ជនបរទេស៣នាក់ជាប់បម្រាមចូលទឹកដីកម្ពុជារយៈពេល៤ឆ្នាំ
តុលាការខេត្តសៀមរាប នៅរសៀលថ្ងៃទី៣១មករានេះ បានសម្រេចកាត់ក្តីឲ្យជនជាតិបារាំង ៣នាក់ ដែលអាជ្ញាធរអប្សរា បានចាប់ខ្លួន ដោយចោទថាបានថតរូបអាក្រាត្រ នៅប្រាសាទបន្ទាយក្តីនោះ ដោយពិន័យជាប្រាក់ក្នុងម្នាក់ៗ ចំនួន ១លានរៀល, ឲ្យជាប់ពន្ធនាគារ៦ខែ និងមិនឲ្យចូលទឹកដីខ្មែរ រយៈពេល៤ឆ្នាំ។ ប៉ុន្តែទោសជាប់ពន្ធនាគារនោះ មិនត្រូវបានអនុវត្តនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
បុរសជនជាតិបារាំង ៣នាក់ ដែលត្រូវបានអាជ្ញាធរអប្សរា សហការជាមួយនឹងកម្លាំងនគរបាលខេត្តសៀមរាប ចាប់ខ្លួន សួរចម្លើយ និងបញ្ចូនទៅតុលាការនោះ, នៅរសៀលថ្ងៃទី៣១មករានេះ ត្រូវបានតុលាការសម្រេចកាត់ក្តី ដោយពិន័យជាប្រាក់ក្នុងម្នាក់ៗចំនួន ១លានរៀល ឲ្យជាប់ពន្ធនាគារ ៦ខែ និងមិនអនុញ្ញាតឲ្យចូលទឹកដីកម្ពុជា រយៈពេល ៤ឆ្នាំ។ នេះបើតាមលោកស្រី ចៅ ស៊ុនកិរិយា អ្នកនាំពាក្យអាជ្ញាធរជាតិអប្សរា ដែលបានប្រាប់វិទ្យុបារាំង នៅរសៀលថ្ងៃសៅរ៍នេះ។
ប៉ុន្តែតាមលោកស្រីចៅ ស៊ុនកិរិយា ចំពោះទោសឲ្យជាប់ពន្ធនាគារ រយៈពេល ៦ខែនោះ មិនត្រូវបានអនុវត្តនោះទេ។ មិនអនុវត្ត ដោយសារតុលាការយល់ថា ជនជាប់ចោទទាំង៣នាក់នេះ បានសារភាពកំហុសទាំងអស់ ហើយម្យ៉ាងពួកគេក៏មិនបានយករូបទាំងនោះ ទៅធ្វើអាជីវកម្មណាមួយដែរ ដោយពួកគេបានលុបរូបអាក្រាត្រ មិនសមរម្យទាំងនោះអស់រលីងហើយ។ តាមលោកស្រីអ្នកនាំពាក្យអាជ្ញាធរអប្សរាដដែល ជនជាតិបរទេសទាំង៣នាក់នេះ គឺជាយុវជន ដែលមានអាយុត្រឹមពី ២០ទៅ ២២ឆ្នាំ ដូច្នេះពួកគេ ក៏មិនបានដឹងច្បាស់ពីច្បាប់ទម្លាប់កម្ពុជា ទើបតុលាការសម្រេចព្យួរទោសតែម្តង។
សូមបញ្ជាក់ថា កាលពីព្រឹកថ្ងៃទី ២៩មករាកន្លងទៅ អាជ្ញាធរជាតិអប្សរា បានចេញសេចក្តីប្រកាសព័ត៌មានមួយ បញ្ជាក់ថា ពួកគេបានសហការជាមួយនឹងអង្គភាពនគរបាលការពារបេតិកភណ្ឌខេត្តសៀមរាប ឃាត់ខ្លួនជនជាតិបារាំង៣នាក់ ដែលសង្ស័យថាបានថតរូបអាក្រាត្រកាយ នៅប្រាសាទបន្ទាយក្តី ក្នុងខេត្តសៀមរាប។ ហើយបន្ទាប់ពីបានឃាត់ខ្លួន និងសួរចម្លើយ អស់រយៈពេល២យប់មក ពួកគេទាំង៣នាក់ បានសារភាព ថាពិតជាបានប្រព្រឹត្តិអំពើទាំងនោះមែន។
គួរជម្រាបជូនផងដែរថា វិធានការ ចាប់ខ្លួនភ្ញៀវទេសចរបរទេស ដែលថតរូបអាក្រាត្រមិនសមរម្យ នៅលើប្រាសាទខ្មែរនេះ បានចាប់ផ្តើមឡើង បន្ទាប់ពីមានការបង្ហោះរូបភាពស្រី្តអាក្រាត្រកាយ នៅប្រាសាទខ្មែរជាច្រើន ទៅលើទំព័របណ្តាញសង្គម ដែលបង្កឲ្យមានការរិះគន់ដល់អាជ្ញាធរជាតិអប្សរាជាខ្លាំង។ អជ្ញាធរជាតិអប្សរា ដែលនៅពេលនេះ បានបញ្ជាក់ថា កំពុងតែបន្តស៊ើបអង្គេត និងចាត់វិធានាការ លើគ្រប់ករណីការថតរូបអាក្រាត្រ ឬការថតរូបមិនសមរម្យ នៅក្នុងប្រាសាទខ្មែរនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ