សភានឹងរៀបចំសិក្ខាសាលាថ្នាក់ជាតិ ស្តីពីច្បាប់សហជីព ក្រោយជំនួបក្រុមការងារចម្រុះនៅថ្ងៃចន្ទ សប្តាហ៍ក្រោយ
ក្រុមការងារចំពោះកិច្ចរវាងគណបក្សប្រជាជនកម្ពុជា និងគណបក្សសង្គ្រោះជាតិនឹងបើកជំនួបនៅថ្ងៃចន្ទទី៤មករាដើមសប្តាហ៍។ ជាជំនួបដើម្បីពិភាក្សាលើចំណុចស្នើទាំង១៧ចំណុចរបស់សហជីព ដែលស្មើប្រមាណជិត៣០មាត្រា។ ហើយក្រោយជំនួបនេះ គណបក្សទាំងពីរនឹងសម្រេចពីកាលបរិច្ឆេទនៃសិក្ខាសាលាថ្នាក់ជាតិស្តីពីច្បាប់ដ៏ចម្រូងចម្រាស់នេះ។
ចុះផ្សាយនៅថ្ងៃ៖
ស្តាប់ - ០២:២០
សេចក្តីព្រាងច្បាប់សហជីពដែលចម្រូងចម្រាស់ នឹងត្រូវរដ្ឋសភាដាក់ឱ្យជជែកពិភាក្សានៅក្រោយជំនួបរវាងគណបក្សប្រជាជនកម្ពុជា និងគណបក្សសង្គ្រោះជាតិ។ នេះគឺជាការបញ្ជាក់ពីលោក ប៉ែន បញ្ញាប្រធានក្រុមការងារចម្រុះដែលបានប្រាប់វិទ្យុបារាំងនៅថ្ងៃពុធនេះ។ ប៉ុន្តែមិនទាន់កំណត់កាលបរិច្ឆេទច្បាស់លាស់នៅឡើយទេព្រោះត្រូវរងចាំកិច្ចប្រជុំចម្រុះពីគណបក្សទាំងពីរនៅថ្ងៃចន្ទសប្តាហ៍ក្រោយជាមុនសិន។ នេះបើតាមលោកប៉ែន បញ្ញាដដែល។
ប្រធានក្រុមការងារចំពោះកិច្ចចម្រុះមកពីគណបក្សកាន់អំណាច បានអះអាងថា ការបង្កើតសិក្ខាសាលានេះ គឺដើម្បីជៀសវាសការចោទប្រកាន់ថា ការបង្កើតច្បាប់នីមួយៗគ្មានតម្លាភាព ហើយការធ្វើច្បាប់ គឺធ្វើបានស្រេចតែនឹងចិត្តនោះ។ សម្រាប់លោកប៉ែន បញ្ញា ប្រធានគណៈកម្មការនីតិកម្មកូតាគណបក្សប្រជាជនកម្ពុជា ក្រោយការបង្កើតសិក្ខាសាលាថ្នាក់ជាតិហើយ សេចក្តីព្រាងច្បាប់នេះ នឹងវិលចូលដល់នីតិវិធីរបស់រដ្ឋសភាវិញ។
លោកប៉ាវ ស៊ីណា ប្រធានសហព័ន្ធសហជីពចលនាកម្មករកម្ពុជា បានអបអរសាទរចំពោះការបង្កើតសិក្ខាសាលាថ្នាក់ជាតិនេះព្រោះថា សហជីពនិងអ្នកពាក់ព័ន្ធទាំងអស់អាចបញ្ចេញយោបល់ និងក្តីកង្វល់របស់ខ្លួនលើចំណុចទាំង១៧ ដែលស្មើនឹងប្រមាណ៣០មាត្រា។ ចំណុចទាំងនោះរួមមាន សិទ្ធសេរីភាពចេញធ្វើបាតុកម្ម ការលូកដៃផ្នែកហិរញ្ញវត្ថុរបស់សហជីពជាដើម។
លោកសុនឆ័យ អនុប្រធានក្រុមការងារចម្រុះ កូតាគណបក្សសង្គ្រោះជាតិ បានគាំទ្រការទាមទាររបស់ក្រុមសហជីព ព្រោះថា ចំណុចមួយចំនួននៃសេចក្តីព្រាងច្បាប់សហជីពនេះ គឺផ្ទូយទៅនឹងអនុញ្ញាតអន្តរជាតិ ស្តីពីការងារ និងរដ្ឋធម្មនុញ្ញកម្ពុជាផងដែរ។
ដោយឡែកលោកប៉ែន បញ្ញា ដែលកំពុងមើលពិនិត្យច្បាប់នេះ បានអះអាងថាចំណុចមួយចំនួនមានការលំបាកជាខ្លាំងព្រោះថា ទាមទារឱ្យលុបមាត្រានៃច្បាប់ចោល និងកែសម្រួលថែមទៀតផងដូចនេះ លោកកំពុងពិនិត្យពិច័យថាតើការស្នើនោះមានប៉ះពាល់ដល់ច្បាប់ការងារ និងអនុសញ្ញាអន្តរជាតិស្តីពីការងារដែរឬយ៉ាងណា។ ហើយចំណុចណាខ្លះដែលអាចកែប្រែបាន និងទុកដដែលនោះ។
សូមបញ្ជាក់ថាក្រុមការងារចំពោះកិច្ចរវាងគណបក្សកាន់អំណាច និងគណបក្សប្រឆាំងបានជួបជាមួយក្រុមសហជីពដាច់ដោយឡែកពីគ្នាដើម្បីស្តាប់ការបង្ហាញពីក្តីព្រួយបារម្ភលើច្បាប់សហជីពដែលគណៈរដ្ឋមន្ត្រីបានបញ្ជូនឱ្យរដ្ឋសភាអនុម័ត។ សេចក្តីព្រាងច្បាប់ដែលចម្រូងចម្រាស់នេះ គឺមានចំនួន១៧ជំពូក និងមានប្រមាណ១០០មាត្រា។
ទោះបីជាបែបណាក៏ដោយ ការបង្កើតសិក្ខាសាលាថ្នាក់ជាតិដើម្បីពិភាក្សាស្តីពីច្បាប់សហជីពនេះ ក្រោយជំនួបជាមួយបក្សនយោបាយ ត្រូវបានគេមើលឃើញថា គឺជាយន្តការដើម្បីកាត់បន្ថយភាពចម្រូងចម្រាស់នៃការបង្កើតច្បាប់សហជីពក្នុងការថែរក្សានីតិរដ្ឋ និងផលប្រយោជន៍របស់កម្មករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ