡាក់ សុភាព ដោយខ្លះបានប្រើប្រាស់ពាក្យអសុរោះ រីឯមួយចំនួនទៀតបានមកតាមទារលុយពីលោកស្រី ដោយពួកគេអះអាងថា លោកស្រីឡាក់ សុភាព បានជំពាក់ពួកគេ។ ចំណែកមួយចំនួនទៀត បានមកជជីកសួរលោកស្រីពីរឿងរ៉ាវដែលលោកស្រីបានបរិហារគណបក្សសង្គ្រោះជាតិ ដែលនេះ គឺជាការំខានមួយទៀតដល់អ្នកសារព័ត៌មានដែលកំពុងធ្វើសន្និសីទជាមួយលោកស្រីឡាក់ សុភាព។ ជាមួយគ្នានោះ ប្រជាពលរដ្ឋម្នាក់បានឆក់យកទូរស័ព្ទមួយគ្រឿងពីលោកស្រីឡាក់ សុភាព ដើម្បីជាថ្នូរនឹងអ្វីដែលគាត់អះអាងថា លោកស្រីឡាក់ សុភាព បានជំពាក់លុយថ្លៃកាតទូរស័ព្ទរបស់គាត់ចំនួន២០ ដុល្លារ។
បន្ទាប់ពីរងការវាយប្រហារដោយពាក្យសម្តីអសុរោះនិងការំខានតាមរយៈការតាមមកទារលុយនោះ លោកស្រីឡាក់ សុភាព បានប្រកាសផ្អាកការជួបជុំតវ៉ានោះ ដើម្បីបញ្ចៀសការកើតមានអំពើហិង្សា និង ដើម្បីសុវត្ថិភាពផ្ទាល់ខ្លួន។ លោកស្រីបានហៅការរំខាននោះ គឺជាការរៀបចំដោយគណបក្សសង្គ្រោះជាតិ ដែលបង្ហាញពីភាពផ្តាច់ការរបស់គណបក្សនេះ។ លោកស្រីមានប្រសាសន៍ថា “ នេះគឺជារឿងមួយ ការរារាំងគឺជាអំពើផ្តាច់ការរបស់គណបក្សសង្គ្រោះជាតិតែម្តង ដោយសារការរារាំងនេះគេខ្លាចខ្ញុំបញ្ចេញនូវសារព័ត៌មាន គឺធាតុពិតអ្វីដែលគេបានប្រព្រឹត្ត ហើយគេមិនឲ្យខ្ញុំបញ្ចេញនូវសារព័ត៌មានទេហើយរាល់សារព័ត៌មានទាំងអស់គេបានបំបិទសិទ្ធិសេរីភាព។
លោកអ៊ូ ច័ន្ទឫទ្ធិ ប្រធានគណៈកម្មាធិការវិន័យរបស់គណបក្សសង្គ្រោះជាតិ បានថ្លែងប្រាប់វិទ្យុបារាំងអន្តរជាតិថា លោកមិនបានដឹងពីការរំខានការជួបជុំរបស់លោកស្រីឡាក់ សុភាពនោះទេ។ ជាមួយគ្នានេះ លោកក៏បានបដិសេធផងដែរថា ការរំខាននោះ មិនមែនជាការរៀបចំទុកមុនរបស់គណបក្សសង្គ្រោះជាតិនោះឡើយ។ លោកអ៊ូ ច័ន្ទឫទ្ធិ ថា “ យើងអត់ទៅមានរៀបចំអីចឹងៗទេបាទ ! យើងអត់ទៅធ្វើរបៀបដែលមិនថ្លៃថ្នូរអីចឹងទេ។ ខ្ញុំយល់ថា អ្នកណាមិនសប្បាយចិត្តជាមួយគាត់ ឫគាត់មិនសប្បាយចិត្តជាមួយអ្នកណា ហ្នឹងខ្ញុំអត់ដឹងទេ ព្រោះអត់បានទៅរៀបចំការរារាំងគាត់ធ្វើបាតុកម្មនោះទេបាទ! សកម្មជន ខ្ញុំមិនដឹងថា សកម្មជនរូបណាទេ តែយើងអត់បានទៅប្រាប់សកម្មជនថ្នាក់សង្កាត់ ថ្នាក់ខណ្ឌឲ្យទៅរារាំងគាត់ គឺអត់គិតគូរ អត់បានទៅរៀបចំទេបាទ ”។
យ៉ាងណាក៏ដោយលោកស្រីឡាក់ សុភាព បានលើកឡើងថា លោកស្រីនឹងមកប្រមូលផ្តុំតវ៉ានៅមុខគណបក្សសង្គ្រោះជាតិនេះសាជាថ្មី តែលោកស្រីមិនបញ្ជាក់ថា ពេលណាមួយនោះទេ។ ទោះជាបែបនេះក្តី លោកស្រីឡាក់ សុភាព បានបញ្ជាក់ថា លោកស្រីមិនចូលក្នុងគណបក្សសង្គ្រោះជាតិវិញឡើយ ហើយលោកស្រីក៏មិនទាន់មានគម្រោងទៅចូលរួមជាមួយគណបក្សនយោបាយផ្សេងណាមួយនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ