ពលរដ្ឋបឹងកក់បន្តសុំអន្តរាគមន៍ពីស្ថាប័នអន្តរជាតិ ជួយពន្លត់ទំនាស់ដីធ្លីជាង ១០ឆ្នាំនៅភ្នំពេញនិងដោះលែងអ្នកតំណាងម្នាក់
ប្រជាពលរដ្ឋសហគមន៍នៅតំបន់បឹងកក់ប្រមាណជា ១០នាក់ បានបន្តយកញត្តិទៅដាក់នៅធនាគារពិភពលោក (World Bank) និងសហភាពអឺរ៉ុប (EU) នៅថ្ងៃពុធនេះ ដើម្បីសុំឲ្យស្ថាប័នអន្តរជាតិធំៗទាំងពីរនេះ ជួយអន្តរគមន៍ដោះស្រាយបញ្ហាជម្លោះដីធ្លីជាង ១០ឆ្នាំ នៅចំកណ្តាលទីក្រុងភ្នំពេញ និងជួយអន្តរាគមន៍ដោះលែងតំណាងរបស់ខ្លួនម្នាក់ ដែលកំពុងជាប់ពន្ធនាគារព្រៃស។ អ្វីជាការកត់សម្គាល់ ក្នុងពេលយកញត្តិទៅដាក់នៅស្ថាប័នទាំងពីរខាងលើនេះ ក៏មានការរារាំងពីកងកម្លាំងសន្តិសុខទីក្រុងភ្នំពេញដែរ តែមិនមានការប៉ះទង្គិចគ្នាទេ។
ចុះផ្សាយនៅថ្ងៃ៖
“សូមជួយអន្តរាគមន៍ដោះលែងអ្នកស្រីទេព វណ្ណី និងជួយបញ្ចប់ជម្លោះដីធ្លីនៅសហគមន៍បឹងកក់”!!!”។ នេះគឺជាការទទូចសុំរបស់ប្រជាពលរដ្ឋសហគមន៍បឹងកក់ប្រមាណជា ១០នាក់ កាលពីព្រឹកថ្ងៃពុធទី ១៤កញ្ញានេះ ខណៈដែលពួកគេបានយកញត្តិទៅដាក់នៅធនាគារពិភពលោក (World Bank) និងសហភាពអឺរ៉ុប(EU) ដើម្បីជួយដល់ពួកគេ។ ញត្តិរបស់អ្នកភូមិបឹងកក់មានខ្លឹមសារសំខាន់ចំនួន ៣ចំណុច ទី១.ស្នើសុំឲ្យស្ថាប័នទាំងពីរជួយអន្តរាគមន៍ដោះលែងអ្នកស្រី ទេព វណ្ណី ដែលកំពុងជាប់ពន្ធនាគារព្រៃស ទី២.សុំឲ្យជួយដោះស្រាយជម្លោះដីធ្លីនៅតំបន់បឹងកក់ ដែលនៅសេសសល់ប្រមាណជា ១៩គ្រួសារ និងទី៣.គឺជួយការពារតំណាងរបស់ខ្លួនចំនួនពីររូបទៀត គឺអ្នកស្រី គង់ ចន្ថា និងអ្នកស្រី បូ ឆវី ដែលនឹងត្រូវចូលខ្លួនទៅកាន់តុលាការនៅថ្ងៃទី ១៩កញ្ញាខាងមុខ ពាក់ព័ន្ធនឹងសំណុំរឿងជាមួយអ្នកស្រី ទេព វណ្ណី។
តំណាងសហគមន៍បឹងកក់ អ្នកនាង បូវ សោភា បានប្រាប់ក្រុមអ្នកកាសែតថា ការស្នើសុំអន្តរាគមន៍ពីស្ថាប័នទាំងពីរ គឺដោយសារពួកគេជឿជាក់ថា ធនាគារពិភពលោក (World Bank) នេះហើយ ដែលបានជាប់ពាក់ព័ន្ធនឹងការផ្តល់ហិរញ្ញវត្ថុក្នុងការអភិវឌ្ឍនៅតំបន់បឹងកក់ និងជាដើមចមនៃការបណ្តេញពួកគេចេញពីលំនៅស្ថាន តាំងពីឆ្នាំ ២០០៧មក។ ចំណែកសហភាពអឺរ៉ុបវិញ ត្រូវបានពួកគេជឿដែរថា នឹងមានទឹកមាត់ប្រៃអាចនិយាយទៅកាន់រដ្ឋាភិបាលកម្ពុជា ឲ្យទម្លាក់ចោលការចោទប្រកាន់នានា មកលើតំណាងរបស់ពួកគេ។ ញត្តិរបស់ប្រជាសហគមន៍បឹងកក់នៅថ្ងៃនេះ ត្រូវបានចេញមកទទួលដោយតំណាង នៃស្ថាប័នអន្តរជាតិធំៗទាំងពីរ តែមិនទាន់ប្រាកដថា នឹងអាចជួយដោះស្រាយបាននោះទេ។
ក្រៅពីញត្តិ ដែលមានកម្រាស់តែ ១ទំព័រនេះហើយ ក្រុមអ្នកភូមិ ដែលមានសុទ្ធតែជាស្រ្តីនេះ ក៏បានលើកបដាធំៗ អមដោយរូបថតរបស់សកម្មជនដីធ្លីដ៏លេចធ្លោមួយចំនួន ដែលរងការបង្រ្កាប និងការចាប់ចងនៅក្នុងការតវ៉ានាពេលកន្លងមក ពិសេសគឺអ្នកស្រី ទេព វណ្ណី ម្ចាស់ពានរង្វាន់”ស្ត្រីភាពជាមេដឹកនាំពិភពលោក” របស់អង្គការអាមេរិក វ៉ាយថល វ៉យស៍ (Vital Voices) ដែលកំពុងជាប់ឃុំនៅពន្ធនាគារព្រៃស។
គួរបញ្ជាក់ដែរថា នេះគឺជាលើកទី១ ហើយក៏មិនទំនងជាលើកចុងក្រោយដែរ ដែលសហគមន៍បឹងកក់ បានចេញមុខស្វែងរកអន្តរាគមន៍ពីស្ថាប័នអន្តរជាតិធំៗទាំងពីរនៅកម្ពុជានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ