កិច្ចប្រជុំចង្អៀតកម្ពុជា-វៀតណាមអាចពុំមានលទ្ធផល
កិច្ចប្រជុំចង្អៀតស្តីពីព្រំដែនកម្ពុជាវៀតណាម នៅថ្ងៃចន្ទ ទី២៩ សីហានេះ បានចាប់ផ្តើមតាមការគ្រោងទុក។ ភាគីកម្ពុជាដឹកនាំដោយលោក វ៉ា គឹមហុង ដោយឡែកភាគីវៀតណាម ដឹកនាំដោយ លោក ឡេ ហួយជុន (Le Hoai Trung)។ កិច្ចប្រជុំនេះធ្វើឡើងក្រោយការតវ៉ាជាច្រើនលើកច្រើនសារពីកម្ពុជា ជុំវិញការកសាងប៉ុស្តិ៍យោធានៅតំបន់តាមព្រំដែន ដែលមិនទាន់ឯកភាពគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
កិច្ចប្រជុំចង្អៀតនៅភ្នំពេញរវាងកម្ពុជានិងវៀតណាម អាចពិបាកនឹងមានលទ្ធផលល្អ។ ភាគីកម្ពុជា បានប្រាប់វិទ្យុបារាំងអន្តរជាតិថា ទាំងពីរភាគីខ្មែរ និងវៀតណាម ប្រកាន់គោលជំហយកប្រយោជន៍រៀងខ្លួន ហើយថាតានតឹង។ លោកស្រីកុយ ពិសី អនុប្រធានលេខាធិការដ្ឋាន អចិន្ត្រៃយ៍ នៃអាជ្ញាធរជាតិទទួលបន្ទុកព្រំដែន បានឱ្យដឹងថា ភាគីទាំងពីរបានលើកឡើងពីការកសាងអគារ និងការជីកស្រះ និងការកសាងផ្លូវបេតុងនៅខេត្តរតនៈគីរីជាដើម។ ក្រៅពីនេះ ភាគី ដែលជជែកមិនដាច់ស្រាច់ជាមួយគ្នានេះ ក៏ពិភាក្សាស្តីពីការសុំជំនួយបច្ចេកទេសព្រំដែនពីភាគីបារាំង ដែលជាអតីតប្រទេសដាក់អាណានិគមនៅឥណ្ឌូចិនផងដែរ។
សូមបញ្ជាក់ថា កិច្ចប្រជុំចង្អៀតនេះ គឺមិនមែនជាកិច្ចប្រជុំជាប្រចាំរបស់គណៈកម្មការព្រំដែនកម្ពុជា វៀតណាម ដូចសព្វមួយដងនោះឡើយ ប៉ុន្តែជាកិច្ចប្រជុំចង្អៀត ដែលធ្វើឡើងក្រោយកំណត់ទូតតវ៉ាសាជាថ្មីរបស់កម្ពុជាប្រឆាំងរដ្ឋាភិបាលវៀតណាម ដែលមិនបានឆ្លើយតប ហើយផ្ទុយទៅវិញនៅតែបន្តសកម្មភាពនៅតាមតំបន់ស ក្នុងបណ្តោយព្រំដែនកម្ពុជា-វៀតណាមដូចជាការកសាងផ្លូវ ប៉ុស្តិ៍រដ្ឋបាល អគារ និងប៉ុស្តិ៍ច្រកទ្វាជាដើម។ លោកអ៊ូ វីរៈ អ្នកវិភាគនយោបាយកិច្ចការបរទេស និងជាប្រធានវេទិកាអនាគត បានលើកឡើងថា ការចរចាអាចមិនមានលទ្ធផលផ្លែផ្កានោះទេ ព្រោះថា កម្ពុជានៅមានបញ្ហាសេដ្ឋកិច្ចមិនទាន់រឹងម៉ាំ ដោយឡែកបញ្ហានយោបាយកម្ពុជាក៏គ្មានសាមគ្គីផ្ទៃក្នុងផងដែរ។ អ្នកវិភាគរូបនេះបន្តថាជម្រើសកម្ពុជាគឺគ្មានអ្វីក្រៅពីការចរចានោះទេ ព្រោះកម្ពុជាមិនអាចប្រើប្រាស់កម្លាំងទ័ពជាមួយវៀតណាមបាននោះឡើយ។ អ្នកវិភាគរូបនេះ គូសបញ្ជាក់ថា វៀតណាមគឺកំពុងផ្គើនកម្ពុជា និងរុញបញ្ហាព្រំដែននេះឱ្យរដ្ឋាភិបាលទីក្រុងភ្នំពេញឈឺក្បាល។
សូមកត់សម្គាល់ថា កម្ពុជាបានផ្ញើកំណត់ទូតចំនួន២៣ និងលិខិតចំនួន១ទៅកាន់វៀតណាម ដើម្បីតវ៉ាអំពីការរំលោភបំពានតាមបន្ទាត់ព្រំដែនកម្ពុជា-វៀតណាមដែលមាននៅក្នុងខេត្តរតនៈគីរី មណ្ឌលគីរី ស្វាយរៀង កណ្តាល និងខេត្តតាកែវជាដើម។
យ៉ាងណាក៏ដោយ លោកអ៊ូ វីរៈ បានមើលឃើញថា ជម្លោះព្រំដែនកម្ពុជា និងវៀតណាម គឺមិនធ្ងន់ធ្ងរទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ