សពស្ថាបត្យករខ្មែរដ៏ល្បីល្បាញ វណ្ណ ម៉ូលីវណ្ណ នឹងត្រូវបូជានៅរសៀលថ្ងៃស្អែក
សពលោកវណ្ណ ម៉ូលីវណ្ណ ដែលជាស្ថាបត្យករខ្មែរដ៏ល្បីល្បាញម្នាក់ នឹងត្រូវដង្ហែយកទៅបូជានៅរសៀល ថ្ងៃអាទិត្យស្អែកនេះ។ លោក វណ្ណ ម៉ូលីវណ្ណ បានទទួលមរណៈភាពកាលពីវេលាម៉ោង០៩និង៤៥នាទី នាព្រឹកថ្ងៃទី២៨ខែកញ្ញា ក្នុងជន្មាយុ៩១ឆ្នាំ ដោយជរាពាធ ។ សពរបស់លោកកំពុងត្រូវបានតម្កល់នៅគេហដ្ឋានឯទីក្រុងសៀមរាប ដើម្បីធ្វើបុណ្យតាមប្រពៃណី។
ចុះផ្សាយនៅថ្ងៃ៖
សពបិតាស្ថាបត្យករខ្មែរ វណ្ណ ម៉ូលីវណ្ណនឹងត្រូវដង្ហែទៅបូជានៅក្នុងវត្តព្រះឥន្ទ្រកោសីយ៍ ហៅវត្តលើ ស្ថិតនៅក្នុងភូមិទ្រាំង ឃុំស្លក្រាម ក្រុងសៀមរាប ខេត្តសៀមរាប នារសៀលថ្ងៃអាទិត្យ ទី ០១ ខែតុលា។ ក្រោយពេលបូជារួច អដ្ឋិធាតុរបស់លោក វណ្ណ ម៉ូលីវណ្ណ នឹងត្រូវតម្កល់នៅក្នុងចេតិយមានរចនាបទប្រាសាទបាគង ដែលលោកបានគូសប្លង់និងសាងសង់ទុកនៅក្នុងបរិវេណវត្តព្រះឥន្ទ្រកោសីយ៍តែម្ដង។
អាជ្ញាធរជាតិអប្សរា បានជូនដំណឹងដល់មន្ត្រីនិងបុគ្គលិករបស់ខ្លួនទាំងអស់ ឲ្យចូលរួមដង្ហែសពលោក វណ្ណ ម៉ូលីវណ្ណ ឲ្យបានគ្រប់ៗគ្នា ដែលពិធីដង្ហែនឹងប្រព្រឹត្តទៅចាប់ពីម៉ោង១២និង៣០នាទីថ្ងៃត្រង់តទៅ។ អាជ្ញាធរជាតិអប្សរា បានបញ្ជាក់ថា ការចូលរួមដង្ហែសពលោកវណ្ណ ម៉ូលីវណ្ណនេះ គឺដើម្បីជាការតបស្នងសងនូវគុណូបការៈដ៏ធំធេងរបស់លោកចំពោះជាតិមាតុភូមិកម្ពុជា ក្នុងនាមជាស្ថាបត្យករ និងជាពិសេសក្នុងនាមជាប្រធានអគ្គនាយកអាជ្ញាធរជាតិអប្សរា។
លោកវណ្ណ ម៉ូលីវណ្ណ បានទទួលមរណភាពកាលពីព្រឹកថ្ងៃព្រហស្បតិ៍ ទី២៨កញ្ញា ក្នុងជន្មាយុ៩១ឆ្នាំ ដោយជរាពាធ។ ភ្លាមៗ លោកនាយករដ្ឋមន្ត្រីហ៊ុន សែន ប្រមុខរដ្ឋាភិបាលកកម្ពុជា បានចាត់ទុកមរណភាពរបស់លោកវណ្ណ ម៉ូលីវណ្ណ ថាជាការបាត់បង់នូវធនធានមនុស្សដ៏សំខាន់ម្នាក់របស់ជាតិ។ លោកនាយករដ្ឋមន្ត្រីក៏បានផ្ញើសារចូលរំលែកទុក្ខជាមួយក្រុមគ្រួសារសព ចំពោះការបាត់បង់ស្ថាបត្យករជើងចាស់ដ៏ល្បីល្បាញរូបនេះ។
គួរបញ្ជាក់ឲ្យដឹងថា ក្នុងអំឡុងពេលសពលោកវណ្ណ ម៉ូលីវណ្ណ កំពុងតម្កល់ទុកនៅឯគេហដ្ឋានរបស់លោក ដើម្បីអាចឲ្យប្រជាពលរដ្ឋទូទៅក៏ដូចជាបណ្តាមន្ត្រីរាជការចូលដាក់កម្រងផ្កាគោរពវិញ្ញាណក្ខន្ធនោះ ព្រះមហាក្សត្រខ្មែរ ក៏បានប្រទានគ្រឿងឥស្សរិយយសបច្ឆាមរណៈចំនួន ៥ ក្នុងពេលតែមួយ ដល់សពលោកវណ្ណ ម៉ូលីវណ្ណផងដែរ។
ក្នុងនាមជាស្ថាបត្យករក៏ល្បីឈ្មោះម្នាក់ បើទោះលោកវណ្ណ ម៉ូលីវណ្ណ បានធ្វើមរណកាលទៅក៏ដោយ ក៏ប៉ុន្តែលោកបានបន្សល់ទុកនូវស្នាដៃសំណង់ធំៗជាច្រើនដល់កូនខ្មែរជំនាន់ក្រោយដូចជា សាលសន្និសីទចតុមុខ វិមានឯករាជ្យ ពហុកីឡាដ្ឋានជាតិអូឡាំពិក វិមានរដ្ឋចំការមន វិទ្យាសា្ថនភាសាបរទេស សំណង់ស្ថានទូតខ្មែរនៅបរទេស និងអគារស្នាក់នៅរួមគ្នាជាច្រើនផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ