ស្ត្រី១៦នាក់ នឹងត្រូវដោះលែងនៅថ្ងៃទិវាសិទ្ធិនារីអន្តរជាតិ ៨មីនា ឆ្នាំ២០១៥
គណៈកម្មការអន្តរក្រសួងដែលដឹកនាំដោយលោកអង្គ វង្សវឌ្ឍនា រដ្ឋមន្ត្រីក្រសួងយុត្តិធម៌កំពុងរៀបចំសំណើមួយទៅកាន់លោកនាយករដ្ឋមន្ត្រី ហ៊ុន សែន ដើម្បីស្នើបន្តទៅកាន់ព្រះមហាក្សត្រឡាយព្រះហស្ថលេខាលើកលែងទោសស្ត្រី១៦នាក់ ចេញពីពន្ធនាគារ។ ការដោះលែង នឹងធ្វើឡើង ឲ្យចំនឹងការប្រារព្ធទិវាសិទ្ធិនារីអន្តរជាតិ នៅថ្ងៃទី៨ខែមីនាខាងមុខនេះ តាមរយៈពិធីផ្លូវការមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ស្ត្រីទាំង១៦នាក់ ដែលត្រូវស្នើសុំដោះលែងនៅថ្ងៃទី៨ខែមិនាខាងមុខ ម្នាក់គឺជាស្ត្រីដែលកំពុងមានផ្ទៃពោះ និង១៥នាក់ទៀត គឺជាស្ត្រីដែលមានកូនតូចៗនៅក្នុងពន្ធនាគា។ សំណើរសុំដោះលែងនេះ បានធ្វើឡើង កាលពីថ្ងៃព្រហស្បត្តិ៍ទី២៦កុម្ភៈ ក្រោយពីមានកិច្ចប្រជុំរបស់គណៈកម្មការមួយ ដឹកនាំដោយ លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ជាប្រធាន លោកស្រី អ៊ឹង គន្ថាផាវី រដ្ឋមន្ត្រីក្រសួងកិច្ចការនារីជាអនុប្រធាន និងតំណាងជាច្រើនទៀត មកពីទីស្តីការគណៈរដ្ឋមន្ត្រី និងក្រសួងមហាផ្ទៃ។ សំណើរសុំលើកលែងទោសនេះ កំពុងដាក់ទៅកាន់លោកនាយករដ្ឋមន្ត្រី ហ៊ុន សែន ដើម្បីពិនិត្យ និងស្នើបន្តទៅកាន់ព្រះមហាក្សត្រឡាយព្រះហស្ថលេខាសម្រេចជាចុងក្រោយ ពោលគឺនឹងធ្វើអោយបានរួចជាស្រេចនៅថ្ងៃទី៨ខែមិនាខាងមុខ ដែលត្រូវនឹងថ្ងៃប្រារព្ធទិវាសិទ្ធិនារីអន្តរជាតិ៨មិនា។ បើតាមលោក គឹម សន្តិភាព អ្នកនាំពាក្យក្រសួងយុត្តិធម៌ ពិធីផ្លូវការមួយនឹងរៀបចំធ្វើឡើង នៅថ្ងៃនោះ។
សូមបញ្ជាក់ថា គណៈកម្មការពិនិត្យ ស្រង់ស្ថិតិ និងរៀបចំបែបបទដើម្បីធ្វើការលើកលែងទោស ស្ត្រីមានគត៌និងមានកូនដែលជាប់ពន្ធនាគារនេះ បានធ្វើឡើង ក្រោយពីមានបទបញ្ជារបស់លោកនាយករដ្ឋមន្ត្រី ហ៊ុន សែន ដែលបានស្នើអោយមានការពិនិត្យទៅលើស្ត្រីដែលកំពុងជាប់ពន្ធនាគាប្រមាណជា៤០នាក់ ប៉ុន្តែក្រោយពីពិនិត្យមើលរបាយការណ៍ដែលបានផ្ញើមកពីពន្ធនាគាទាំង២៨នៅទូទាំងប្រទេស មានតែស្ត្រីចំនួន១៦នាក់ប៉ុណ្ណោះ ដែលត្រូវបានសម្រេចស្នើសុំអោយលើកលែងទោសលើកនេះ។ លោកថា ការដោះលែងនេះ បានធ្វើឡើងដោយផ្អែកទៅតាមមាត្រា៧៧នៃច្បាប់ពន្ធនាគា និងសាលក្រមស្ថាពររបស់តុលាការ។
យ៉ាងណាក៍ដោយ លោក គឹម សន្តិភាព បានអះអាងថា ការពិនិត្យទៅលើការស្នើសុំដោះលែងនិងលើកលែងទោសលើស្ត្រីជាប់ពន្ធនាគានេះ នឹងធ្វើបន្តចាប់ពីពេលនេះ រហូតដល់ថ្ងៃបុណ្យចូលឆ្នាំខ្មែរខាងមុខ ដែលជាឳកាសមួយក្នុងចំនោមឳកាសទាំងបីនៃការដោះលែងរឺបន្ធូបន្ថយទោសប្រចាំឆ្នាំ គឺនៅក្នុងពេលបុណ្យចូលឆ្នាំខ្មែរ បុណ្យអុំទូក និងបុណ្យពិសាខបូជា។
គួរកត់សំគាល់ថា សំណើរសុំលើកលែងទោសដល់ស្ត្រីដែលមានផ្ទៃពោះនិងស្ត្រីដែលមានកូនតូចៗនៅក្នុងពន្ធនាគាទាំង១៦នាក់នេះ ក៍បានធ្វើឡើងមួយខែក្រោយពីការចេញរបាយការណ៍របស់អង្គការសិទ្ធិមនុស្សលីកាដូថា ស្ត្រីមានផ្ទៃពោះ និងស្ត្រីទើបតែសម្រាលកូនដែលកំពុងជាប់ពន្ធនាគារនៅក្នុងប្រទេសកម្ពុជា ទទួលបានការថែទាំសុខភាពតិចតួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ