ពិភពលោកសម្តែងសាមគ្គីភាពជាមួយបារាំង ដោយមិនភ្លេចពង្រឹងសន្តិសុខរៀងខ្លួនៗ
គោរពវិញ្ញណក្ខន្ធមួយនាទី ជួបប្រជុំគ្នាដោយគ្មានណាត់នៅមុខស្ថានទូតបារាំង ដាក់កម្រងផ្កា ដុតទៀន អាគារសាធារណៈលម្អភ្លើងបីពណ៌តំណាងទង់ជាតិបារាំង ដើម្បីសម្តែងសាមគ្គីភាព និងគាំទ្រលើកទឹកចិត្តបារាំង ដែលរងការវាយប្រហារភេរវកម្មមួយខ្សែដ៏ធ្ងន់ធ្ងរ។ ប្រតិកម្ម សារនយោបាយ ពីសំណាក់ថ្នាក់ដឹកនាំនយោបាយ អ្នកសិល្បៈ កីឡា បញ្ញាវន្ត ឬជាជនសាមញ្ញ នៅជុំវិញពិភពលោកបានធ្លាក់មកជាបន្តបន្ទាប់។ ប៉ុន្តែទន្ទឹមគ្នានេះ វិធានការពង្រឹងសន្តិសុខក្នុងប្រទេសជិតខាងអឺរ៉ុប ក៏ត្រូវបានពង្រឹង។
ចុះផ្សាយនៅថ្ងៃ៖
អាគារWorld Trade Center នៅញូវយ៉ក សាងសង់ក្រោយមហាភេរវកម្ម១១កញ្ញា២០០១ អាគារCN ចំកណ្តាលក្រុងតូរ៉ុងតូ ប្រទេសកាណាដា រោងល្ខោនដ៏ល្បីនៅស៊ីដនី របស់អូស្ត្រាលី ក្រុងឡុងដ៏អង់គ្លេស ប្តូរពណ៌ទៅជាខៀវ ស ក្រហម ពណ៌ទង់ជាតិបារាំង ដើម្បីជានិមិត្តរូបនៃសាមគ្គីភាព។ ភ្លេងជាតិបារាំងបានលាន់ឮនៅក្រុងបាសឺឡោន ម៉ាដ្រីឌ អេស្ប៉ាញ ... បាច់ផ្កាជាច្រើនត្រូវបានសាធារណជនឧទ្ទិសដល់ជនរងគ្រោះ នៅមុខស្ថានទូតបារាំងក្នុងប្រទេសរៀងៗខ្លួន។
ពិភពលោកបង្ហូរទឹកភ្នែក ចែករំលែកភាពក្រៀមក្រំជាមួយបារាំង បន់ស្រន់ជួយបារាំង ដែលនៅយប់ថ្ងៃសុក្រទី ១៣វិច្ឆិកាបានរងការវាយប្រហារភេរវកម្មអត្តឃាតមិនធ្លាប់មានក្នុងប្រវត្តិ កណ្តាលរដ្ឋធានី ៧កន្លែងផ្សេងគ្នា ក្នុងពេលតែមួយ។ ក្រៅអំពីសាររំលែកទុក្ខ របស់ប្រមុខរដ្ឋប្រមុខរដ្ឋាភិបាល នៃបណ្តាប្រទេសមកពីគ្រប់ទ្វីប អាហ្វ្រិក អាស៊ី អាមេរិក រាប់ពីលោកអូបាម៉ា ព្រះមហាក្សត្រីយានីអេលីហ្សបែត របស់អង់គ្លេស ជប៉ុន សម្តេចប៉ាប ប្រធានាធិបតីនីហ្សេរីយ៉ា ទុយនីស៊ី អាល់ហ្សេរី អារ៉ាប៊ីសាអ៊ូឌីត ... ប្រមុខដឹកនាំប្រទេសក្នុងអឺរ៉ុប បានដើរជួរមុខ ធានាអះអាងថានៅក្បែរ និងគាំទ្របារាំងក្នុងការប្រយុទ្ធប្រឆាំងនឹងភេរវនិយម។
អឺរ៉ុប ដែលក៏កំពុងប្រឈមមុខនឹងការគំរាមកំហែងភេរវកម្មដែរ។ នៅល្ងាចថ្ងៃសៅរ៍នេះ អាកាសយានដ្ឋានអង់គ្លេសGatwick បានជម្លៀសមនុស្សចេញ បន្ទាប់ពីបានចាប់ខ្លួនបុរសសង្ស័យម្នាក់ ជាតិបារាំង មានផ្ទុកពេញទៅដោយជាតិផ្ទុះ។ ចំណែកខាងអាល្លឺម៉ង់វិញ បានអំពាវនាវមិនឱ្យភ្ជាប់ការចាប់ខ្លួនជនសង្ស័យនៅអាល្លឺម៉ង់កាលពីសប្តាហ៍មុនទៅនឹងភេរវកម្មនៅប៉ារីសថ្ងៃនេះ ដោយត្រូវរង់ចាំការសិក្សាច្បាស់លាស់សិន។ តែនៅខាងប៊ែលហ្សិកវិញ ប៉ូលិសបានអះអាង បានបើកប្រតិបត្តិការនៅរសៀលនេះ ក៏ព្រោះតែមានជាប់ពាក់ព័ន្ធនឹងភេរវកម្មនៅប៉ារីស។
មុននឹងចាកចេញពីទីក្រុងវ៉ាស៊ីនតោន ដើម្បីចូលរួមក្នុងជំនួបG២០នៅប្រទេសតួកគីថ្ងៃអាទិត្យទី ១៥វិច្ឆិកានេះ លោកប្រធានាធិបតីអាមេរិក បានកោះប្រជុំគណៈរដ្ឋមន្ត្រីជាបន្ទាន់មួយ ដើម្បីបូកសរុបស្ថានការណ៍ក្រោយភេរវកម្មនៅប៉ារីស និងបានប្រកាសអញ្ជើញមកចូលរួមបើកសន្និសីទស្តីអំពីអាកាសធាតុនៅទីក្រុងប៉ារីស ថ្ងៃទី ៣០ វិច្ឆិកា មិនចោលគម្រោងព្រោះភេរវកម្មឡើយ។ សន្និសីទអង្គការសហប្រជាជាតិស្តីពីអាកាសធាតុ នឹងត្រូវប្រព្រឹត្តទៅតាមការទុក ដោយមានការរឹតបន្តឹងនិងពង្រឹងសន្តិសុខខ្លាំងបន្ថែមទៀត។ នេះបើតាមរដ្ឋមន្ត្រីក្រសួងការបរទេសបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ