ឆ្នាំថ្មី៖ មេធាវីលោក កឹម សុខា ស្នើឲ្យមានការចរចាផ្នែកនយោបាយដើម្បីសេរីភាពកូនក្ដី
លោក ហែម សុជាតិ តំណាងមេធាវីការពារក្ដីលោក កឹម សុខា ស្នើឲ្យអ្នកនយោបាយខ្មែរវិលមករកតុចរចាឡើងវិញ នៅអំឡុងពេលមុន ឬក្រោយនៃពិធីបុណ្យចូលឆ្នាំខ្មែរដែលនឹងចូលមកដល់នៅសប្ដាហ៍ក្រោយនេះ។ ការចរចាផ្នែកនយោបាយដែលលោកមេធាវីជឿជាក់ថា ជាជម្រើសមួយល្អជាងការតតាំងផ្នែកច្បាប់ទៅទៀត ដើម្បីឲ្យកូនក្ដីរបស់លោក គឺលោក កឹម សុខា បាននៅក្រៅឃុំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
លោក ហែម សុជាតិ មេធាវីការពារក្ដីលោក កឹម សុខា បានគូសបញ្ជាក់ថា ការស្នើសុំរបស់មេធាវីឲ្យមានការចរចាខាងនយោបាយនៅពេលនេះ ធ្វើឡើងបន្ទាប់ពីក្រុមមេធាវីអស់សង្ឃឹមចំពោះការតតាំងផ្នែកច្បាប់ ដើម្បីឲ្យ លោក កឹម សុខា បាននៅក្រៅឃុំ។ ដូច្នេះគឺមានតែច្រកចរចាខាងនយោបាយរវាងខ្មែរនិងខ្មែរតែប៉ុណ្ណោះ ដែលអាចធ្វើឲ្យលោក កឹម សុខា បាននៅក្រៅឃុំ ព្រោះប្រវត្តិសាស្ត្របង្ហាញហើយថា គឺមានតែការចរចាទេ ដែលជាដំណោះស្រាយពិតប្រាកដ។ នេះបើតាមលោក ហែម សុជាតិ ដែលបានថ្លែងប្រាប់វិទ្យុបារាំងអន្ដរជាតិនៅថ្ងៃពុធនេះ។
ទន្ទឹមនឹងការស្នើសុំនេះ តំណាងក្រុមមេធាវីបានអះអាងថា ពួកលោកមិនបោះបង់ការងារការពារក្ដីឡើយបើទោះបីជាមិនសូវមានសង្ឃឹមក៏ដោយ។ មិនបោះបង់ចោលដោយសារតែជាការស្នើសុំរបស់លោក កឹម សុខា។ លោក កឹម សុខា ដែលបើលោកមេធាវី មានបំណងនិងបើកចំហជានិច្ចចំពោះការចរចា។ ហើយលោក កឹម សុខា នៅតែមានជំនឿថា មនោសញ្ចេតនារវាងខ្មែរនិងខ្មែរនឹងអាចរុញឲ្យមានចរចានៅថ្ងៃណាមួយជាក់ជាពុំខាន។
យ៉ាងណាក៏ដោយ លោក សុខ ឥសាន អ្នកនាំពាក្យគណបក្សប្រជាជន បានអះអាងប្រាប់វិទ្យុបារាំងជាថ្មីទៀតថា ទោះក្នុងកាលៈទេសៈណាក៏ដោយ គ្មានឡើយការចរចាខាងនយោបាយដើម្បីឈានទៅដល់ការដោះលែងលោក កឹម សុខា។ សម្រាប់លោក សុខ ឥសាន សំណុំរឿងលោក កឹម សុខា គឺមានជាប់ទាក់ទងទៅនឹងរឿងរ៉ាវក្បត់ជាតិដែលមិនអាចដោះលែងឲ្យនៅក្រៅឃុំតាមរយៈការចរចាបានឡើយ។ អ្នកនាំពាក្យរូបនេះក៏បានចាត់ទុកសម្ដីមេធាវីលោក កឹម សុខា ថាគ្រាន់តែជាទស្សៈបុគ្គល ដែលមានមនោសញ្ចេតនាចំពោះកូនក្ដីខ្លួនឯងតែប៉ុណ្ណោះ។
អំពីចរចានេះដែរ កន្លងមកលោក សម រង្ស៊ី អតីតប្រធាននៃអតីតគណបក្សសង្គ្រោះជាតិ បានទទូចសុំចរចាជាមួយគណបក្សកាន់អំណាច ដោយតម្កល់ផលប្រយោជន៍ជាតិជាធំ។ លោក សម រង្ស៊ី ធ្លាប់បានជំរុញឲ្យលោកនាយករដ្ឋមន្រ្តីចរចាជាមួយលោកកឹម សុខា ឬថ្នាក់ដឹកនាំអតីតបក្សប្រឆាំងដទៃទៀត ប្រសិនបើលោកនាយករដ្ឋមន្រ្តីហ៊ុន សែន មិនចង់និយាយជាមួយសម រង្ស៊ី។ ប៉ុន្តែលោក ហ៊ុន សែន នាយករដ្ឋមន្ដ្រី បានប្រកាសដាច់ណាត់ហើយថា គ្មានការចរចាជាមួយអតីតបក្សប្រឆាំងទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ