CNRPនឹងលើកយកការបង្កើតវប្បធម៌សន្ទនាគ្នានៅថ្នាក់មូលដ្ឋានដាក់លើតុក្នុងជំនួបថ្ងៃស្អែក
នៅព្រឹកថ្ងៃព្រហស្បតិ៍ ទី២៩ មករាស្អែកនេះ ថ្នាក់ដឹកនាំក្រុមតំណាងរាស្ត្ររបស់គណបក្សប្រជាជនកម្ពុជានិងគណបក្សសង្គ្រោះជាតិ នឹងជួបគ្នាជាលើកដំបូង។ គណបក្សសង្គ្រោះជាតិ បានបង្ហើបឲ្យដឹងថា ខ្លួននឹងលើកយកបញ្ហាបង្កើតវប្បធម៌សន្ទនាគ្នារវាងគណបក្សទាំងពីរនៅថ្នាក់មូលដ្ឋាន ដើម្បីធ្វើជាប្រធានបទនៅក្នុងជំនួបជាលើកដំបូងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ជំនួបជាលើកដំបូងរបស់ប្រធានក្រុមតំណាងរាស្ត្រនៃគណបក្សប្រជាជនកម្ពុជា និង គណបក្សសង្គ្រោះជាតិ នឹងត្រូវធ្វើឡើងនៅវេលាម៉ោង៩ព្រឹកនៅសាលទំនាក់ទំនងអន្តរជាតិនៃវិមានរដ្ឋសភា។ ជាជំនួបដែលនឹងធ្វើឡើងបន្ទាប់អគ្គលេខាធិការដ្ឋានរដ្ឋសភា បានប្រកាសលើកពេលម្តងរួចមកហើយ កាលពីថ្ងៃចន្ទទី២៦ មករា កន្លងទៅ គឺមុនមួយថ្ងៃនៃជំនួបដែលបានគ្រោងទុក។
តាមសេចក្តីប្រកាសព័ត៌មានជាថ្មីរបស់អគ្គលេខាធិការដ្ឋានរដ្ឋសភានៅថ្ងៃពុធនេះ បានបង្ហាញថា សមាសភាពចូលរួមក្នុងជំនួបនោះគឺ ខាងគណបក្សប្រជាជនកម្ពុជា ដឹកនាំដោយលោកស ខេង ប្រធានថ្នាក់ដឹកនាំតំណារាស្ត្រ និង អមដោយអនុប្រធានពីររូបទៀត គឺ លោកគាត ឈន់ និង លោកស្រីម៉ែន សំអន។ ចំណែកខាងគណបក្សសង្គ្រោះជាតិវិញ នឹងដឹកនាំដោយលោកសម រង្ស៊ី ប្រធានថ្នាក់ដឹកនាំតំណាងរាស្ត្រ អមដោយលោកកឹម សុខា អនុប្រធាន និង លោកយឹម សុវណ្ណ លេខាធិការ។ យ៉ាងណាក៏ដោយ អគ្គលេខាធិការដ្ឋានរដ្ឋសភា មិនបានបង្ហាញពីរបៀបវារៈដែលត្រូវជជែកគ្នានៅក្នុងជំនួបនោះឡើយ។ ក៏ប៉ុន្តែលោកយឹម សុវណ្ណ បានបង្ហើបប្រាប់វិទ្យុបារាំងអន្តរជាតិថា គណបក្សសង្គ្រោះជាតិនឹងលើកយកនូវបញ្ហាបង្កើតវប្បធម៌ជជែកគ្នានៅថ្នាក់មូលដ្ឋានពិភាក្សាជាមួយគណបក្សប្រជាជនកម្ពុជា។
លោកយឹម សុវណ្ណ មានប្រសាសន៍ថា “ បញ្ហាបង្កើតវប្បធម៌ជជែកគ្នា នៅថ្នាក់មូលដ្ឋាន ចាប់ពីថ្នាក់ខេត្ត ថ្នាក់ស្រុក ឃុំ យើងត្រូវបង្កើតឲ្យមានការជជែកគ្នា ដូចដែលយើងធ្លាប់បានធ្វើ បាននិងកំពុងធ្វើជាមួយនឹងថ្នាក់ដឹកនាំគណបក្សកំពូល នៅនឹងថ្នាក់ជាតិ យ៉ាងដូច្នោះឯង អ៊ីចឹងហើយ យើងត្រូវរៀបចំឲ្យដល់ថ្នាក់មូលដ្ឋាន ឲ្យមានការជជែកគ្នា ផ្លាស់ប្តូរយោបល់គ្នា ហើយនឹងរួមគ្នាដោះស្រាយបញ្ហាដែលប្រជាពលរដ្ឋ កំពុងជួបប្រទះ ហើយទីពីរ គឺនៅក្នុងការអនុវត្តគោលនយោបាយវិម្ឈការកន្លងមក វាមានបញ្ហាខ្លះ ដែលជាឧបសគ្គ ដូច្នេះហើយ បានជាយើងត្រូវជជែកគ្នា ដើម្បីជំរុញការដោះស្រាយនូវឧបសគ្គទាំងអស់នឹង»។
ដោយឡែកថ្នាក់ដឹកនាំតំណាងរាស្ត្រខាងគណបក្សប្រជាជនកម្ពុជា មិនអាចទាក់ទងសុំការអត្ថាធិប្បាយបាននោះទេជុំវិញរបៀបវារៈដែលគណបក្សកាន់អំណាចនឹងលើកយកទៅពិភាក្សាជាមួយគណបក្សសង្គ្រោះជាតិនៅក្នុងក្របខណ្ឌជំនួបថ្នាក់ដឹកនាំតំណាងរាស្ត្រជាលើកទីមួយនេះ។
គួរជម្រាបជូនថា ក្រោយកិច្ចព្រមព្រៀងបញ្ចប់វិបត្តិនយោបាយកាលពីថ្ងៃ២២កក្កដាឆ្នាំ ២០១៤ គណបក្សដែលមានកៅអីក្នុងរដ្ឋសភាទាំងពីរបានសន្យាបង្កើតឲ្យមាន វប្បធម៌សន្ទនាគ្នាដើម្បីដោះស្រាយបញ្ហាជំនួសឲ្យការប្រឈមមុខដាក់គ្នា តាមរយៈបាតុកម្ម។ ដើម្បីពង្រឹងវប្បធម៌សន្ទនា គណបក្សប្រជាជនកម្ពុជាដែលមាន៦៨កៅអីក្នុងរដ្ឋសភា បានយល់ព្រមបង្កើតឲ្យមានប្រធានក្រុមតំណាងរាស្ត្រភាគតិចដែលមានឋានៈ ស្មើនាយករដ្ឋមន្ត្រី។ ការផ្តល់ឋានៈនេះត្រូវបានគេពន្យល់ថា គឺដើម្បីឲ្យការជជែកពិភាក្សា ធ្វើឡើងដោយស្មើមុខមាត់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ