ស្រ្តីបឹងកក់ទទួចឲ្យតុលាការកំពូលទម្លាក់ចោលការចោទប្រកាន់ពីបទរំលោភយកដីធ្លី
ស្រ្តីបឹងកក់១៣នាក់ បានទាមទារឲ្យតុលាការកំពូលទម្លាក់ចោលការចោទប្រកាន់ទៅលើពួកគេ នៅក្នុងសំណុំរឿងជម្លោះដីធ្លីនៅតំបន់បឹងកក់ ដែលធ្វើឡើងដោយតុលាការក្រុងភ្នំពេញកាលពីឆ្នាំ២០១២។ ការទាមទារនេះបានធ្វើឡើង ខណៈដែលតុលាការកំពូល បានបើកសវនាការនៅព្រឹកថ្ងៃទី២មិនានេះ លើបណ្តឹងជំទាស់របស់ក្រុមស្រ្តីបឹងកក់។ យ៉ាងណាក៏ដោយ តុលាការនឹងប្រកាសសាលក្រម នៅថ្ងៃទី១៦ មិនា ខាងមុខ។
ចុះផ្សាយនៅថ្ងៃ៖
ស្តាប់ - ០១:៤៥
ក្រុមអ្នកភូមិបឹងកក់ បានទាមទារឲ្យតុលាការជាន់ខ្ពស់របស់កម្ពុជា ទម្លាក់ចោលការចោទប្រកាន់ទៅលើស្រ្តីបឹងកក់១៣នាក់ ពីបទចូលកាន់កាប់អចលនវត្ថុនីតិបុគ្គលសាធារណៈ និងការប្រឆាំងនឹងរាជការសាធារណៈ ដែលធ្វើឡើងដោយតុលាការក្រុងភ្នំពេញកាលពីឆ្នាំ២០១២។ ការទាមទាររបស់ពួកគេ បានធ្វើឡើង ខណៈដែលស្រ្តីបឹងកក់១៣នាក់ ត្រូវបានតុលាការកំពូលកោះហៅឲ្យចូលខ្លួនទៅឆ្លើយបំភ្លឺនៅក្នុងសវនាការ នៅព្រឹកថ្ងៃទី២ មិនា ឆ្នាំ២០១៦នេះ។
សូមបញ្ជាក់ថា ស្រ្តីបឹងកក់១៥នាក់ ត្រូវបានតុលាការក្រុងភ្នំពេញកាត់ទោសឲ្យជាប់ពន្ធនាគាររយៈពេល២ឆ្នាំកន្លះ ពីបទថា បានចូលកាន់កាប់ដោយខុសច្បាប់នូវអចលនវត្ថុរបស់និតិបុគ្គលសាធារណៈ និងប្រឆាំងនឹងមន្ត្រីរាជការសាធារណៈ។ ប៉ុន្តែយ៉ាងណាក៏ដោយ បន្ទាប់ពីមានយុទ្ធនាការជាបន្តបន្ទាប់មក ស្រ្តីបឹងកក់ទាំង១៣នាក់ ត្រូវបានតុលាការសាលាឧទ្ធរណ៍សម្រេចដោះលែងឲ្យមានសេរីភាពឡើងវិញ និងបានកាត់តម្រឹមទោសពួកគេឲ្យជាប់ពន្ធនាគារត្រឹមតែ១ខែ៣ថ្ងៃ ហើយទោសដែលនៅសល់ទាំងប៉ុន្មានត្រូវបានព្យួរ។ ប៉ុន្តែយ៉ាងណាក៏ដោយ សំណុំរឿងមិនចប់នៅត្រឹមនេះទេ។
បន្ទាប់ពីចូលរួមនៅក្នុងសវនាការនៅថ្ងៃនេះ ស្រ្តីបឹងកក់ចំនួន១០រូបដែលបានចូលខ្លួនទៅបំភ្លឺនៅក្នុងតុលាការនៅថ្ងៃនេះ បានបន្តយុទ្ធនាការរបស់ពួកគេដោយជិះកង់ ដោយមានពាក់អាវព៌ណខ្មៅ និងសរសេរអក្សរព័ណសជាភាសាអង់គ្លេសថា “HUNGRY FOR JUSTIC” ដែលមានន័យថា “ស្រេកឃ្លានយុត្តិធម៌” ។
សូមបញ្ជាក់ថា លទ្ធផលនៃសវនាការនៅថ្ងៃនេះ នឹងត្រូវប្រកាសនៅថ្ងៃទី១៦ ខែមីនា ឆ្នាំ២០១៦ វេលាម៉ោង៨ព្រឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ