ខ្លោងទ្វារអង្គរសង្រ្កាន្តត្រូវបានគេលួចដុតបន្ទាប់ពីមានរឿងចម្រូងចម្រាស់
បន្ទាប់ពីមានរឿងចម្រូងចម្រាស់ជុំវិញការសាងសង់ខ្លោងទ្វារអង្គរសង្ក្រាន្តនៅក្នុងតំបន់អង្គរនៅប៉ុន្មានថ្ងៃចុងក្រោយនេះមកនៅយប់ថ្ងៃទី៦ឈានចូលថ្ងៃទី៧មេសានេះ ខ្លោងទ្វារអង្គរសង្ក្រាន្តមួយត្រូវបានគេលួចដុត។ដោយឡែកចំពោះការសាងសង់ឡើងវិញឬក៏យ៉ាងណានោះនៅមិនទាន់ដឹងនៅឡើយទេ ដោយត្រូវរង់ចាំការស្រាវជ្រាវពីខាងសម្ថតិកិច្ចជាមុនសិន។នេះបើតាមការញ្ជាក់របស់អ្នកនាំពាក្យព្រឹត្តិការណ៍អង្គរសង្ក្រាន្ត។
ចុះផ្សាយនៅថ្ងៃ៖
ស្តាប់ - ០១:៣៣
ខ្លោងទ្វារអង្គរសង្ក្រាន្តមួយក្នុងចំណោមពីរដែលត្រូវបានសាងសង់ឡើងដើម្បីអបអរព្រឹត្តិការណ៍អង្គរសង្ក្រាន្តក្នុងទឹកអង្គរសៀមរាបក្នុងឱកាសបុណ្យចូលឆ្នាំខ្មែរប្រពៃណីជាតិត្រូវបានដុតបំផ្លាញនៅយប់ថ្ងៃចន្ទឈានចូលថ្ងៃអង្គារនេះ។ខ្លោងទ្វារដែលត្រូវបានដុតគឺខ្លោងទ្វារដែលស្ថិតនៅខាងមុខប្រាសាទអង្គរវត្តមកពីខាងព្រលានយន្តហោះហើយខ្លោងទ្វារមួយទៀតដែលស្ថិតនៅកាច់ជ្រុងប៉ូលីសបេតិកភ័ណ្ឌមិនមានការខូចខាតនោះទេ។
លោកសោមរតនាអ្នកនាំពាក្យព្រឹត្តិការណ៍អង្គរសង្ក្រាន្តបានបញ្ជាក់ប្រាប់វិទ្យុបារាំងនៅព្រឹកនេះថាខាងសហភាពសហព័ន្ធយុវជនកម្ពុជានៅមិនទាន់សម្រេចថាធ្វើការសាងសង់ខ្លោងទ្វារអង្គរសង្រ្កាន្តនៅខាងមុខប្រាសាទអង្គរវត្តឡើងវិញឬក៏យ៉ាងណានោះទេ។ហើយចំពោះការដុតវិញក៏មិនទាន់អាចធ្វើអត្ថាធិប្បាយបានដែរដោយត្រូវរង់ចាំការស៊ើបអង្កេតពីខាងអាជ្ញាធរមានសម្ថតិកិច្ចជាមុនសិន។
កាលពីថ្ងៃចន្ទលោកហ៊ុនម៉ានីប្រធានសហភាពសហព័ន្ធយុវជនកម្ពុជាបានបញ្ជាក់នៅក្នុងទំព័រហ្វេសប៊ុកថាក្រុមការងារនឹងព្យាយាមកែលម្អរឲ្យបានប្រសើរជាងនេះខណៈដែលការងារនេះក៏មិនទាន់រួចរាល់ទាំងស្រុងនៅឡើយ។ហើយការកែលម្អរនេះត្រូវបានធ្វើឡើងដើម្បីមិនចង់ឲ្យមានប្រជាពលរដ្ឋក្រុមណាមួយអាក់អន់ចិត្តចំពោះការតុបតែងលំអរនេះឡើយ។
សូមបញ្ជាក់ថានៅប៉ុន្មានថ្ងៃចុងក្រោយនេះមានការរិះគន់យ៉ាងច្រើននៅលើបណ្តាញសង្គមហ្វេសប៊ុកជុំវិញរចនាបទនៅលើខ្លោងទ្វារអង្គរសង្ក្រាន្តនៅក្នុងតំបន់អង្គរក្នុងទឹកដីសៀមរាប។អ្នករិះគន់នៅតែបន្តធ្វើឡើងហើយការឆ្លើយតបក៍មានវិញដែរពីមន្រ្តីរៀបចំព្រឹត្តិការណ៍អង្គរសង្រ្កាន្តរហូតដល់មន្រ្តីរដ្ឋាភិបាលប៉ុន្តែចុងក្រោយនេះការរិះគន់ត្រូវបានបង្វែរទិសទៅរកការចោទប្រកាន់គ្នាទៅវិញទៅមកថាជាការិះគន់ដើម្បីកេងចំណេញក្នុងហេតុផលនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ