ពលរដ្ឋបឹងកកធ្វើយុទ្ធនាការទប់ស្កាត់ការលុបបឹង ខណៈដែលរដ្ឋអំពាវនាវ
ប្រជាពលរដ្ឋតំបន់បឹងកក់ប្រមាណជាង៥០នាក់ នៅព្រឹកថ្ងៃទី៣១ មីនាបានប្រមូលផ្តុំគ្នាគ្រោងដាក់ញត្តិនៅរដ្ឋសភាជាតិស្តីពីការទប់ស្កាត់ការលុបបឹងធម្មជាតិ។ ជាយុទ្ធនាការដែលក្រសួងរបស់រដ្ឋាភិបាល បានស្នើឱ្យអាជ្ញាធរថ្នាក់ក្រោមជាតិ ត្រូវតែប្រុងប្រយ័ត្ននិងពិនិត្យឱ្យបានច្បាស់លាស់មុននឹងអនុញ្ញាតិឱ្យមានការលុបបឹង។
ចុះផ្សាយនៅថ្ងៃ៖
ស្តាប់ - ០១:៥៥
ប្រជាពលរដ្ឋតំណាងឱ្យអ្នកបឹងកក់ដែលជាអ្នករងគ្រោះដោយសារការលុបបឹង គ្រោងដង្ហែក្បួនដាក់ញត្តិទៅកាន់រដ្ឋសភា ដើម្បីបញ្ឈប់ការលុបបឹងធម្មជាតិដែលបានប៉ះពាល់ដល់ជីវិភាពរបស់ប្រជាពលរដ្ឋ ដែលរស់នៅក្នុងតំបន់។ ទន្ទឹមនឹងនេះ រដ្ឋាភិបាលក៏បានអំពាវនាវឱ្យអាជ្ញាធរដែនដីត្រូវប្រុងប្រយ័ត្ននឹងគិតឱ្យបានវែងឆ្ងាយចំពោះការអនុញ្ញាតឱ្យមានការលុបបឹង។
ក្នុងសំលៀកបំពាក់អាវយឺតព័ត៌ខ្មៅ ដែលមានរូបភាពផ្ទៃបឹងដែលពោរពេញដោយដីខ្សាច់ និងមានអក្សរថាបញ្ឈប់ការលុបបឹង ក្បួនដង្ហែដែលដឹកនាំដោយលោកស្រីទេព វណ្ណី ត្រូវបានកម្លាំងអាជ្ញាធរបង្អាក់ដំណើរឆ្ពោះទៅកាន់រដ្ឋសភាជាតិ។
ពលរដ្ឋចូលរួមបានលើកឡើងថា មូលហេតុដែលធ្វើឱ្យប្រជាពលរដ្ឋរួមគ្នាធ្វើយុទ្ធនាការបញ្ឈប់ការលុបបឹងនេះ គឺមកពីការលុបបឹងជាច្រើនក្នុងទីក្រុងភ្នំពេញ ដូចជាបឹងកក់ បឹងប៉ាយ៉ាប និងទំពន់ជាដើម សុទ្ធតែផ្តល់ផលប៉ះពាល់ដល់ប្រជាពលរដ្ឋក្រីក្រ ទាំងជីវភាព និងការរស់នៅ។
បន្ថែមពីនេះ ក្រសួងធនធានទឹកកាលពីថ្ងៃទី២៨ មីនា បានចេញសេចក្តីអំពាវនាវមួយចំពោះបញ្ហាការលុបបឹង។ រដ្ឋបានទទួលស្គាល់ថា ការលុបបឹងធម្មជាតិដោយបុគ្គលមួយចំនួន បានបង្កឱ្យប្រជាពលរដ្ឋមានការក្តៅក្រហាយដែលបង្កចេញជាទំនាស់ជាមួយប្រជាពលរដ្ឋកើតឡើង។ ក្រសួងហាក់ដូចជាបន្ទោសលើអាជ្ញាធរមូលដ្ឋានដែលជាអ្នកក្តាប់ព័ត៌មានច្បាស់ ប៉ុន្តែបណ្តែតបណ្តោយឱ្យមានការលុបបឹងកើតឡើង។ ដូចនេះមុននឹងសម្រេច ឬមានវិធានការយ៉ាងណានោះ ត្រូវពិនិត្យមើលច្បាប់ និងលិខិតបទដ្ឋានគតិយុត្តិពាក់ព័ន្ធឱ្យបានច្បាស់ជាមុនសិនព្រោះថា បឹងបួធម្មជាតិទាំងអស់គឺជាសម្បតិ្តរបស់រដ្ឋ។
សង្គមស៊ីវិល និងអ្នកតាមដានការអភិវឌ្ឍ បានលើកឡើងថា ការសម្រេចលុបបឹងរបស់រដ្ឋាភិបាលនាពេលកន្លងមក មិនបានធ្វើការសិក្សាពីផលប៉ះពាល់ឱ្យបានជាក់ស្តែង និងសងសំណងប្រជាពលរដ្ឋទៅតាមទីផ្សារដើម្បីអាចឱ្យប្រជាពលរដ្ឋនៅក្នុងតំបន់អភិវឌ្ឍន៍ទាំងនោះ ទទួលបានផលនៃការអភិវឌ្ឍដែរទេ ប៉ុន្តែពួកគាត់បែរជាអ្នកទទួលរងគ្រោះដោយសារការអភិវឌ្ឍទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ