លោកហេង សំរិន ជឿថា ប្រធានបក្ស CPP ថ្មី អាចទាក់ទាញប្រជាប្រិយភាពបន្ថែម ដើម្បីឈ្នះឆ្នោតអាណត្តិក្រោយ
លោក ហេង សំរិន សំដែងការអបអរសាទរចំពោះលោកនាយករដ្ឋមន្ដ្រី ហ៊ុន សែន ដែលត្រូវបានបោះឆ្នោតជាប្រធានថ្មី នៃគណបក្សប្រជាជនកម្ពុជា។ លោក ហេង សំរិន ដែលជាប្រធានរដ្ឋសភា និងជាប្រធានកិត្តិយសគណបក្សប្រជាជនកម្ពុជាផងនោះ បានសម្ដែងសុទិដ្ឋិនិយមថា ប្រធានបក្សប្រជាជនថ្មី នឹងអាចទាក់ទាញប្រជាប្រិយភាពបន្ថែមទៀត ដើម្បីឈ្នះការបោះឆ្នោតនាពេលខាងមុខ។
ចុះផ្សាយនៅថ្ងៃ៖
ស្តាប់ - ០១:៤៨
លោក ហេង សំរិន សំដែងការអបអរសាទរចំពោះលោកនាយករដ្ឋមន្ដ្រី ហ៊ុន សែន ដែលត្រូវបានបោះឆ្នោតជាប្រធានថ្មី នៃគណបក្សប្រជាជនកម្ពុជា។ លោក ហេង សំរិន ដែលជាប្រធានរដ្ឋសភា និងជាប្រធានកិត្តិយសគណបក្សប្រជាជនកម្ពុជាផងនោះ បានសម្ដែងសុទិដ្ឋិនិយមថា ប្រធានបក្សប្រជាជនថ្មី នឹងអាចទាក់ទាញប្រជាប្រិយភាពបន្ថែមទៀត ដើម្បីឈ្នះការបោះឆ្នោតនាពេលខាងមុខ។
ក្រៅពីអបអរសាទរចំពោះតំណែងជាប្រធានបក្សប្រជាជនកម្ពុជា របស់លោកនាយករដ្ឋមន្ដ្រី ហ៊ុន សែន លោក ហេង សំរិន ក៏បានបង្ហាញពីជំនឿយ៉ាងមុតមាំរបស់ខ្លួនផងដែរថា លោក ហ៊ុន សែន នឹងបន្តសម្រេចបានជោគជ័យថ្មីៗបន្ថែមទៀត។ ជាពិសេសគឺការទាក់ទាញរកប្រជាប្រិយភាពបន្ថែម ដើម្បីឆ្ពោះទៅយកជ័យជំនះ នៅក្នុងការបោះឆ្នោតនាពេលខាងមុខ។
សារអបអរ និងសេចក្ដីសង្ឃឹមរបស់លោក ហេង សំរិន ដែលជាប្រធានរដ្ឋសភា និងជាប្រធានកិត្តិយសគណបក្សប្រជាជនកម្ពុជានេះ ធ្វើឡើងបន្ទាប់ពីលោកនាយករដ្ឋមន្ដ្រីហ៊ុន សែន ត្រូវបានបោះឆ្នោតឲ្យក្លាយជាប្រធានថ្មី នៃគណបក្សប្រជាជន។
យ៉ាងណាក៏ដោយ អ្នកវិភាគឯករាជ្យយល់ថា ការជ្រើសតាំងក្បាលម៉ាស៊ីនដឹកនាំថ្មីនៃគណបក្សប្រជាជន នឹងមិនមានឥទ្ធិពលទៅលើការគាំទ្រពីប្រជាពលរដ្ឋទេ។ គ្មានឥទ្ធិពល ព្រោះការផ្លាស់ប្ដូរនៅក្នុងជួរថ្នាក់ដឹកនាំបក្សប្រជាជននាពេលនេះ មិនមែនជាកំណែទម្រង់នៅក្នុងបក្ស ទេ។ ការផ្លាស់ប្ដូរនេះ កើតឡើងដោយសារតែមរណភាពរបស់លោក ជា ស៊ីម តែប៉ុណ្ណោះ។
ដើម្បីដណ្ដើមប្រជាប្រិយភាពសម្រាប់ការបោះឆ្នោតនាពេលខាងមុខ លោក អ៊ូ វីរៈ ប្រធានស្ថាប័នស្រាវជ្រាវវេទិកាអនាគត និងជាអ្នកវិភាគឯករាជ្យ ផ្ដល់អនុសាសន៍ឲ្យគណបក្សប្រជាជនប្ដូរយុទ្ធសាស្ត្រថ្មី ធ្វើឲ្យទាន់សម័យជាងមុន។ ធ្វើឲ្យទាន់សម័យដោយព្យាយាមយកគំនិតនៃការដោះស្រាយបញ្ហាទៅជូនប្រជាពលរដ្ឋនៅតាមមូលដ្ឋាន ជំនួសឲ្យប៊ីចេងសារ៉ុង។ នេះបើតាមលោក អ៊ូ វីរៈ។ អ្នកវិភាគឯករាជ្យរូបនេះ ក៏ជំរុញឲ្យមានកំណែទម្រង់ជាក់ស្ដែងនៅក្នុងជួរគណបក្ស និងបង្កើតយុទ្ធសាស្ត្របង្កើនមោទនភាពជាតិក្នុងជួរយុវជនផងដែរ ប្រសិនបើគណបក្សប្រជាជនចង់បានប្រជាប្រិយភាពសម្រាប់ការបោះឆ្នោតអាណត្តិក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ