គណបក្សប្រជាជនកម្ពុជាប្រារព្ធខួបលើកទី៦៤ ប្រកាសពង្រឹងវប្បធម៌សន្ទនានិងបញ្ហាព្រំដែន
គណបក្សប្រជាជនកម្ពុជា នៅថ្ងៃអាទិត្យ ទី២៨ខែមិថុនានេះ បានប្រារព្ធមីទ្ទីញរំលឹកខួបអនុស្សាវរីយ៍លើកទី៦៤ ថ្ងៃកំណើតគណបក្សប្រជាជនកម្ពុជា ២៨មិថុនា ១៩៥១-២៨ មិថុនា ឆ្នាំ២០១៥។ ការប្រារព្ធខួបកំណើតគណបក្សនៅឆ្នាំនេះ បានធ្វើឡើង ចំពេលដែលគណបក្សនេះ បានបាត់បង់អតីតប្រធានគណបក្សលោក ជា ស៊ីម ដែលបានទទួលមរណភាព កាលពីថ្ងៃទី៨មិថុនាកន្លងទៅ។ យ៉ាងណាក៏ដោយ លោក ហ៊ុន សែន ដែលបន្តតំណែងពីលោក ជា ស៊ីម បានលើកឡើងពីសមិទ្ធិផលរយៈពេល៣៦ឆ្នាំចុងក្រោយ និងបានប្រកាសពង្រឹងវប្បធម៌សន្ទនា និងបញ្ហាព្រំដែនផងដែរ។
ចុះផ្សាយនៅថ្ងៃ៖
ស្តាប់ - ០២:៥៤
ថ្លែងនៅក្នុងអង្គមីទ្ទីញរំលឹកខួបអនុស្សាវរីយ៍លើកទី៦៤ ថ្ងៃកំណើតគណបក្សប្រជាជនកម្ពុជា នាថ្ងៃអាទិត្យទី២៨មិថុនានេះ លោក ហ៊ុន សែន ក្នុងនាមជាប្រធានគណបក្ស បានលើកឡើងពីសមិទ្ធិផលរបស់គណបក្សក្នុងរយៈពេល៦៤ឆ្នាំកន្លងទៅ ជាពិសេសគឺសមិទ្ធិផលចុងក្រោយក្នុងរយៈពេល៣៦ឆ្នាំមកនេះ។ ៣៦ឆ្នាំចុងក្រោយ ជាពេលវេលាដែលគណបក្សប្រជាជនកម្ពុជា បានរំដោះប្រទេសចេញពីរបបប្រល័យពូជសាសន៍ខ្មែរក្រហមនៅថ្ងៃទី៧មករាឆ្នាំ១៩៧៩ នឹងបានដឹកនាំប្រទេសឆ្ពោះមកទល់នឹងពេលសព្វថ្ងៃ។ សព្វថ្ងៃដែលសេដ្ឋកិច្ចកម្ពុជាមានការរីកចំរើនក្នុងរង្វង់៧ភាគរយ ចាប់តាំងពីឆ្នាំ២០១៣មក។ នេះបើតាមសុន្ទរកថារបស់លោកនាយករដ្ឋមន្រ្តី ហ៊ុន សែន។ សុន្ទរកថាដែលមានកម្រាស់ដល់ទៅ៩ទំព័រនេះ លោក ហ៊ុន សែន មិនភ្លេចលើកឡើងពីសមិទ្ធិផលចុងក្រោយមួយទៀត ដែលលោកទើបនឹងបង្កើតឡើងជាមួយលោក សម រង្ស៊ី ប្រធានគណបក្សសង្រ្គោះជាតិ។ ជាវប្បធម៌សន្ទនា ដែលបានបង្កើតឡើង ក្រោយកិច្ចព្រមព្រៀងនយោបាយ កាលពីថ្ងៃទី២០កក្កដាឆ្នាំ២០១៤។ ក្នុងសន្ទរកថានេះ លោក ហ៊ុន សែន បានប្រកាសបន្តពង្រឹងវប្បធម៌សន្ទនានេះ មិនថា តែជាមួយគណបក្សសង្រ្គោះជាតិនោះទេ។
ក្រៅពីសមិទ្ធិផលទាំងនេះ ប្រមុខបក្សប្រជាជនកម្ពុជាថ្មី ក៏បានលើកឡើងពីបញ្ហាព្រំដែនផងដែរ។ បញ្ហាព្រំដែន ដែលប្រទេសកម្ពុជាកំពុងតែប្រឈមជាមួយនឹងប្រទេសវៀតណាម។ លោក ហ៊ុន សែន បានថ្លែងថា គណបក្សប្រជាជនកម្ពុជាបានគាំទ្រយ៉ាងពេញទំហឹងចំពោះការប្តេជ្ញាចិត្តរបស់រដ្ឋាភិបាល ក្នុងការខិតខំដោះស្រាយបញ្ហាព្រំដែនជាមួយប្រទេសជិតខាង ដោយឈរលើមូលដ្ឋានច្បាប់ និងឯកសារគតិយុត្តពាក់ព័ន្ធនានា។
ប្រមុខបក្សថ្មីរបស់គណបក្សប្រជាជនកម្ពុជា ក៏បានប្រកាសគាំទ្រសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល និងសេចក្តីព្រាងច្បាប់ស្តីពី សហជីពផងដែរ។ សេចក្តីព្រាងច្បាប់ទាំងពីរ ដែលកំពុងរងការរិះគន់យ៉ាងខ្លាំង ពីសំណាក់អង្គការសង្គមស៊ីវិលជាតិ និងអន្តរជាតិ។ ហើយនៅខណៈដែលប្រមុខបក្សប្រជាជនកម្ពុជា បានថ្លែងពីការគាំទ្រការអនុម័តលើសេចក្តីព្រាងច្បាប់ទាំងពីរនេះ នៅមុខរដ្ឋសភាឯណោះ មេដឹកនាំក្រុមអង្គការសង្គមស៊ីវិលជាច្រើន កំពុងតែបើកយុទ្ធនាការតវ៉ាជាទ្រង់ទ្រាយធំមួយ ដើម្បីប្រឆាំងនឹងច្បាប់នេះ។
គួរកត់សម្គាល់ថា មីទ្ទីញរំលឹកខួបអនុស្សាវរីយ៍លើកទី៦៤ ថ្ងៃកំណើតគណបក្សប្រជាជនកម្ពុជាលើកនេះ គេសង្កេតឃើញថា កៅអីដែលមេដឹកនាំគណបក្សប្រជាជនធ្លាប់តែអង្គុយជាមួយគ្នាបីនាក់ គឺលោក ជា ស៊ីម, ហ៊ុន សែន, ហេង សំរិន នោះ ពេលនេះ មានតែពីររូបប៉ុណ្ណោះដែលអង្គុយទន្ទឹមគ្នា នោះគឺលោក ហេង សំរិន ប្រធានកិត្តិយសគណបក្ស នឹងលោក ហ៊ុន សែន ជាប្រធានគណបក្ស។ ចំណែកឯលោក ស ខេង និងលោក សាយ ឈុំ ដែលទើបនឹងតែងតាំងជាអនុប្រធានគណបក្ស បានអង្គុយនៅប៉ែកខាងក្រោយ។ លោក ហ៊ុន សែន ត្រូវបានគណបក្សប្រជាជនតែងតាំងជាប្រធានកាលពីថ្ងៃទី២០មិថុនា បន្ទាប់ពីមរណភាពរបស់លោក ជា ស៊ីម កាលពីថ្ងៃទី៨មិថុនាកន្លងទៅ។ នេះគឺជារបត់ថ្មីមួយរបស់គណបក្សប្រជាជនកម្ពុជា ដែលកំពុងកាន់អំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ