មជ្ឈមណ្ឌលសិទ្ធិមនុស្សកម្ពុជាទទួលរូបថតប្រឆាំងនិទណ្ឌភាព«ច្រើនជាងមុន»
យុទ្ធនាការប្រឆាំងនិទណ្ឌភាពនៅកម្ពុជា ឆ្នាំ២០១៤ ដែលរៀបចំធ្វើដោយមជ្ឈមណ្ឌលសិទ្ធិមនុស្ស តាំងពីថ្ងៃទី២ ខែវិច្ឆិកាមក មានការចូលរួម«ច្រើនជាងមុន» ដោយហេតុថា គិតដល់ត្រឹមថ្ងៃទី២៣ ខែវិច្ឆកានេះ មនុស្ស២១៤នាក់ បានថតរូបរបស់ខ្លួនផ្ញើទៅអង្គការសិទ្ធិមនុស្សមួយនេះ។ នៅសល់តែ១០ថ្ងៃទៀតប៉ុណ្ណោះ យុទ្ធនាការនេះនឹងចប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
មជ្ឈមណ្ឌលសិទ្ធិមនុស្សកម្ពុជា បានបង្ហើបឱ្យដឹងថា រហូតដល់ថ្ងៃទី២៣ ខែវិច្ឆិកា មានមនុស្ស២១៤នាក់ហើយ ដែលបានថតរូបខ្លួនឯងជាមួយសារដែលថា «សូមបញ្ចប់និទណ្ឌភាពនៅកម្ពុជា» ឬ«និយាយថាទេចំពោះនិទណ្ឌភាព» ហើយផ្ញើមក ដើម្បីចូលរួមក្នុងយុទ្ធនាការប្រឆាំងនិទណ្ឌភាពឆ្នាំ២០១៤ ដែលបានចាប់ផ្តើមនៅថ្ងៃទី០២ ខែវិច្ឆិកា។ យុទ្ធនាការនេះត្រូវបានរៀបចំឡើងដើម្បីអបអរទិវាបញ្ចប់និទណ្ឌភាពអន្តរជាតិ ចំពោះបទល្មើសប្រឆាំងនឹងអ្នកសារព័ត៌មាន ដែលអង្គការសហប្រជាជាតិបានទទួលស្គាល់ជាលើកដំបូង នៅឆ្នាំ២០១៤។
កញ្ញា សន រ៉ាមណា អ្នកសម្របសម្រួលគម្រោងសេរីភាពខាងការបញ្ចេញមតិ និងគម្រោងសិទ្ធិ នៃមជ្ឈមណ្ឌលសិទ្ធិមនុស្សកម្ពុជា បានអះអាងថា យុទ្ធនាការនេះ«ជោគជ័យមែនទែន»។ បើទោះបីជាមើលទៅចំនួននេះតិចសម្រាប់អ្នកមើលពីក្រៅក៏ដោយ ក៏កញ្ញា សន រ៉ាមណា បញ្ជាក់ថា ចំនួនអ្នកចូលរួមថតរូបខ្លួនឯងហើយផ្ញើឱ្យមជ្ឈមណ្ឌលសិទ្ធិមនុស្សគឺមាន«ច្រើនជាង»អ្នកចូលរួមក្នុងយុទ្ធនាការផ្សេងៗ ដែលអង្គការនេះបានរៀបចំធ្វើលើកមុន។ បើតាមអ្នកសម្របសម្រួលគម្រោងរូបនេះ សាធារណៈជន សិស្ស និស្សិតទាំងក្នុង និងក្រៅប្រទេស បុគ្គលិកអង្គការសង្គមស៊ីវិល និងជនបរទេស ជាអ្នកដែលសុខចិត្តចូលរួមប្រឆាំងនិទណ្ឌភាពក្នុងគម្រោងដឹកនាំដោយមជ្ឈមណ្ឌលសិទ្ធិមនុស្សកម្ពុជា។
នៅសល់តែ១០ថ្ងៃទៀត យុទ្ធនាការបញ្ចប់និទណ្ឌភាពឆ្នាំ២០១៤របស់មជ្ឈមណ្ឌលសិទ្ធិមនុស្សកម្ពុជានឹងត្រូវបញ្ចប់។ អង្គការសិទ្ធិមនុស្សនេះ នឹងបោះពុម្ពរូបថតទាំងអស់លើបដាធំមួយ ហើយនឹងត្រូវផ្ញើជូនក្រសួងយុត្តិធម៌នៅថ្ងៃទី២ ខែធ្នូ ឆ្នាំ២០១៤ ក្នុងគោលបំណងបង្ហាញពីការទាមទាររបស់ប្រជាពលរដ្ឋឱ្យបញ្ចប់និទណ្ឌភាព ឬការមិនត្រូវបានផ្តន្ទាទោសនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ