ប្រធានសមាគមអាដហុក៖ ពលរដ្ឋខ្មែរចូលរួមខ្លាំងក្លាក្នុងការបោះឆ្នោត
លោក ធន សារាយ ប្រធានសមាគមអាដហុក បានកត់សម្គាល់ថា ប្រជាពលរដ្ឋខ្មែរមានសកម្មភាពខ្លាំងក្លាជាងមុនក្នុងគ្រប់ដំណាក់កាលនៃការបោះឆ្នោត។ ជាសកម្មភាពដែល ប្រធានសមាគមអាដហុករូបនេះ ចាត់ទុកថា ជាជំហានដ៏វិជ្ជមាន ឆ្ពោះទៅកាន់លទ្ធិប្រជាធិបតេយ្យមួយពេញលេញ។ នេះបើតាមឃ្លីបវីដេអូចុះផ្សាយក្នុងទំព័រហ្វេសប៊ុករបស់សមាគមអាដហុក នៅថ្ងៃសុក្រម្សិលមិញ។
ចុះផ្សាយនៅថ្ងៃ៖
ស្តាប់ - ០១:៥៧
ដ្បិតតែមិនមានវត្តមាននៅក្នុងស្រុក ប៉ុន្តែលោក ធន សារាយ បានតាមដានយ៉ាងជាប់លាប់អំពីដំណើរការបោះឆ្នោតឃុំសង្កាត់នៅកម្ពុជា។ នៅក្នុងសារវីដេអូ រយៈពេលជិត៧នាទី លោក ធន សារ៉ាយ សង្កេតឃើញថា ប្រជាពលរដ្ឋខ្មែរ យល់ដឹងកាន់តែច្រើនអំពីសិទ្ធិនយោបាយរបស់ខ្លួន។ មិនត្រឹមតែប៉ុណ្ណោះ ពួកគាត់ថែមទាំងបានចូលរួមយ៉ាងសស្រាក់សស្រាំ នៅក្នុងដំណើរការបោះឆ្នោត រាប់ចាប់តាំងពីការតាមដានគោលនយោបាយរបស់គណបក្ស បញ្ចេញមតិ ចូលរួមឃោសនា និងអញ្ជើញទៅបោះឆ្នោតថែមទៀត។
សម្រាប់ លោក ធន សារាយ ការចូលរួមរបស់ពលរដ្ឋដូច្នេះ គឺជាការបំពេញតួនាទីជាម្ចាស់អំណាច និងម្ចាស់ឆ្នោត ធ្វើឲ្យអ្នកដឹកនាំនយោបាយ គោរពកោតខ្លាចពួកគាត់កាន់តែច្រើន។
ចំណែកសកម្មជននិងអ្នកគាំទ្រនយោបាយវិញ ប្រធានសមាគមអាដហុក បានកត់សម្គាល់ពីចម្ងាយថា មានកាយវិការជាគំរូ ដោយមិនចាត់ទុកគ្នាជាសត្រូវឡើយ បើទោះបីជាគាំទ្រគណបក្សនយោបាយផ្សេងគ្នាក៏ដោយ។ មិនត្រឹមតែមិនចាត់ទុកគ្នាជាសត្រូវទេ អ្នកគាំទ្រនយោបាយដែលពាក់អាវបក្សផ្សេងគ្នា ថែមទាំងថតរូបជាមួយគ្នាជាអនុស្សាវរីយ៍ ជួយគ្នាក្នុងយុទ្ធនាការឃោសនាបោះឆ្នោត និងគោរពគ្នាប្រកបដោយសីលធម៌ទៀតផង។ ទាំងនេះ បើតាមលោក ធន សារាយ វាបានបង្ហាញពីឆន្ទៈរបស់ប្រជាជន ដែលចង់ឃើញដំណើរការអភិវឌ្ឍ ផ្សារភ្ជាប់ទៅនឹងលទ្ធិប្រជាធិបតេយ្យសេរីពហុបក្ស ការគោរពសិទ្ធិមនុស្ស និងការបោះឆ្នោតដោយសេរីនិងយុត្តិធម៌។ លោកជឿថា ទៅថ្ងៃមុខ ប្រជាពលរដ្ឋខ្មែរ នឹងអាចសម្រេចបាននូវភាពជាម្ចាស់អំណាចពិតប្រាកដក្នុងកម្រិតខ្ពស់ ដូចប្រទេសសេរីផ្សេងទៀតជាក់ជាពុំខាន។
ក្រៅពីនេះ ប្រធានសមាគមអាដហុក ក៏បានអំពាវនាវឲ្យអ្នកនយោបាយ យកទង្វើរបស់ប្រជាជនជាគំរូ ដោយត្រៀមទទួលយកលទ្ធផលទាំងឈ្នះនិងចាញ់នៅក្នុងល្បែងប្រជាធិបតេយ្យ ហើយមិនគួរនិយាយថា បើបក្សខ្លួនចាញ់ នឹងកើតមានសង្គ្រាមឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ