កម្ពុជា-ចិន ប្តេជ្ញាសម្រេចឲ្យបានទំហំពាណិជ្ជកម្ម ៦ពាន់លានដុល្លារនៅក្នុងឆ្នាំ ២០២០
បន្ទាប់ពីបញ្ចប់កិច្ចប្រជុំស្តីពី “ខ្សែក្រវ៉ាត់ និងផ្លូវសម្រាប់កិច្ចសហប្រតិបត្តិការអន្តរជាតិ” លោកនាយករដ្ឋមន្រ្តីកម្ពុជាហ៊ុន សែនដែលកំពុងស្ថិតនៅក្នុងប្រទេសចិនស្រាប់ បានផ្តើមធ្វើទស្សនកិច្ចជាផ្លូវការរបស់ខ្លួននៅទីនោះកាលពីម្សិលមិញ និងបញ្ចប់នៅថ្ងៃនេះ។ ម្សិលមិញ លោកហ៊ុន សែន បានជួបជាមួយប្រធានសភាប្រឹក្សានយោបាយប្រជាជនចិន ប្រធានសភាតំណាងប្រជាជនចិន នាយករដ្ឋមន្រ្តីចិន និងចូលរួមក្នុងវេទិកាជំរុញផ្សព្វផ្សាយពាណិជ្ជកម្ម និងទេសចរណ៍កម្ពុជា-ចិន ឆ្នាំ ២០១៧។ ចំពោះបញ្ហាពាណិជ្ជកម្ម ចិន និងកម្ពុជាបានប្តេជ្ញាថា នឹងជំរុញឲ្យបានទំហំ ៦ពាន់លានដុល្លារអាមេរិកនៅក្នុងឆ្នាំ ២០២០។
ចុះផ្សាយនៅថ្ងៃ៖
ស្តាប់ - ០២:៤៦
នៅក្នុងជំនួបទ្វេភាគីរយៈពេល ៥០នាទីរវាងនាយករដ្ឋមន្រ្តីចិនលោកលី ឃឺឈាំង និងនាយករដ្ឋមន្រ្តីកម្ពុជាលោកហ៊ុន សែននៅក្នុងទីក្រុងប៉េកាំងប្រទេសចិន ភាគីទាំងពីរបានគូសបញ្ជាក់រួមគ្នាថា នឹងបង្កើនវិសាលភាព និងកម្រិតនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគី ដើម្បីឈានទៅសម្រេចបានទំហំពាណិជ្ជកម្មចំនួន ៦ពាន់លានដុល្លារអាមេរិកនៅក្នុងឆ្នាំ ២០២០។ តាមរយៈនេះភាគីចិនបានត្រៀមរួចជាស្រេចក្នុងការបន្តផ្តល់ជំនួយតាមសមត្ថភាពរបស់ខ្លួនដល់កម្ពុជា ដើម្បីអភិវឌ្ឍសេដ្ឋកិច្ច និង លើកកម្ពស់ជីវភាពប្រជាជនកម្ពុជា និងគាំទ្រដល់សហគ្រាសចិនដើម្បីជំរុញគម្រោងមួយចំនួន ដូចជាគម្រោងផ្លូវល្បឿនលឿនពីភ្នំពេញទៅក្រុងព្រះសីហនុ និងព្រលានយន្តហោះថ្មីក្នុងខេត្តសៀមរាប ព្រមទាំងសាងសង់តំបន់សេដ្ឋកិច្ចពិសេសក្រុងព្រះសីហនុរួមគ្នា។
ជាការសម្គាល់ ទំហំពាណិជ្ជកម្មសរុបរវាង កម្ពុជា និងចិន បានកើនឡើងយ៉ាងឆាប់រហ័សជាមធ្យម ២៦% ក្នុងរយៈពេល ១០ឆ្នាំចុងក្រោយនេះ ។ នៅក្នុងឆ្នាំ ២០១៦កន្លងទៅ ពាណិជ្ជកម្មទ្វេភាគីរវាងចិន និងកម្ពុជា បានកើនដល់ ៤ពាន់ ៨រយលានដុល្លារអាមេរិក ក្នុងនោះការនាំចេញរបស់កម្ពុជាមានទំហំ ៨៣០ លានដុល្លារអាមេរិក និង នាំចូលមានប្រមាណជា ៣ពាន់ ៩រយលានដុល្លារអាមេរិក ។ ចិន គឺជាប្រទេសវិនិយោគធំជាងគេនៅកម្ពុជា ដែលគិតត្រឹមឆ្នាំ ២០១៦ វិនិយោគរបស់ចិនកើនដល់ ៥ពាន់១រយលានដុល្លារដែលផ្តោតលើវិស័យមួយចំនួនដូចជា កម្មន្តសាល សំណង់ វាយនភ័ណ និងអគ្គសនី។ ចំណែកភ្ញៀវទេសចរណ៍ចិនមកកម្ពុជាបានកើនដល់ ៨៣ម៉ឺននាក់នៅក្នុងឆ្នាំ ២០១៦ គឺបានកើនឡើង២០%បើធៀបនឹងឆ្នាំ២០១៥ ។ ដោយឡែក នៅឆ្នាំក្រោយនេះ ចិនក៏បានយល់ព្រមឲ្យកម្ពុជានាំចូលអង្ករ ៣០ម៉ឺនតោនផងដែរ។
សូមបញ្ជាក់ដែរថា ក្រៅពីតែជាប្រទេសវិនិយោគធំជាងគេនៅកម្ពុជា ចិនក៏ជាប្រទេសដែលផ្តល់ប្រាក់កម្ចីច្រើនជាងគេដល់កម្ពុជាថែមទៀត។ គិតត្រឹមឆ្នាំ ២០១៦ កម្ពុជាបានខ្ចីលុយចិនចំនួនជាង ៣ពាន់ ៥រយលានដុល្លារអាមេរិក នៅក្នុងចំណោមបំណុលបរទេសសរុបទាំងអស់ចំនួនជាង ៨ពាន់៣រយលានដុល្លារអាមេរិកទាំងទ្វេភាគី និងពហុភាគី។ ចំពោះទ្វេភាគី ក្រៅពីចិន កម្ពុជាក៏បានខ្ចីលុយពីជប៉ុនចំនួនប្រមាណ ៨៩៩លានដុល្លារ ខ្ចីកូរ៉េខាងត្បូងចំនួនជិត៥១០លានដុល្លារ ខ្ចីបារាំងជាង១២៤លានដុល្លារ ខ្ចីថៃជាង៨៦លានដុល្លារ វៀតណាមជាង៤៤លានដុល្លារ ម៉ាឡេស៊ីជាង៧លានដុល្លារ និងឥណ្ឌាជាង៧៥លានដុល្លារអាមេរិក។ ចំណែកសម្រាប់ពហុភាគីវិញ កម្ពុជាបានខ្ចីពីធនាគារអភិវឌ្ឍន៍អាស៊ី ADB ចំនួនជាង២ពាន់លានដុល្លារ ពីធនាគារពិភពលោកចំនួនជាង ៧៩៣លានដុល្លារ មូលនិធិអន្តរជាតិសម្រាប់ការអភិវឌ្ឍន៍កសិកម្មចំនួនជាង ៨៦លានដុល្លារ មូលនិធិអភិវឌ្ឍន៍ន័រឌីក ជាង ១០លានដុល្លារ និងមូលនិធិអូប៉ិចសម្រាប់ការអភិវឌ្ឍអន្តរជាតិចំនួនជាង ៦៩លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ