ស្ថានទូតបារាំងបើកទ្វារទទួលសាធារណជនដើម្បីចូលរួមរំលឹកវិញ្ញាណក្ខន្ធជនរងគ្រោះ បន្ទាប់ពីវត្តមានដំបូងគេរបស់លោកនាយករដ្ឋមន្ត្រីកម្ពុជា
ស្ថានទូតបារាំងប្រចាំនៅកម្ពុជា បានបើកទ្វាជាសាធារណៈដើម្បីទទួលសាធារណជន ដែលមានបំណងចូលសម្តែងនូវការរំលែកទុក្ខពីគ្រួសារជនរងគ្រោះដោយសារភេរវកម្មដ៏ឃោរឃៅនៅទីក្រុងប៉ារីស។ នៅចន្ទ ទី១៦ ខែវិច្ឆិកានេះ ក្រៅពីលោក នាយករដ្ឋមន្ត្រីហ៊ុន សែនប្រមុខដឹកនាំកំពូលកម្ពុជា តំណាងកងទព័ និងរដ្ឋសភា ព្រមទាំងតំណាងគណបក្សប្រឆាំង ក៏នឹងចូលទៅស្ថានទូតបារាំងដើម្បី គោរពវិញ្ញាណក្ខន្ធជនរងគ្រោះផងដែរ។ រហូតមកដល់ពេលនេះ ពុំទាន់មានរបាយការណ៍ផ្លូវការថាគ្មានជនរងគ្រោះជនជាតិខ្មែរនៅក្នុងភេរវកម្មនៅប៉ារីសនៅឡើយទេ។
ចុះផ្សាយនៅថ្ងៃ៖
ស្តាប់ - ០២:២៥
លោក ហ៊ុន សែន នាយករដ្ឋមន្ត្រីកម្ពុជា រួមជាមួយនឹងលោកស្រីប៊ុន រ៉ានី ភរិយារបស់លោក ក្នុងនាមជាតំណាងកាកបាទក្រហម កម្ពុជា នាព្រឹកនេះបានចូល ទៅស្ថានទូតបារាំងប្រចាំកម្ពុជា ដើម្បីគោរពវិញ្ញាណក្ខន្ធជនរងគ្រោះដោយសារភេរវកម្ម៦កន្លែងមិនធ្លាប់មាននៅទីក្រុងប៉ារីស។ នៅក្នុងសៀវភៅរំលែកទុក្ខ លោក នាយករដ្ឋមន្ត្រី ហ៊ុន សែន បានថ្កោលទោសយ៉ាងខ្លាំងក្លាបំផុតចំពោះការវាយប្រហារភេរវកម្ម ហើយ លោកក៏សូមរំលែកទុក្ខយ៉ាងក្រៀមក្រំបំផុត ព្រមទាំងសំដែងនូវសាមគ្គីភាព ជាមួយនឹង រដ្ឋាភិបាល និងប្រជាជនបារាំង។
លោក ទឹង សុខលីម មន្ត្រីពត៌មានរបស់ស្ថានទូតបារាំងប្រចាំនៅកម្ពុជាបានអោយដឹងទៀតថា នៅរសៀលនេះមន្ត្រីរដ្ឋាភិបាលកម្ពុជាដែលរួមមានដូចជាតំណាងរដ្ឋសភា រដ្ឋមន្ត្រីក្រសួងវប្បធម៌ តំណាងកងទព័មួកខៀវកម្ពុជា និងតំណាងគណបក្សសង្គ្រោះជាតិ នឹងចូលមកគោរពវិញ្ញាណក្ខន្ធជនរងគ្រោះ។
ក្រៅពីថ្នាក់ដឹកនាំសំខាន់ៗនៅកម្ពុជា លោក ទឹង សុខលីម បានបញ្ជាក់ថា ស្ថានទូតបារាំងក៏បានបើកទ្វារជូនដល់ សាធារណជនទូទៅ ដើម្បី ចូលរួមសរសេរសាររំលែកទុក្ខ ឬដាក់កម្រងផ្កា នៅស្ថានទូតបារាំងផងដែរ គឺចាប់ពីពេលនេះរហូតដល់ ល្ងាចថ្ងៃទី១៧ ខែវិច្ឆិកា ។
លើសពីនេះ ដើម្បីរំលឹកវិញ្ញាណក្ខន្ធជនរងគ្រោះ ស្ថានទូតបារាំង វិទ្យាស្ថានបារាំង និង សមាគមបារាំងនៅកម្ពុជា នឹងរៀបចំការជួបជុំមួយនៅ វិទ្យាស្ថានបារាំងនៅថ្ងៃទី១៧ ខែវិច្ឆិកា នាម៉ោង5និង30នាទីល្ងាចនៅវិទ្យាស្ថានបារាំង។ ស្ថានទូតបារាំងក៏បានប្រកាសអញ្ជើញសាធារណជន ទាំងឡាយទៅចូលរួមការជួបប្រជុំនោះដែរ។
សូមបញ្ជាក់ថា នៅក្នុងអំពើភេរវកម្មដ៏សាហាវមិនធ្លាប់មាន ចំនួន៦កន្លែង នៅក្រុងប៉ារីស កាលពីថ្ងៃសុក្រទី1៣ខែវិច្ឆិកា ថ្ងៃអពមង្គលនេះ បានបណ្តាលអោយមានអ្នកស្លាប់យ៉ាងហោចណាស់១២៩ នាក់ និងរបួសជាង៣៥០នាក់។ក្នុងចំណោម៦កន្លែង មានមួយកន្លែងជាហាងអាហារកម្ពុជា ។ នៅទីនោះមិនមានជនជាតិខ្មែរណារងគ្រោះទេ។យ៉ាងណាក៏ដោយលោក ជុំ សុន្ទរី អ្នកនាំពាក្យក្រសួងការបរទេសកម្ពុជាបានបញ្ជាក់ប្រាប់វិទ្យុបារាំងនៅព្រឹកថ្ងៃទី១៦ខែវិច្ឆិកានេះថា លោកពុំទាន់ទទួលបានរបាយការណ៍ផ្លូវការបញ្ជាក់ថាគ្មានជនរងគ្រោះជនជាតិខ្មែរនៅឡើយទេ ហើយពេលនេះមន្ត្រីស្ថានទូតខ្មែរកំពុងបន្តតានដានជាមួយនឹងអាជ្ញាធរបារាំងនៅគ្រប់កន្លែងកើតហេតុ។ រហូតមកដល់ពេលនេះរបាយការណ៍បានអោយដឹងថាមាន ជនបរទេសចំនួន១៤ជនជាតិ បានឋិតនៅក្នុងចំណោមអ្នកស្លាប់នៅក្នុងភេរវកម្មនាទីក្រុងប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ