តុលាការក្រុងភ្នំពេញកោះហៅលោកសម រង្ស៊ី មកជំនុំជម្រះរឿងសមគំនិតក្លែងឯកសារព្រំដែន
សាលាដំបូងរាជធានីភ្នំពេញ បានចេញដីកាកោះហៅលោកសម រង្ស៊ី ប្រធានគណបក្សសង្គ្រោះជាតិដែលកំពុងស្នាក់នៅឯបរទេសឲ្យចូលខ្លួនមកកាន់តុលាការនៅថ្ងៃទី២៥ វិច្ឆិកាខាងមុខនេះ ដើម្បីធ្វើការជំនុំជម្រះក្នុងសំណុំរឿងសមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។ នេះតាមដីកាកោះហៅកាលពីថ្ងៃទី២៣ សីហា និងទើបធ្លាក់ដល់ដៃសារព័ត៌មាននៅរសៀលថ្ងៃសៅរ៍នេះ។
ចុះផ្សាយនៅថ្ងៃ៖
ស្តាប់ - ០២:៤៥
នៅក្នុងដីកាកោះហៅចេញកាលពីថ្ងៃទី២៣ សីហានេះ លោកសៀង សុខ ដែលជាតំណាងអយ្យការសាលាដំបូងរាជធានីភ្នំពេញ បានបង្គាប់ឲ្យលោកសម រង្ស៊ី ចូលខ្លួនមកកាន់តុលាការនៅថ្ងៃទី២៥ វិច្ឆិកា ឆ្នាំ២០១៦ នៅវេលាម៉ោង៨ព្រឹកជាកំហិត ដើម្បីធ្វើការជំនុំជម្រះក្នុងឋានៈជាជនជាប់ចោទ។ តាមដីកោះហៅនេះ សំណុំរឿងលោកសម រង្ស៊ី ត្រូវបានបញ្ជូនមកជំនុំជម្រះកាលពីថ្ងៃទី២៨ កក្កដាកន្លងទៅ ដោយតំណាងអយ្យការបានចោទប្រកាន់ប្រធានគណបក្សប្រឆាំងពីបទសមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមកាលពីថ្ងៃទី១២ និង១៣ ខែសីហា ឆ្នាំ២០១៥ ដែលប្រព្រឹត្តទៅនៅក្នុងរាជធានីភ្នំពេញ។ បទចោទនេះ គឺទាក់ទងនឹងការក្លែងសន្ធិសញ្ញាព្រំដែនកម្ពុជា-វៀតណាម។
លោកសំ សុគង់ មេធាវីការពារក្តីឲ្យលោកសម រង្ស៊ី បានឲ្យដឹងថា មកដល់ពេលនេះ លោកមិនទាន់ទទួលបានលិខិតអញ្ជើញឲ្យចូលរួមសវនាការពីតុលាការនៅឡើយទេ។ តែទោះជាយ៉ាងណា លោកបញ្ជាក់ថា លោកនឹងចូលរួមនៅក្នុងសវនាការនាពេលខាងមុខ និងត្រៀមរៀបចំឯកសារភស្តតាង និងសិក្សាផ្លូវច្បាប់នានា ដើម្បីការពារកូនក្តីរបស់លោក។
ចំណែកលោកអេង ឆៃអ៊ាង មន្ត្រីជាន់ខ្ពស់របស់គណបក្សសង្គ្រោះជាតិវិញ លោកហាក់ដូចជាមិនបានចាប់អារម្មណ៍នឹងដីកោះហៅនេះសោះឡើយ។ សម្រាប់មន្ត្រីជាន់ខ្ពស់រូបនេះ ករណីលោកសម រង្ស៊ី គឺជារឿងនយោបាយដែលត្រូវដោះស្រាយតាមផ្លូវនយោបាយ ហើយលោកបានសង្កត់ធ្ងន់ថា ការជំនុំជម្រះណាមួយលើមេដឹកនាំគណបក្សប្រឆាំងនោះ នឹងធ្វើឲ្យប៉ះពាល់ដល់ដំណើរការបោះឆ្នោតនាពេលខាងមុខនេះ។
ក្រៅពីករណីលោកសម រង្ស៊ី លោកកឹម សុខា ដែលជាអនុប្រធានគណបក្សសង្គ្រោះជាតិឯណេះវិញ ក៏ត្រូវបានតុលាការក្រុងភ្នំពេញរៀបចំបើកសវនាការធ្វើការជំនុំជម្រះផងដែរ គឺនឹងធ្វើឡើងនៅថ្ងៃទី៩ ខែកញ្ញាក្នុងសំណុំរឿង បដិសេធក្នុងការចូលខ្លួនបំភ្លឺទាក់ទងនឹងរឿងសញ្ចារកម្មនៅក្នុងសំណុំរឿងកញ្ញាស្រីមុំ ដែលបានប្រព្រឹត្តនៅរាជធានីភ្នំពេញ កាលពីថ្ងៃទី២៦ ខែឧសភា ឆ្នាំ២០១៦។
សូមគូសបញ្ជាក់ជូនថា សម្រាប់លោកសម រង្ស៊ី ក្រៅពីសំណុំរឿងនេះ លោកប្រមុខគណបក្សប្រឆាំងក៏រងនូវបណ្តឹងមួយចំនួនទៀតដែរ ដូចជា កាលពីថ្មីៗនេះ លោកត្រូវបានមេធាវីរបស់លោកនាយករដ្ឋមន្ត្រីហ៊ុន សែនប្តឹងពីបទបរិហារកេរ្តិ៍ដែលចោទរដ្ឋអំណាចខ្មែរ ថាជាអ្នករៀបចំអំពើភេរវកម្មបាញ់សម្លាប់លោកបណ្ឌិត កែម ឡី។
ចំណែករឿងបរិហារកេរ្តិ៍ជាមួយលោកហេង សំរិន ប្រធានរដ្ឋសភាវិញ លោកសម រង្ស៊ី ត្រូវបានតុលាការកាត់ក្តីឲ្យចាញ់ដោយត្រូវបង់ប្រាក់សងជំងឺចិត្តដល់លោកហេង សំរិនចំនួន១៥០លានរៀល។ កាលពីថ្ងៃទី១៣ វិច្ឆិកា ឆ្នាំមុន តុលាការក្រុងភ្នំពេញបានចេញដីកាចាប់ខ្លួនលោក សម រង្ស៊ី ដាក់ពន្ធនាគារនៅក្នុងសំណុំរឿងបរិហារកេរ្តិ៍ជាសាធារណៈ និងញុះញង់ឲ្យមានការរើសអើងលើលោក ហោ ណាំហុង ដែលអតីតរដ្ឋមន្ត្រីក្រសួងការបរទេសកម្ពុជា។ ដោយឡែកនៅថ្ងៃទី១៧ ខែតុលា ឆ្នាំ២០១៦ខាងមុខ តុលាការដដែលនេះ នឹងជំនុំជម្រះលោកសម រង្ស៊ី លើបណ្តឹងបរិហារកេរ្តិ៍ជាសាធារណៈរបស់លោកសោម សឿន ទីប្រឹក្សាលោកនាយករដ្ឋមន្ត្រី ហ៊ុន សែន ក្នុងសំណុំរឿងលោកសម រង្ស៊ី លើកឡើងពីបង្កើតគណនីយក្លែងក្លាយចុចLIKE ទំព័រហ្វេសប៊ុករបស់លោកនាយករដ្ឋមន្ត្រីហ៊ុន សែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ