នៅតំបន់អង្គរ ពលរដ្ឋមិនព្រមរុះរើសំណង់ ខណៈអាជ្ញាធរអប្សរានៅតែរក្សាជំហរអនុវត្តបទបញ្ជាឲ្យរុះរើ!
ថ្ងៃនេះ លំនៅដ្ឋាននិងតូបលក់ដូរនៅតំបន់អភិរក្សអង្គរ គឺត្រូវដល់ថ្ងៃកំណត់ឲ្យរុះរើហើយ! ក៏ប៉ុន្តែ ពលរដ្ឋនៅតែមានភាពស្ទាក់ស្ទើរ ហើយមិនទាន់បានរើរុះ ចំណែកអាជ្ញាធរអប្សរានៅតែរក្សាជំហរអនុវត្តបទបញ្ជាដដែល។ ភាពចម្រូងចម្រាស់នេះ កំពុងតែកើតឡើងខ្លាំងនៅក្នុងខេត្តសៀមរាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ពលរដ្ឋក្នុងសង្កាត់នគរធំ ដែលបានផ្តល់សម្ភាសឲ្យវិទ្យុបារាំង RFI, ពួកគេសុទ្ធតែមានភាពស្ទាក់ស្ទើរ ហើយអះអាងថាចាំមើលសភាពការណ៍ និងមើលគេមើលឯងសិន។ បុរសម្នាក់ដែលសង់តូបលក់អ៊ីវ៉ាន់ ប្រមាណ៣០ម៉ែត្រពីរបងប្រសាទបន្ទាយក្តី និយាយថា គាត់ទើបនឹងសាងសង់ថ្មីៗ តូបតូចមួយ ទំហំ៤ម៉ែត្រ សរសរឈើ ប្រក់ស័ង្កសី គ្មានជញ្ជាំងទេ សម្រាប់ទុកលក់ដូរ។
សំឡេង៖ ខ្ញុំខ្ចីលុយធនាគារដើម្បីសាងសង់ អស់ប្រហែលជាង៣ពាន់ដុល្លារ.
គួរបញ្ជាក់ថា សកម្មភាពសាងសង់ និងចាក់ដីបំពេញសំណង់ ខុសច្បាប់ក្នុងតំបន់អង្គរ មានជាង ៥២០ករណី ដែលក្នុងនោះ មានការរំលោភសាងសង់កៀកនឹងកំផែងប្រាសាទ។ អាជ្ញាធរជាតិអប្សរា បញ្ជាក់ថា សកម្មភាពរំលោភសាងសង់ ចាក់ដីបំពេញខុសច្បាប់ទាំងនេះ បានក្លាយជាសកម្មភាពអវិជ្ជមានដ៏ធ្ងន់ធ្ងរ ហើយធ្វើឲ្យអាប់ឱនដល់កិត្យានុភាពរបស់កម្ពុជា ក្នុងការថែរក្សា ការពារ និងអភិរក្សរមណីយដ្ឋានអង្គរ។ អាជ្ញាធរជាតិអប្សរា បានដាក់កំណត់ឲ្យចំនួន៧ថ្ងៃជាកំហិតឲ្យរុះរើ ដែលត្រូវផុតកំណត់នៅថ្ងៃទី១៥មិថុនានេះ។ បើពុំដូច្នោះទេ អាជ្ញាធរជំនាញ នឹងសហការជាមួយកម្លាំងចម្រុះ ចុះរុះរើចេញវិញ។ នៅថ្ងៃនេះតែម្តង អ្នកនាំពាក្យអាជ្ញាធរជាតិអប្សរា បញ្ជាក់ប្រាប់វិទ្យុបារាំង គឺនៅតែរក្សាជំហរអនុវត្តតាមបទបញ្ជារបស់ខ្លូនដដែល។
ចំពោះ លោក សៀក ចំណាប់ ដែលជាអនាគតចៅសង្កាត់ថ្មី កូតាបក្សសង្គ្រោះជាតិ នៅក្នុងសង្កាត់នគរធំ ដែលបានតាមដានរឿងនេះយ៉ាងដិតដល់ និងបានប្រាប់វិទ្យុបារាំងថា ការសាងសង់របស់ពលរដ្ឋនៅមូលដូលដ្ឋាននោះ មានទាំងផ្ទះ តូបលក់ដូរ និងការចាក់ដី ដែលធ្វើឡើងក្នុងអំលុងពេលឃោសនាបោះឆ្នោតឃុំសង្កាត់កន្លងទៅនេះ។ ក៏ប៉ុន្តែ នៅក្នុងសង្កាត់នេះ បក្សប្រជាជនកម្ពុជា បាត់បង់កៅអីចៅសង្កាត់ឲ្យទៅបក្សប្រឆាំង ទើបមានការចេញដោរធ្ងន់ធ្ងរយ៉ាងដូច្នោះ។
ចំពោះអនាគតចៅសង្កាត់ថ្មីរូបនេះ គឺទាល់តែថាមានយន្តការសម្របសម្រួលគ្នា រវាងអាជ្ញាធរមូលដ្ឋាន អាជ្ញាធរជាតិអប្សរា និងពលរដ្ឋ បើពុំដូច្នេះ អ្នកវេទនាជាងគេ គឺពលរដ្ឋដែលខ្ចីលុយធនាគារ សាងសង់ផ្ទះ និងតូបដើម្បីលក់ដូររកស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ