វៀតណាមជីកផ្តាច់ផ្លូវចេញចូលព្រំដែនខេត្តរតនគីរី ឆ្លើយតបកម្ពុជា ដែលមិនព្រមបើកច្រក បន្ថែម
កាលពីអំឡុងខែធ្នូឆ្នាំមុននេះ ភាគីវៀតណាម បានជីកផ្តាច់ផ្លូវចេញចូលព្រំដែននៃប្រទេសទាំងពីរ ស្ថិតនៅស្រុកអណ្តូងមាស ខេត្តរតនគិរី ដើម្បីឆ្លើយតបមកកាន់ភាគីកម្ពុជា ដែលមិនព្រមធ្វើតាមសំណើរបស់ខ្លួន ដែលសុំឱ្យបើកច្រកទ្វេភាគីបន្ថែម។ បើតាមរបាយការណ៍របស់ស្នងការដ្ឋាននគរបាលខេត្តរតនគីរី ដែលផ្សព្វផ្សាយ នៅថ្ងៃទី០៨ ខែមករា ឆ្នាំ២០១៨នេះ នេះគឺជាលើកទី២ហើយ នៅក្នុងអំឡុងខែធ្នូឆ្នាំមុន ដែលភាគីវៀតណាម បានធ្វើសកម្មភាពបែបនេះ។
ចុះផ្សាយនៅថ្ងៃ៖
ស្តាប់ - ០២:២៤
សកម្មភាពវៀតណាមបិទច្រកទ្វារទាំង៤កន្លែងនោះ បានកើតឡើងតាំងពីថ្ងៃទី ២៣ ធ្នូ ចុងឆ្នាំ២០១៧មក។ ជាសកម្មភាពដែលភាគីវៀតណាមបានធ្វើឡើង ដើម្បីឆ្លើយតបមកកាន់ភាគីកម្ពុជា ដែលបានប្រកាសបដិសេធបើកច្រកទ្វេភាគីបន្ថែមយ៉ាងតិចចំនួន៤កន្លែង ស្ថិតនៅក្នុងស្រុកអណ្តូងមាស ខេត្តរតនគីរី ឈមនឹងខេត្តកន្ទូម ប្រទេសវៀតណាម។ នេះបើតាមរបាយការណ៍របស់ស្នងការដ្ឋាននគរបាលខេត្តរតនគីរី កាលពីថ្ងៃទី ២៥ ធ្នូ ប៉ុន្តែទើបតែផ្សព្វផ្សាយឲ្យដឹងនៅថ្ងៃទី ០៨ មករា នេះ។
បើតាមរបាយការណ៍ ផ្ញើជូនអគ្គស្នងការដ្ឋាននគរបាលជាតិនេះ កាលពីថ្ងៃទី ២៣ ធ្នូ កងទ័ពការពារព្រំដែនវៀតណាមប៉ុស្តិ៍លេខ៧០៣ បានធ្វើរបងបិទផ្លូវ៤កន្លែង ដែលជាផ្លូវតភ្ជាប់ទំនាក់ទំនងចេញចូលរវាងប៉ុស្តិ៍ការពារព្រំដែន ចំណុចបង្គោលលេខ ១៧, ១៨, ១៩, និងចំណុច១៩/៥។ ការបិទផ្លូវធ្វើដំណើរចេញចូលរវាងប៉ុស្តិ៍ការពារព្រំដែនខេត្តកន្ទូមវៀតណាម និងប៉ុស្តិ៍ការពារព្រំដែនខេត្តរតនគីរីជាឯកតោភាគីនេះ បានធ្វើឲ្យប៉ះពាល់ដល់ការធ្វើដំណើរចេញចូលនៃប្រជាពលរដ្ឋរវាងប្រទេសទាំងពីរ និងការផ្តាច់ធ្វើទំនាក់ទំនងរវាងប៉ុស្តិ៍ការពារព្រំដែនកម្ពុជាលេខ ២០៣ ជាមួយភាគីវៀតណាមផងដែរ។
ការបិទច្រកទ្វេភាគីជាឯកតោភាគី ពីសំណាក់កងទ័ពការពារព្រំដែនវៀតណាម គឺជាការឆ្លើយតបទៅនឹងភាគីកម្ពុជា ដែលមិនព្រមធ្វើតាមសំណើរបស់ខ្លួន ដែលសុំឱ្យបើកច្រកទ្វេភាគីបន្ថែម។ បើតាមរបាយការណ៍នេះថា កាលពីថ្ងៃទី ១១ ធ្នូ អាជ្ញាធរខេត្តរតនគីរី និងខេត្តកន្ទូម ប្រទេសវៀតណាមបានប្រជុំពិភាក្សាគ្នាបើកច្រកទ្វេភាគីចំនួន៤កន្លែង ស្ថិតនៅម្តុំបង្គោលព្រំដែនលេខ៤/២ លេខ១០ លេខ១៣ និងលេខ៩ ប៉ុន្តែក្នុងនោះ ភាគីទាំងពីរបានព្រមព្រៀងគ្នាតែ១ចំណុចប៉ុណ្ណោះ គឺត្រង់បង្គោលព្រំដែនលេខ១៩។ ចំណែកច្រកទ្វារ៣ចំណុចទៀត ភាគីខេត្តរតនគីរី មិនឯកភាពទេ ដោយសារច្រកទាំង៣នោះ គឺស្ថិតនៅក្នុងព្រៃជ្រៅ ហើយពុំមានប្រជាពលរដ្ឋរស់នៅ និងឆ្លងកាត់នោះទេ។
គួរជំរាបជូនថា នេះគឺជាលើកទី២ហើយ នៅក្នុងខែធ្នូកន្លងទៅនេះ ដែលកងទ័ពការពារព្រំដែនខេត្តកន្ទូមនៃប្រទេសវៀតណាម បានបិទផ្លូវធ្វើដំណើរចេញចូលព្រំដែនរវាងប្រទេសទាំងពីរ បន្ទាប់ពីសកម្មភាពលើកទី១ វៀតណាមបានជីកផ្តាច់ផ្លូវត្រង់បង្គោលព្រំដែនលេខ ៤/២ កាលពីថ្ងៃទី ១២ ធ្នូ ឆ្នាំ២០១៧ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ