រដ្ឋាភិបាលកម្ពុជាដាក់ឲ្យដំណើរការមូលនិធិគន្ធបុប្ផាជាផ្លូវការ
ប្រមុខរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន នៅថ្ងៃពុធនេះ បានប្រកាសដាក់ឲ្យដំណើរការមូលនិធិគន្ធបុប្ផាជាផ្លូវការ។ មូលធិនិគន្ធបុប្ផាបង្កើតឡើងក្រោមគំនិតផ្ដួចផ្ដើមរបស់លោកនាយករដ្ឋមន្ត្រី និងភរិយាផ្ទាល់តែម្ដង ក្នុងគោលបំណងបន្តនិរន្តរភាពមន្ទីរពេទ្យមួយនេះឲ្យបានឋិតថេរ បន្ទាប់ពីស្ថាបនិកមន្ទីរពេទ្យគន្ធបុប្ផា លោក បេអាត រីច្នឺ លាឈប់ព្រោះបញ្ហាសុខភាព។ ឆ្លៀតពេលនេះ អេង គីមហុង សូមរម្លឹកឡើងវិញនូវប្រវត្តិខ្លះៗនៃមន្ទីរពេទ្យគន្ធបុប្ផាជូនលោកអ្នកស្ដាប់!
ចុះផ្សាយនៅថ្ងៃ៖
ស្តាប់ - ០២:១៤
មន្ទីរពេទ្យគន្ធបុប្ផាត្រូវបានបង្កើតនិងដាក់ឈ្មោះដូច្នេះ ដើម្បីជាការរំលឹកដល់សម្ដេចព្រះអង្គម្ចាស់ក្សត្រីនរោត្តមគន្ធបុប្ផាដែលបានសោយទិវង្គតត្រឹមព្រះជន្មាយុ ៤ ព្រះវស្សា (១៩៤៨-១៩៥២) ដោយទ្រង់ព្រះប្រឈួន។ នៅក្នុងឆ្នាំ ១៩៩១ មន្ទីរពេទ្យគន្ធបុប្ផាទី១នៅភ្នំពេញ ត្រូវបានសាងសង់ឡើងវិញបន្ទាប់ពីរងការបំផ្លិចបំផ្លាញដោយសង្គ្រាម។ ក្រោយបញ្ចប់ការសាងសង់នៅឆ្នាំ១៩៩២ មន្ទីរពេទ្យផ្ដើមប្រតិបត្តិការរបស់ខ្លួនឡើងវិញដោយទទួលបានការគាំទ្រផ្នែកថវិកាពីមូលនិធិប្រទេសស្វីស ក្រោមការជ្រោមជ្រែងពីលោកវេជ្ជបណ្ឌិតបេអាត រីច្នឺ។
បច្ចុប្បន្នមន្ទីរពេទ្យគន្ធបុប្ផាមាន៥ទីតាំងដោយក្នុងនោះ៤ទីតាំងនៅភ្នំពេញ និងមួយទីតាំងនៅសៀមរាប។ សូមបញ្ជាក់ថា មន្ទីរពេទ្យគន្ធបុប្ផាទាំង៥ទីតាំងនេះ មានបុគ្គលិកបំរើការងារ២៥៤៣នាក់។ ក្នុងមួយថ្ងៃ មន្ទីរពេទ្យនេះទទួលព្យាបាលជំងឺទូទៅដល់កុមារចន្លោះពី ២៥០០ទៅ៣០០០នាក់។
គួរកត់សម្គាល់ថា កន្លងមក ប្រភពថវិកាសម្រាប់ផ្គត់ផ្គង់មន្ទីរពេទ្យកុមារនេះ ទទួលបានពីសប្បុរសជនខាងក្រៅ តាមរយៈការលះបង់យ៉ាងធំធេងរបស់លោកវេជ្ជបណ្ឌិត បេអាត រីច្នឺ។ ប៉ុន្តែស្ថាបនិកមន្ទីរពេទ្យគន្ធបុប្ផារូបនេះ បានប្រកាសលាលែងពីតំណែង នៅថ្ងៃទី ២៨មីនា ឆ្នាំ២០១៧ ដោយសារលោកធ្លាក់ខ្លួនឈឺធ្ងន់ និងកំពុងសម្រាកព្យាបាលនៅប្រទេសស្វីស។
ក្នុងបំណងបន្តនិរន្តរភាពមន្ទីរពេទ្យមួយនេះឲ្យបានឋិតថេរ រដ្ឋាភិបាលកម្ពុជាបានសម្រេចបង្កើតមួលនិធិគន្ធបុប្ផា ដើម្បីផ្គត់ផ្គង់ការចំណាយនៃមន្ទីរពេទ្យនេះដោយខ្លួនឯង។ ទន្ទឹមនឹងមានមូលនិធិផ្ទាល់ខ្លួន រដ្ឋាភិបាលបានអះអាងថានឹងរក្សាមូលនិធិចាស់ឲ្យនៅដដែល ដោយក្នុងនោះរួមមាន៖ កម្រៃ២ដុល្លារពីភ្ញៀវទេសចរណ៍បរទេសដែលទិញសំបុត្រចូលទស្សនារមនីយដ្ឋានអង្គរ សរុបទៅមួយឆ្នាំទទួលបានជាង៤លានដុល្លារ និងថវិកា១លានដុល្លារពីកាកបាទក្រហមកម្ពុជា។
សូមជម្រាបដែរថា ៣ឆ្នាំចុងក្រោយនេះ មន្ទីរពេទ្យគន្ធបុប្ផាបានចំណាយថវិកាសរុប៤៣,២លានដុល្លារ។ ក្នុងនោះ ប្រភពថវិកាបានមកពីរដ្ឋាភិបាលស្វីសមានចំនួន៤លានដុល្លារ ក្នុង១ឆ្នាំ ខណៈរដ្ឋាភិបាលកម្ពុជាឧបត្ថម្ភថវិកា១០លានដុល្លារក្នុងមួយឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ