កិច្ចប្រជុំកំពូលអាស៊ាន-អាមេរិក បិទបញ្ចប់ដោយសេចក្ដីថ្លែងការណ៍រួម១៧ចំណុច
កិច្ចប្រជុំកំពូលអាស៊ាន អាមេរិក ដែលចាប់ផ្ដើមនៅយប់ថ្ងៃចន្ទ បានបិទបញ្ចប់ជាស្ថាពរហើយ នៅយប់ថ្ងៃអង្គារ នៅសហរដ្ឋអាមេរិក ត្រូវនឹងព្រឹកថ្ងៃពុធនេះ នៅកម្ពុជា។ លទ្ធផលនៃកិច្ចប្រជុំនេះ ត្រូវបានបូកសរុបដោយសេចក្ដីថ្លែងការណ៍រួម ចែងពីបញ្ហានានាចំនួន១៧ចំណុច។ ជាការកត់សម្គាល់ នៅក្នុងសេចក្ដីថ្លែងការណ៍រួមទាំង១៧ចំណុចនោះ មាន៤ចំណុចរួចទៅហើយ ដែលនិយាយសំដៅដល់ប្រទេសចិន និងបញ្ហាសមុទ្រចិនខាងត្បូង។ យ៉ាងណាក៏ដោយ បញ្ហាប្រទេសចិន និងសមុទ្រចិនខាងត្បូងនោះ គ្រាន់តែត្រូវបានលើកឡើងយ៉ាងសើរៗ និងដោយប្រយោលតែប៉ុណ្ណោះ ខណៈដែលចិន ទើបតែដាក់ពង្រាយប្រព័ន្ធមីស៊ីលបាញ់លើអាកាសដ៏ទំនើបទៅកាន់កោះជម្លោះប៉ារ៉ាសែលក្នុងសមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០២:៥៣
នៅក្នុងសេចក្ដីថ្លែងការណ៍រួមដែលចំនួន១៧ចំណុច អាមេរិកនិងអាស៊ាន បានបង្ហាញការប្ដេជ្ញាចិត្តរួមគ្នា ក្នុងការពង្រឹងនិងពង្រីកកំណើនសេដ្ឋកិច្ចនៅក្នុងតំបន់។ ដើម្បីសម្រេចកិច្ចការនេះ លោកប្រធានាធិបតីអាមេរិក បារ៉ាក់ អូបាម៉ា បានប្រកាសពីការបង្កើតការិយាល័យសេដ្ឋកិច្ចចំនួន៣ នៅទីក្រុងចាកាតាប្រទេសឥណ្ឌូនេស៊ី ទីក្រុងបាងកកប្រទេសថៃ និងនៅប្រទេសសិង្ហបុរី។ ការិយាល័យសេដ្ឋកិច្ចថ្មីទាំងបីនេះ ត្រូវបានលោក អូបាម៉ា វាយតម្លៃថា អាចធ្វើឲ្យប្រសើរឡើង នូវទំនាក់ទំនងរវាងអ្នកវិនិយោគ ក៏ដូចជាសេដ្ឋកិច្ចនៃប្រទេសអាស៊ាននិងអាមេរិក។
ក្រៅពីនោះ បញ្ហាផ្សេងទៀត ដូចជាការលើកកម្ពស់លទ្ធិប្រជាធិបតេយ្យ ការការពារសិទ្ធិមនុស្ស អភិបាលកិច្ចល្អ និងបរិស្ថាន ព្រមទាំងបញ្ហាសន្តិភាព និងសន្តិសុខនៅក្នុងតំបន់និងនៅលើពិភពលោក ក៏ត្រូវបានលើកឡើងនៅក្នុងសេចក្ដីថ្លែងការណ៍រួមនេះផងដែរ។ អាមេរិកនិងអាស៊ាន ប្ដេជ្ញារួមចំណែកដោះស្រាយបញ្ហាអំពើភេរវកម្ម ភាពជ្រុលនិយមហិង្សា ការជួញដូរមនុស្សនិងគ្រឿងញៀន ការនេសាទខុសច្បាប់ ព្រមទាំងការជួញដូរសត្វព្រៃនិងព្រៃឈើខុសច្បាប់ជាដើម។
ជាការកត់សម្គាល់ នៅក្នុងសេចក្ដីថ្លែងការណ៍រួមនោះ អាមេរិកនិងអាស៊ានមិនបានលើកឡើងដោយចំពោះ ចំៗ អំពីប្រទេសចិនឬបញ្ហាសមុទ្រចិនខាងត្បូងឡើយ បើទោះបីជាប្រធានបទទាំងពីរនេះ ត្រូវបានមេដឹកនាំអាស៊ាននិងអាមេរិក ជជែកពិភាក្សាគ្នាយ៉ាងតឹងសរសៃករួចមកហើយក្ដី។ មិនបានលើកឡើងចំៗក៏ពិតមែន ប៉ុន្តែក្នុងចំណោមខ្លឹមសារទាំង១៧ចំណុចនៅក្នុងសេចក្ដីថ្លែងការណ៍រួមនោះ មាន៤ចំណុចរួចទៅហើយ ដែលគេអាចយល់បានថា សំដៅសើរៗ ដល់ប្រទេសចិន និងបញ្ហាសមុទ្រចិនខាងត្បូង។
ក្នុងគោលដៅថែរក្សាសន្តិភាពនិងសន្តិសុខក្នុងតំបន់ អាមេរិកនិងអាស៊ាន បានអះអាងថា ខ្លួននឹងរួមគ្នាលើកកម្ពស់កិច្ចសហប្រតិបត្តិការណ៍ ក្នុងការដោះស្រាយបញ្ហាប្រឈមជាទូទៅ នៅក្នុងដែនសមុទ្រដោយសន្តិវិធី។ ក្រៅពីនោះ ចំពោះបញ្ហាសន្តិសុខនៃនាវាចរណ៍ ប្រទេសទាំង១១ ប្ដេជ្ញាធានាឲ្យបាននូវសិទ្ធិសេរីភាពនៃការធ្វើដំណើរនាវាចរណ៍ និងការហោះហើរនៅលើសមុទ្រអន្តរជាតិ ធ្វើយ៉ាងណាឲ្យស្របទៅនឹងអនុសញ្ញា និងច្បាប់សមុទ្រអន្តរជាតិ។
សូមជម្រាបជូនថា បន្ទាប់ពីជំនួបកំពូលអាស៊ានអាមេរិកបិទបញ្ចប់ ប្រធានាធិបតីអាមេរិកលោក អូបាម៉ា បានអំពាវនាវឱ្យមានការកាត់បន្ថយភាពតានតឹងក្នុងសមុទ្រចិនខាងត្បូងតាមភាពជាក់ស្តែង ដោយមិនឱ្យមានការកសាងថ្មី នៅលើដែនទឹកជម្លោះឡើយ។ ការអំពាវនាវរបស់លោកអូបាម៉ាដូច្នេះ ធ្វើឡើងចំពេលដែលរដ្ឋាភិបាលក្រុងប៉េកាំង នៅតែបន្តសាងសង់កោះសិប្បនិមិត្តនៅលើដែនទឹកជម្លោះ នៅសមុទ្រចិនខាងត្បូង។
ទន្ទឹមគ្នានេះ រូបភាពផ្កាយរណបនៅថ្ងៃទី១៦កុម្ភៈ បានបង្ហាញឲ្យឃើញទៀតថា ចិនបានពង្រាយប្រព័ន្ធមីស៊ីលបាញ់លើអាកាសដ៏ទំនើប ទៅកាន់កោះជម្លោះប៉ារ៉ាសែល ក្នុងសមុទ្រចិនខាងត្បូង។ ការពង្រាយប្រព័ន្ធមីស៊ីលដ៏ទំនើបនេះ គឺជាការបង្ហាញសាច់ដុំថ្មីមួយទៀតរបស់ចិន បន្ទាប់ពីអាមេរិកបានជួបប្រជុំកំពូលជាប្រវត្តិសាស្ត្រជាមួយមេដឹកនាំបណ្ដាប្រទេសអាស៊ាន នៅលើទឹកដីសាន់នីឡេន រដ្ឋកាលីហ្វ័រញ៉ា របស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ