ក្រុមស្ត្រីបឹងកក់ចង់ជួប លោកស្រី រ៉ូណា ស្មីត ដើម្បីរៀបរាប់ពីបញ្ហាប្រឈមរបស់ពួកគេ
មួយថ្ងៃមុនដំណើរមកដល់របស់លោកស្រី រ៉ូណា ស្មីត ក្រុមស្ត្រីបឹងកក់នៅថ្ងៃចន្ទនេះបានយកញត្តិទៅដាក់នៅការិយាល័យសិទ្ធិមនុស្ស អង្គការសហប្រជាជាតិប្រចាំនៅកម្ពុជា។ បន្ថែមពីលើខ្លឹមសារក្នុងញត្តិដែលចង់ឲ្យលោកស្រី រ៉ូណា ស្មីត អន្តរាគមន៍ជួយឲ្យមានការដោះលែង អ្នកស្រីទេព វណ្ណី ក្រុមស្ត្រីបឹងកក់ក៏បានស្នើសុំជួប លោកស្រី រ៉ូណា ស្មីត នៅក្នុងជំនួបដាច់ដោយឡែកផ្សេងពីក្រុមអង្គការសង្គមស៊ីវិល។
ចុះផ្សាយនៅថ្ងៃ៖
ស្តាប់ - ០១:៥០
ប្រសិនបើមានឱកាសខ្ញុំចង់ជួបលោកស្រី រ៉ូណា ស្មីត ដើម្បីលើកឡើងពីបញ្ហារបស់ពួកខ្ញុំឲ្យគាត់ដឹង។ នេះគឺជាការលើកឡើងរបស់តំណាងសហគមន៍បឹងកក់ អ្នកស្រី ប៊ូវ សោភា នៅចំពោះលោកស្រី វ៉ាន់ ហ៊ីលី (Wan-Hea Lee ) តំណាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជាខណៈដែលលោកស្រីចេញមកទទួលញត្តិ។
បើតាមអ្នកស្រី ប៊ូវ សោភា បញ្ហារបស់ពួកគាត់កំពុងជួបប្រទះគឺជាជនរងគ្រោះព្រោះប្រព័ន្ធតុលាការ និងរងគ្រោះដោយសារជម្លោះដីធ្លី។ មូលហេតុដែលស្ត្រីបឹងកក់ចង់ជួបដោយផ្ទាល់ជាមួយលោកស្រី រ៉ូណា ស្មីត ក៏ដោយសារតែក្នុងដំណើរទស្សនកិច្ចរយៈពេល១០ថ្ងៃលោកស្រីស្មីត នឹងជួបជាមួយរដ្ឋមន្ត្រីក្រសួងយុត្តិធម៌។ តាមរយៈជំនួបនេះធ្វើឲ្យគាត់មានសង្ឃឹមថា លោកស្រីស្មីតនឹងយកបញ្ហារបស់ពួកគាត់ទៅជជែកជាមួយលោក អង្គ វឌ្ឍនា នៅក្នុងចំណោមប្រធានបទផ្សេងទៀត។ ជាការឆ្លើយតបលោកស្រី វ៉ាន់ ហ៊ីលី នឹងដាក់លិខិតនេះជូនលោកស្រីស្មីត តែចំពោះជំនួបរវាងភាគីទាំងពីរយ៉ាងណានោះលោកស្រីនៅមិនទាន់បញ្ជាក់បានទេ។
ដោយឡែកចំពោះកិច្ចអន្តរាគមន៍ឲ្យមានការដោះលែងអ្នកស្រី ទេព វណ្ណី ធ្វើឡើងក្នុងភាពគាប់ជួន ខណៈនៅថ្ងៃស្អែកនេះ តុលាការឧទ្ទរណ៍ប្រកាសសាលលើសំណុំរឿងរបស់អ្នកស្រី ទេព វណ្ណី ចំពេលលោកស្រីស្មីតមកដល់នៅថ្ងៃស្អែកនេះដែរ។
អ្នកស្រីទេព វន្នី ត្រូវបានសាលាដំបូងរាជធានីភ្នំពេញ កាលពីថ្ងៃទី២៣ ខែកុម្ភៈ ឆ្នាំ២០១៧ សម្រេចផ្ដន្ទាទោសឲ្យជាប់ពន្ធនាគារ និងពិន័យប្រាក់ ពីបទហិង្សាដោយចេតនាមានស្ថានទម្ងន់ទោសលើសន្តិសុខសណ្ដាប់ធ្នាប់សាលាខណ្ឌដូនពេញ ដែលប្រព្រឹត្តនៅក្បែរផ្ទះលោកនាយករដ្ឋមន្ត្រី ហ៊ុន សែន កាលពីថ្ងៃទី១៣ ខែមីនា ឆ្នាំ២០១៣។
ចំណែក នៅក្នុងដំណើរទស្សនកិច្ចជាថ្មីរយៈពេល១០ថ្ងៃរបស់ លោកស្រីរ៉ូណា ស្មីត នឹងជួបប្រជុំជាមួយក្រុមសមាជិកជាន់ខ្ពស់នៃរដ្ឋាភិបាលកម្ពុជា តំណាងសង្គមស៊ីវិល និងសមាជិកនៃសហគមន៍ការទូតនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ