លីកាដូលុបចោលគម្រោងជួបស្រ្តីក្នុងពន្ធនាគារ ក្រោមមូលហេតុរឹតត្បិតសកម្មភាព
នៅថ្ងៃទី០៥ មីនានេះ អង្គការលីកាដូ បានប្រកាសលុបចោលកម្មវិធីទិវាសិទ្ធិនារីអន្តរជាតិនៅក្នុងពន្ធនាគារនៅទូទាំងប្រទេស។ ជាកម្មវិធីដែលអង្គការការពារសិទ្ធិមនុស្សមួយនេះ តែងតែធ្វើឡើងនៅថ្ងៃទី៨មីនាជារៀងរាល់ឆ្នាំ ដើម្បីផ្តល់សម្ភារៈចាំបាច់មួយចំនួន និងការកម្សាន្តផ្សេងៗដល់ស្រ្តីដែលកំពុងជាប់ពន្ធនាគារ។ លីកាដូ បានលើកហេតុផលថា ការលុបចោលនេះ គឺដោយសារតែអគ្គនាយកដ្ឋានពន្ធនាគារនៃក្រសួងមហាផ្ទៃ បានរឹតត្បិតសកម្មភាពរបស់ខ្លួន។ ប៉ុន្តែក្រសួងមហាផ្ទៃអះអាងថា ការរឹតត្បិតនេះធ្វើឡើងក្រោមហេតុផលបញ្ហាសន្តិសុខ។
ចុះផ្សាយនៅថ្ងៃ៖
ស្តាប់ - ០២:១៨
ការសម្រេចនេះបានធ្វើឡើង បន្ទាប់ពីអគ្គនាយកដ្ឋានពន្ធនាគារនៃក្រសួងមហាផ្ទៃ បានសម្រេចមិនឲ្យអង្គការលីកាដូធ្វើសកម្មភាពបានទូលំទូលាយជាមួយស្រ្តីនៅក្នុងពន្ធនាគារដូចដែលខ្លួនធ្លាប់ធ្វើជារៀងរាល់ឆ្នាំ។ ជារៀងរាល់ឆ្នាំដែលអង្គការនេះ តែងតែបានរៀបចំកម្មវិធីកម្សាន្តផ្សេងៗនៅក្នុងពន្ធនាគារដូចជា ការថ្លែងសុន្ទរកថា ការលេងល្បែងកម្សាន្ត ការរាំរបាំប្រពៃណី ការសម្តែងរបស់ស្រ្តីកំពុងជាប់ឃុំ និងការផ្តល់នូវកញ្ចប់សម្ភារៈចាំបាច់មួយចំនួនដល់អ្នកទាំងនោះផងដែរ។
តាមសេចក្តីប្រកាសព័ត៌មានរបស់ខ្លួននៅថ្ងៃទី០៥ មីនានេះ អង្គការលីកាដូបានបញ្ជាក់ថា ការរឹតត្បិតលើសកម្មភាពប្រារព្ធទិវាសិទ្ធិនារីអន្តរជាតិនៅក្នុងពន្ធនាគារ បានចាប់ផ្តើមឡើងតាំងពីឆ្នាំមុនមកម្លេះ។ ប៉ុន្តែគ្រាន់តែនៅឆ្នាំ២០១៥នេះ ការរឹតត្បិតរបស់អគ្គនាយកដ្ឋានពន្ធនាគារនៃក្រសួងមហាផ្ទៃធ្វើឡើងកាន់តែខ្លាំងថែមទៀត។
លោកស្រីពុង ឈីវកេក នាយិកាអង្គការលីកាដូ បានប្រសាសន៍ថា នៅឆ្នាំនេះ អគ្គនាយកដ្ឋានពន្ធនាគារនៃក្រសួងមហាផ្ទៃបានសម្រេចឲ្យបុគ្គលិកអង្គការលីកាដូជាជនជាតិខ្មែរតែ៥នាក់ប៉ុណ្ណោះចូលទៅក្នុងពន្ធនាគារ ដើម្បីចែកជូនកញ្ចប់សម្ភារៈទៅដល់ស្រ្តីអ្នកកំពុងជាប់ឃុំ។ ជាងនេះទៅទៀត អគ្គនាយកដ្ឋានពន្ធនាគារមិនអនុញ្ញាតឲ្យមានសំណេះសំណាល ឫរៀបចំកម្មវិធីកម្សាន្តផ្សេងៗដូចមុននោះទេ។ ជាមួយគ្នានេះ អ្នកនាងនូ សមអន អ្នកគ្រប់គ្រងគម្រោងពន្ធនាគារនៃអង្គការលីកាដូ បានបន្ថែមថា ការរឹតត្បិតនេះ កាន់តែធ្វើឲ្យអ្នកកំពុងឃុំដែលឯកោស្រាប់ទៅហើយនោះ កាន់តែឯកោខ្លាំងថែមទៀត។
អគ្គនាយកដ្ឋានពន្ធនាគារនៃក្រសួងមហាផ្ទៃ មិនអាចទាក់ទងសុំការអត្ថាធិប្បាយជុំវិញករណីនេះបាននោះទេនៅថ្ងៃព្រហស្បតិ៍ទី០៥ មីនានេះ។ ក៏ប៉ុន្តែលោកខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ថា ការសម្រេចរឹតត្បិតលើសកម្មភាពរបស់អង្គការលីកាដូនេះ គឺធ្វើឡើងដោយគោរពទៅតាមច្បាប់ និង បទបញ្ជាផ្ទៃក្នុងនៃពន្ធនាគារ ជាពិសេស គឺគិតលើបញ្ហាសន្តិសុខនៅក្នុងពន្ធនាគារតែម្តង។
លោកស្រីពុង ឈីវកេកបានសម្តែងការសោកស្តាយយ៉ាងខ្លាំងចំពោះការសម្រេចរបស់អគ្គនាយកដ្ឋានពន្ធនាគារនៃក្រសួងមហាផ្ទៃនេះ ដោយលើកឡើងថា វាជាការខាតបង់មួយចំពោះស្ត្រីដែលកំពុងជាប់ពន្ធនាគារ។ តែយ៉ាងណាក៏ដោយ លោកស្រីនាយិកាអង្គការលីកាដូ បានគូសបញ្ជាក់ថា នៅឆ្នាំក្រោយលោកស្រីនឹងធ្វើស្នើសុំទៅកាន់អគ្គនាយកដ្ឋានពន្ធនាគារម្តងទៀត ប៉ុន្តែបើនៅតែមានការរឹតត្បិតបែបនេះទៀតនោះ លីកាដូនឹងគោរពទៅតាមការសម្រេចរបស់គណៈកម្មាការគ្រប់គ្រងខ្លួនថា ត្រូវធ្វើបែបណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ